Daniel (1/12)  

1. Juda lal Jehoiakim inlala inthoka kum thumnaa chun Babulon lal Nebukadnezzar chu Jerusalemah a hung a, a'n huol a.
2. LALPA thuin Juda lal Jehoiakim chu a man a, Pathien ina bur le bel thenkhat khom a lak sa bok a, chuonghai chu Babulon tieng a pathien inah a hawn a, rosum sie khawmnaa chun a sie a.
3. Chun lal chun Israelhai lal thla le milien nauhai, tlangval pieng fel le hmel tha,
4. thil hrang hrang inchuk thei dinga lungvar nei, hrietna nei tha, thil man zung zung thei mi le lal ina thok tlak mi ni dinghai chu thlang suok a, Kaldai tong le an thu le hla inchuktir dingin a lal ina thoktuhai po po hotu Aspenaz chu thu a pek a.
5. Ni tina an fak le dawn ding bu le uoiin chu lal chokaa inthoka mi ngei pe dingin lal chun thu a pek bok a. Chuong anga kum thum a zirtir hnung chun lal hmaah an inlang ding a nih.
6. Chuong an mi thlanghai chu Juda thlaa mi Daniel hai, Hanania hai, Misael hai le Azaria hai an nih.
7. Lal ina hotu chun an hming thar ding a sakpek a, Daniel chu Beltesazar a'n buk a, Hanania chu Sadrak, Misael chu Mesak, Azaria chu Abednago a'n buk bok a.
8. Daniel ruok chun lal bu le uoiin-a insukporche naw a tum tlat leiin lal in hotu kuoma chun chuong anga insukporche lo dinga phalna chu a hni a.
9. Pathienin Daniel chu a hotu ditsakna le lunginsietna a'n dongtir a.
10. Sienkhom, hotu chun Daniel kuomah, "In fak le dawn ding ruottu ka pu, lal hi ka ti a nih. Nakie hin nangni kum ruolpuihai neka se lemin hung hmu sien cheu iem mi law tang a ta? Lal chun nangni leiin ka lu la ngei a tih" a ta.
11. Daniel hai, Hanania hai, Misael hai le Azaria hai enkoltu dingin lal ina hotu tak chun mi pakhat a ruot a. Daniel chun a kuomah,
12. "I siehlawhai hi ni sawm sung mi ensin rawh. Chu sung chun fak ding thlai le dawn ding tui chauh naw chu thil dang mi pe naw rawh.
13. Chu zoah kan hmel le lal bu fatuhai hmel enkhi la, i hmu dan angin i siehlawhai chunga hin thaw rawh" a ta.
14. Chuong ang chun a remti a, ni sawm sung a ensin a.
15. Ni sawm hnung chun lal bu fatu tlangvalhai po po nekin anni chu an inlang hrisel lemin an sa khom a nam tha lem a.
16. Chuongchun, anni enkoltu chun lal bu hnienghnar le uoiin chu a lak hmang a, thlai ringot a pek ta lem a.
17. Hieng tlangval palihai hi Pathienin thu le hla le thil tinreng hriet theina le hriet thiemna a pek a. Daniel lem chu inlarna le mang tinreng hril fie theina a pek a.
18. Lal hmaa an inlang ni dinga ruot a hung tlung chun lal in hotu chun anni chu Nebukadnezzar hmaah a thuoi a.
19. Lal chun a lo biek tawl a, Daniel le Hanania le Misael le Azaria hai tluka var mi dang tu khom a hmu naw a, lal ina thoktu dingin a lak tawl nghal a.
20. Lalin varna thu le hriet thiemna tinreng thil a'n donhai hrim hrim chu a ram puma mitdawivaihai le dawithiemhai let sawmin an hriet lem vong ti a hung hriet ta a.
21. Daniel lem chu lal Kura inlal hnung kum khatna chen a thok zom pei hrim a nih.

      Daniel (1/12)