←  Colossians (2/4)  →
1. Nangni le Laodikei khuoa mi le ka hmel la hmu ngai nawhai khomin ieng ang hiela inrimin am in ta dingin sin ka thaw hlak ti hi in hriet ka nuom.
2. An lungril chokphur a, hmangainaah sui khawm a, kong tinrenga lungrila hriet thiem theina hau a, Pathien thuruk, Krista chu an hung hriet chieng hi ka thil tum chu a nih.
3. Kristaa chun varna le hriet thiemna ro hlu po po chu a'n phum si a.
4. Tu khomin bau themthiema an hlem kawi nawna ding cheuin hi hi ka hril a nih.
5. Taksain in kuomah um naw lang khom thlarau chun ka um a, in invong felzie le Krista ringnaa in nghetzie ka hrietin ka lawm a nih.
6. Chuongchun, Krista Isu chu Lalpaa in pom tak leiin amaah um ro.
7. Amaa chun zung keia insuknghet tung peiin, inchuktir in ni dan ang tak khan, ringnaa chun ngir nghet unla, lawmthu hril uor ro.
8. Fimkhur ro, Kristaa inthoka suok ni lo, zirtirna indik lo, khawvel le thilsiemhai umphung inchuktirna thu dawrawmb chun tuhaiin amanih hlem pal hlauh rawi an ti cheu.
9. Krista taksaa chun Pathien nina famkim chu a um si a.
10. Ama chu lalna le thuneina po po lu a na, amaa chun nangni khom sukfamkim in nih.
11. Mihriem kuta sertan ni loin, Krista sertannaa chun in mihriem phunga tisa suol chu in tan thlak tah leiin amaa chun sertan in nih.
12. Baptismaa chun ama leh phum ve in ni ta a, mithi laia inthoka ama keithotu Pathien thilthawtheina chu in ring leiin amaa chun keitho in ni ve tah.
13. In bawsietnahai le suol put in tisaa sertan lo in ni leia thi in ni lai khan Pathien chun Kristaah a sukhring ta cheu a;
14. in bawsietna po po ngaidamin, zieka um thupek le a bebawm danhai, mi khinga mi kal zing hlaktu chu kraws-ah hemdein a thai bo a, a lak hmang ta vong a.
15. Kraws-a chun inlalna le thuneinac po po chu a hne a, chuonghai chu thuoi dul dulin a hne tawlzie vantlang hmua ngei a'n entir tah a nih.
16. Chuleiin, fak le dawn thu amanih, sakhaw kut hmang thu amanih, thla thar det lawm thu amanih le sabat inser thu amaniah tu khomin in chungah thu hung nei ta naw raw hai se.
17. Hienghai hi thil la hung tlung ding hlimthla chauh an ni a, a tak ruok chu Kristaa chauh a um.
18. Inngaitlawm tehlem inhoiti pawl le vantirkohai be pawlin lawmman dong tlak loa an siem cheu inphal naw ro. Chuong ang mi chun inlarna a hmu thu a kip a kawiin uor mangkhengin a hril hlak a, a tisa lungril chu ngaidan chau le dawrawm takin a pam puom hlak.
19. Chuong ang mi chu Lu, Krista leh an inzom ta nawh. Lu-a chun tha le zungzama phan khawm taksa pum chu a'n nghat a, Pathien ditzawng angin taksa pum chu a'n thang hlak a nih.
20. Khawvel umphung inchuktirna indik lohai chu Kristaa in thisan ta si chun, iengtiziea khawvel dan hnuoiah in la tlu lut rop am a na?
21. Tawk naw, intem naw, them naw' tihai dam hi ieng dinga in la ti rop?
22. Hieng thilhai hi mihriem thupek le zirtirnaa innghat an ni a, hmang zoa bo nawk el thil an nih.
23. Hieng phuokfawm vantirko biek dam, inngaitlawm tehlem dam le taksa nasa taka soisak tihai dam hi zirtirna tha fu awmin inlang sien khom, tisa chakna khuokhirna ding chun ienga khom a tangkai nawh.
←  Colossians (2/4)  →