← Amos (9/9) |
1. | Maichama ngir lai LALPA chun,Ka kuomah hieng hin a hril:"Tempul sutpui ler vaw rak la,Tuong nghor hning dur dur sien la,An lu chungah chim thla sien la,A del hlum mahla pohai chu,Keiman kawlhnamin that ka tih;Pakhat khom suok naw ni hai a,Pakhat khomin pumpel naw nih. |
2. | Mithi khuo chen kuo hreu sien khom,Ka banin pot suok tho ka tih;Van chen hang lawn hai sien khom,Hnuk thla nawk vong tawl ka tih. |
3. | Karmel sipah inbihai sien khom,Pel suokin man tawl ka tih;Tuipui mongah inbihai sien khom,Rulpui thu pein inchuktir ka tih. |
4. | Hmelman salah thuoihai sien khom,Sat hlum dingin thu peng ka tih.Anni chu sukhlum dingin,Ieng lai khom melkai ka tih. |
5. | Lalpa, Iengkim LALPA chun Hnuoi a them a, a'n tui zop a,A sunga chenghan an sun a. Aigupta ram chunga Nile vadungpui,A liena a kiem nawk duok angin,Ram pum chu insangin a tlum. |
6. | Van sangah chengna in a bawl a,Hnuoi hi a in thutah a hmang a,Tuifinrieta tuihai chu ko a,Hnuoi chungah a'n surtir hlak.A hming chu LALPA a nih. |
7. | LALPA chun Israelhai kuomah,"Nangni hi Ethiopia mihai leh,Ka ta din angkhat in ni naw maw?Aigupta rama inthokin Israelhai,Kaftor-a inthokin Filistin mihai,Kir-a inthokin Aram mihai,Ka thuoi suok tawl an naw maw? |
8. | "Lalpa PATHIEN LALPA mit chu,Ram suol chungah a fu a,Hnuoi a'nthokin sukbo ka ta,Jakob sungkuohai ruok chu,An rengin inram naw ning"Ti hi LALPA thu suok a nih. |
9. | "Keima ngeiin thu peng ka ta,Leidara bu an sep ang elin,Hnam danghai laia inthokin,Israelhai chu sep suok ka ta,A mal hlek khom tla dar naw nih. |
10. | Ka mihai laia mi suol po le,'Sietnan mi nang naw ni a,Mi nang teu naw nih' tituhai chu,Kawlhnamin bohmang an tih. |
11. | "Davida bawkte chim chu,Chu ni chun tungding ka ta,A'n awngnahai thol phui ka ta,A chimhai rem thang ka ta,A ngaiin indin nawk ka tih. |
12. | Edom rama hlaa la umhai le,Ka hming puttu hnamhai chu,Anni chun nei nawk an tih" tiinA thaw theitu LALPAN a hril. |
13. | LALPA chun hieng hin a tih:"Busiktuhai le lokeituhai, Grep chingtuhai le sawrtuhaiAn inphahman zat hun ding le,Tlanga inthokin uoiin thar,A hung far thla huou huou a,Muol tina a luong hun ding,Nihai chu a tlung mek ie. |
14. | Saltang ka mi Israelhai chu,Hung thuoi kir nawk tang ka ta;Khaw ram hnung indin tharin,Umhmun khuor thar nawk an tih.Grep huon siema, uoiin dawnin,Huon siemin a ra tlan an tih. |
15. | Phawi dok nawk ta lo dingin,Anni ka pek ngei rama chun,Israelhai chu phun ka tih"Ti hi LALPA Pathien thu suok a nih. |
← Amos (9/9) |