← Amos (7/9) → |
1. | Lalpa PATHIEN chun inlarna a mi'n hmutir a. Khauthikthi honpui a buotsai lai chu ka hmu a. Hi hi lal chanpuol ran bu at hnunga hlo thar a hung mawng nawk hun lai a nih.h |
2. | Khau honin chu rama hlo hna an fak kol rit hnung chun keiin, "Aw Lalpa PATHIEN, ngaidam rawh. Jakob chu a chin tham vei leh, iengtin am dam khawsuok zo a ta?" tiin ka khek a. |
3. | Chuongchun LALPA chu a'n lamlet a. LALPA chun, "An leh, hi thil hi tlung ta naw nih" a ta. |
4. | Lalpa PATHIEN chun inlarna dang a mi'n hmutir nawk a. Lalpa PATHIEN chun mihai hremna dingin mei a ko a, tuipui inthuk tak khom chu a kang hil vong a, ram khom a lem puot puot a. |
5. | Chu phing leh kei chun, "Lalpa PATHIEN, suktawp dingin ka ngen che. Jakob chu a chin tham vei leh iengtin am dam khawsuok zo a ta" tiin ka khek a. |
6. | LALPA chu a'n lamlet a. Lalpa PATHIEN chun, "Hi thil khom hi ni ta naw nih" a ta. |
7. | Chun, hi thil hi a mi'n entir a: LALPA chu bang ngil taka rem bulah a ngir a, a kutin enremna thirmum a chawi a. |
8. | LALPA chun ka kuomah, "Amos, iem i hmu a?" a ta. Kei chun, "Enremna thirmum" ka ta. LALPA chun, "En rawh, ka mi Israelhai lai enremna hi ka sie ding a na, tu khom hla bik nei naw ning. |
9. | Isak hmun sanghai sukram ka ta,Israel hmun thienghlimhai khom,A rengin sukchim ka ta,Jeroboam sungkuo chungah,Ka kawlhnam inlet ka tih" tiin. |
10. | Bethel khuoa thiempu Amazia chun Israel lal Jeroboam kuomah, "Amos hin Israel sungkuohai lai a phierruk che a. A hrilhai po po lem hi chu a ram khomin dawl zo naw nih. |
11. | Amos chun hieng hin a tih:'Jeroboam chu kawlhnamin thing a ta,Israelhai chu salah intang ngei an tih,An rama inthoka hmun hla takah'tiin. |
12. | Amazia chun Amos kuomah, "Aw nang zawlnei, fe la, Judai ram tieng kir nawk la, chu taka chun i fak ding hlaw la, thu hril rawh. |
13. | Bethel khuoa ruok hin chu thu hril nawk ta naw rawh, lal hmun thienghlim le a tempul umna a ni si a" a ta. |
14. | Amos chun Amazia kuomah, "Zawlnei ka ni naw a, zawlnei naupa khom ka ni bok nawh. Kei chu beram vengtu ka ni a, theichang bil khom ka enkol bok hlak. |
15. | Sienkhom, beram ka veng laiin LALPA chun a mi lak a, ka kuomah, 'Fe la, ka mi Israelhai kuomah thu hril rawh' a mi ti a. |
16. | Chuleiin tu hin LALPA thu chu lo ngaithla rawh. Nang chun Israel kal zawng le Isak sungkuo kal zawnga thu hril ta lo dingin i mi ti a. |
17. | Chuleiin, LALPA chun hieng hin a hril: 'I nuhmei chun khawpuiah nawchi zor a ta, i naunu le naupahai chu kawlhnamin thing an ta, i ram chu inkhiin insem dar vong an ta, sakhaw dang bie hnam dang mi ramah nang chu thing i ta, Israel thlahai chu matheiloin an rama inthoka hla takah sala thuoi hmangin um an tih' a tih" tiin a hril a. |
← Amos (7/9) → |