Colossians (1/4)  →
1. Paula, Pathien ditzawnga Krista Isu tirko le ei unaupa Timothe chun,
2. Kolosa khuoa mi thienghlimhai le Kristaa unau ringumhai chibai kan buk. Pathien, ei Pa kuoma inthoka lunginsietna le inremna chu in kuomah um raw se.
3. In ta dinga kan tongtai zatin Pathien, ei Lalpa Isu Krista P� kuoma chun lawmthu kan hril hlak.
4. Krista Isu in ringzie le mi thienghlimhai in hmangaizie thu dam kan lo hriet a.
5. Chu chu Chanchin Tha thutak in lo hrieta inthoka beiseina in lo nei tah lei a nih; chu in beisei chu in ta dingin vanah sie khawl a nih.
6. In kuomah Chanchin Tha thutak a hung tlung a, Pathien lunginsietna chu in hriet chieng nia inthoka nangni laia thil um ang khan khawvel ram tinah Chanchin Tha chun ra insuoin a'n dar tah a.
7. Kan taa dinga Krista rongbawltu ringum Epafra, kan rongbawlpui dittak, Chanchin Tha hung hriltu cheu khan,
8. Thlarau zara hmangaina in nei thu dam a mi hril a nih.
9. Chu lei chun thlarau tieng varna le hriet thiemna tinrenga a ditzawng in hriet theina dingin, in chanchin kan hriet nia inthokin Pathien kuomah tongtaia hnipek cheu kan ma nawh.
10. Lalpa mi ni tlak a, kong iengkimah ama suklawmtu ni a, thil tha tinrenga ra insuo a, Pathien hrietnaa in hung inthanglien pei theina dingin kan hni bok hlak.
11. A thilthawtheina ropui taka inthoka suok hratna chun kong tinrengah tuorselna le dawtheina nei dingin sukhrat raw se cheu.
12. A ram enga mi thienghlimhai le rochan nei ve tlaka siemtu cheu Pathien kuoma chun hlim takin lawmthu kan hril bok hlak.
13. Ama chun thim thuneinaa inthoka mi san suokin, a hmangai tak, a Naupa rama chun a mi thuoi lut tah a.
14. A Naupa chu ei intlanna le ei suolhai ngaidamna a nih.
15. Krista chu hmu thei lo Pathien angpui, thilsiem po po hmathuoitu a nih.
16. Amaa chun iengkim vana um hai, hnuoia um hai, hmu thei le hmu thei nawhai, lalthungpha hai, rorelna hai, lalna hai, thuneina hai chu siem a ni a; iengkim hi ama lei le ama ta dinga siem a nih.
17. Ama chu iengkim um hmain a um a, amaa chun iengkim an inthlung khawm vong bok a nih.
18. Ama chu kohran lu a na, kohran hi a taksa a ni bok. Ama chu iengkim bul a na, iengkima chunghnung tak a ni theina dingin mithi laia inthoka thonawkna hmathuoitu a nih.
19. Amaa Pathien nina famkim a cheng chu Pathien ditzawng a nih.
20. Krista leiin iengkim Ama leh a'n remtir nawk a, kraws-a a Naupa thisen chun inremna a siem a, Krista lei chun hnuoia umhai le vana umhai chu Ama leh inremin a siem tah a nih.
21. Nangni khom kha hma khan chu Pathien lakah mikhuol niin, thil suol in thaw hlak leiin a hmelma in nih.
22. Tu ruok hin chu, taksa ngei puta Krista a hung thina zarah, a hmaah mi thienghlim, hmelhem lo le soisel boa in um theina dingin, Pathienin Ama leh a'n remtir ta cheu a nih.
23. Chuongchun, ringnaah um zingin, nghet takin ngir unla, Chanchin Tha in hriet leia beiseina in hung nei tah kha intawl hmangsan naw ro. Chanchin Tha chu van hnuoia thilsiem tinreng kuoma puong a ni tah a, kei Paula hi chu rongbawltu chu ka nih.
24. Nangni leia ka tuornaa hin tu hin ka lawm a nih. Kohran ta dinga Kristan a taksaa a tuor bak kha ka taksain ka la sunzom pei a nih.
25. Pathien thu le a remruot in kuoma kim taka puong dingin Pathienin sin a mi pek a, kohran rongbawltuah a mi siem a.
26. Suon po po laka a lo thup kumkhuo hlak thuruk kha, tu hin chu a mi thienghlimhai kuomah a puong tah a.
27. Chuong mihai kuoma chun hnam tin ta dinga a thuruk ropui le hlu tak chu Pathienin Jentelhai kuomah inhriettir a nuom hrim a; chu thuruk chu nangnia um Krista, ropuina in beisei san chu a nih.
28. Ama thu chu kan tlanginsampui a, mi tin el chu Kristaa kan sukpuitling theina dingin kan varna po po hmangin kan keihruoi a, kan inchuktir hlak a nih.
29. Chu sin chu ka hlen suok theina dingin keimaa nasa taka thok Krista hratna chu hmangin, inrim takin ka pu tang tang a nih.
      Colossians (1/4)  →