←  Acts (9/28)  →
1. Saula ruok chun Lalpa zirtirhai chu that dingin a vauh zui pei a.
2. 'Lampui' zuitu taphot chu a nuhmei a pasalin mana, Jerusalema a hung thuoi theina dingin Damaska khuoa sunagog hotuhai lekha ding thiempu laltak a va hni a.
3. Damaska pana a fe laiin, a tlung tawm tepin thawk le khatah engin vana inthokin a velin a hung khaw var ta phut a.
4. Ama chu hnuoiah a tla a,p rawlin, "Saula, Saula, nangin ieng dinga i mi sukduda am a na?" a hung ti a hriet a.
5. Ama chun "Lalpa, tu am i na?" a ta. Rawl chun, "I sukduda Isu ka nih.
6. Tuhin tho la, khawpuiah lut rawh, i thaw ding lo hril an ti che" a ta.
7. A fepuihai chu hrilhai takin an ngir a, rawl chu an hriet a, sienkhom tu khom an hmu bok si nawh.
8. Saula chu a hung tho a, a hang meng a, ieng khom a hmu thei ta naw a. Chuongchun, kuta keiin Damaska khuoa chun an thuoi lut a.
9. Ni thum sung khuo a hmu thei naw a, ieng khom fain a dawn bok nawh.
10. Damaska khuoa chun zirtir pakhat a hming Anania a um a. Lalpa a kuomah a'n lar a, "Anania" a ta. Ama chun, "Lalpa, hi taka hin ka um" a ta.
11. Lalpa chun, "Kotthler Tluna um Juda inah fe la, chu taka chun Tarsa mi a hming Saula va'n don suok rawh.
12. Ama chun mi pakhat Anania hung a, a chungah kut innghat a, a mit sukvar dingin a mitthla a, chu ding chun a tongtai zing a nih" a ta.
13. Anania chun, "Lalpa, hi pa hin Jerusalema i mi thienghlimhai chunga poi a tawk nasatzie ripawt tam tak ka dong tah a.
14. Hi taka khom hin i hming lamtu taphot man dingin thiempu lalhaia inthoka thu hmuin a hung a nih" a ta.
15. Lalpa chun, "Fe el rawh. Hi pa hi Jentelhai le an lalhai le Israel mipuihai kuoma ka hming phur luttu dinga ka hmangruo thlang a nih.
16. Ka hming leiin rinum ieng ang am a la tuor ding ama la'n hriettir ka tih" a ta.
17. Chuongchun, Anania chu a suok a, ina chun a va lut a, a chungah kut innghatin, "Unaupa Saula, i mit varna ding le Thlarau Thienghlima i sip theina dingin, i hungna lampuia i kuoma inlar Lalpa Isu khan i kuomah a mi hung tir a nih" a ta.
18. Kar loin a mita inthokin phuhlip ang a tla ta nghal a, a mit a hung var nawk tah a. Chuongchun a tho a, baptisma a chang a.
19. Bu a fak hnungin Saula chun a tha ngai a hung put nawk tah a. Damaskaa zirtirhai kuomah ni iemani zat a cham a.
20. Sunagoga hai chun Isu chu Pathien Naupa a nih ti a hril tan ta nghal a.
21. A thu hril hre taphot chun maktiin, "Hi pa hi Jerusalema Hming lamtuhai sukdudatu kha a ni naw am a ni? Hming lamtuhai chu mana thiempu lalhai kuoma thuoi tumin hi taka khom hin a hung an naw maw?" an ta.
22. Nisienlakhom Saula thu hril chun mi a hung hne deu deu a, Isu chu Mesia ngei a nih ti chieng taka hrilfiein Damaskaa Judahai chu a sel dong hlak a, a sukkahak tawl a.
23. Ni iemani zat hnunga chun Saula chu that tumin Judahaiin an phierruk a,
24. sienkhom an thiltum chu Saulan a lo hriet a. That tumin khawpui inhuonna kul kotkhara chun sun le zanin an inchan a.
25. Nisielakhom, zirtirhaiin ama chu an thuoi a, zana chun bawmin kul bang puo tieng chun an thlak thla a.
26. Saulan Jerusalem a hung tlung chun zirtirhai laia thang ve a tum a, anni ruok chun zirtir a ni ve an ring thei naw a, an rengin an ti hle a.
27. Nisienlakhom, Barnaba chun ama chu tirkohai kuomah a fepui a, lampuiah Lalpa a hmu a, Lalpan ama a biek thu le Damaskaah Isu hming huoi taka a hril thuhai dam chu a hril tawl a.
28. Chuongchun, Saula chu anni lai chengin, Lalpa hming chu huoi taka hrilin Jerusalema chun zalen takin a'n vak vel a.
29. Grik tong hmang Judahai kuomah thu a hril a, a'n selpui a, anni chun that an tum a.
30. Unauhaiin chu chu an hrietin Kaisari khuoah an thuoi thlak a, Tarsa khuo tieng an infetir tah dai a.
31. Chuongchun, Judai ram, Galili ram le Samari ram pumah kohran mihai chu muong takin an khawsa a, Thlarau Thienghlim chun sukhratin a sukphur tawl a, Lalpa chu ti deka umin, an hung pung tah deu deu a.
32. Peter inzin vel chun Lida khuoa mi thienghlimhai a zu sir a.
33. Chu taka chun mi pakhat Ainia, a zeng leia kum riet lai khuma zal tah chu a hmu a.
34. Peter chun a kuomah, "Ainia, Isu Krista chun a sukdam ta che, tho la, i khum kha siem fel rawh" a ta. Chuongchun, a tho tah nghal a.
35. Lida le Saron phaia um po po chun Ainia chu an hmu a, Lalpa tieng an ngha tawl tah a.
36. Chun, Jopa khuoah zirtir pakhat Tabithaq a um a, a Grik hming chu Dorka a na, a umzie chu "sazuk la tuoi' tina a nih. Chu nu chu thil tha thawa inhmang mi le retheihai thangpui hlaktu a nih.
37. Chuong lai chun ama chu a damnaw a, a thi el tah a, an insil fai a, pindan chunghnungah an inzal a.
38. Lida chu Jopa khaw bul ela um a na, Lida khuoah Peter a um ti zirtirhaiin an hriet chun lunginsiet taka hung nghal dinga ngen dingin mi pahnih an tir a.
39. Peter chun anni chu a zui a, in a tlung chun pindan chunghnungah an thuoi a, hmeithai po po chu a bulah an ngir a, an tap a, a dam laia Dorkain zakuo le thuomhnaw a siemhai chu an inentir a.
40. Peter chun an rengin a'n suoktir a, dingthathuonin a tongtai a, a ruong tieng chu nghain, "Tabitha, tho rawh" a ta. Chuongchun, Tabitha chu a hung meng a, Peter chu a hmu a, a hung thung suok a.
41. Peter chun a banah a chel a, a kei tho a, ringtuhai le hmeithaihai chu a ko a, damin an kuomah a hung thuoi a.
42. Chu chu Jopa khuoa mi po poin an hriet a, mi tam takin Pathien an ring a.
43. Peter chu Jopa khuoa chun savun siemtu Simon inah a tlung a, ni tam tak a cham a.
←  Acts (9/28)  →