←  Acts (7/28)  →
1. Chun, thiempu laltak chun, "An hekna che hi a'n dik am?" tiin a'n don a.
2. Stefan chun, "Unauhai le pahai, lo ngaithla ro. Ei pu Abraham chu Haran khuoa a um hmaa Mesopotamia rama a cheng lai khan, ropuina Pathien chu a kuomah a hung inlar a.
3. I ram le i mihai maksan la, ram ka la'n entir ding che tieng chu pan rawh' tiin a hril a.
4. Chuongchun, Kaldai rama inthokin a suok a, Haranah umhmun a khuor a. A pa thi hnungin chu taka inthok chun tuta ei chengna rama hin Pathienin a thuoi lut a.
5. Pathien chun ram hluo ding kepha bok tiet khom a pek nawh. Amiruokchu, Abraham chu nau nei lo a la ni zing laiin, ama le a thlahai kuomah hi ram hi pek a tiem a.
6. Pathienin hieng ang hin a hril a nih: 'I thlahai chu mi ramah la mikhuol an ta, kum zali lai mi bawiah umin, sukdudain um an tih.
7. Bawia siemtu ding hnam chu keima ngeiin la ngaituong ka ta; chu hnunga chun suok an ta, hi hmuna hin ka rong la bawl an tih' a ta.
8. Pathienin Abraham kuomah sertan thu kha a thlung a. Chuong ang tak chun nau pasal Isak a nei khan ni riet niah a ser a tanpek a. Isak chun nau pasal Jakob a nei a, Jakobin nau pasal sawmpahni, ei thlatuhai kha, a nei a.
9. "Thlatuhai khan Josefa chu an thik leiin Aigupta ram tieng salin an zor a; nisienlakhom Pathien a kuomah a um a,
10. a rinum tuor po poa inthokin a san suok pei a. Josefa chu varnain a'n thuom a, Faraw ditsakna hlaw theiin a siem a, Aigupta ram le lal insunga hotuah a siem a.
11. Chun, Aigupta le Kanan ram pumah tam a hung tla a, an tuor nasa hle a, ei thlatuhai chun fak ding hrim an nei ta naw a.
12. Aigupta ramah fak ding a um ti Jakobin a hriet chun ei thlatuhai chu a tir suok a, chu chu an fe hmasakna tak a nih.
13. An fe voi hninaa chun Josefa chu a unauhai kuomah an puong suok a, Faraw khomin Josefa sunghai chu a hriet ve tah a.
14. Chuongchun, Josefa chun a pa Jakob le a unauhai po po chu a'n kotir a, an rengin sawmsari panga vel an nih.
15. Jakob chu Aigupta ramah a zu fe a, chu taka chun ama le ei thlatuhai chu an thi a,
16. an ruong chu Sekem khuo chen an zawn tlung a, Abrahamin Sekem khuoa Hamor nauhaia inthoka tangka suma an chawk thlana chun an phum a.
17. "Abraham kuoma Pathien thutiem kha a tlung ding lai chun eini mihai chu Aigupta ramah an pung hrat em em a, an tam ta hle a.
18. Aigupta rama chun lal dang, Josefa hre lo, a hung inlal a.
19. Ama chun ei chipuihai chu dawhain a thaw a, a sukduda a, thawluinain an nautehai chu thi dingin a'n peitir pei a.
20. Chuong lai chun Mosie a hung pieng a, Pathien mithmuah naute ditum tak a na, anni inah thla thum sung chu an umpui a;
21. an ina inthoka an sie suok hnungin Faraw naunuin a lak a, ama nau dingin a nei tah a.
22. Mosie chu Aigupta ram varna po po a'n chuktir a, thu le hla thiem le mi thilthaw thei tak a hung ni tah a.
23. "Mosie chu kum sawmli a niin a unau Israel nauhai chu kan tulin a hriet a.
24. A va kan chun Aigupta miin anni laia pakhat a lo sukduda lai a hmu a, a san a, phuba a lakpek a, a sukdudatu chu a that tah a.
25. Mosie chun Pathienin ama kut hmangin a unauhai chu a san suok ding ti chu a mihaiin an hriet amani a sawn a, sienkhom an lo hriet si naw a.
26. "A zinga chun Israel mi pahni insuol lai chu Mosien a hmu a, thel tumin, "Puhai, unau in ni kha, ieng leia insuknat in tum am a na?" a ta.
27. A soisatu lem chun Mosie chu a nam leng a, "Kan chungah hotu le roreltuah tuin am a sie che?
28. Zani ta Aigupta mi i sukhlum ang khan mi sukhlum ve i tum a ni maw?" a ta.
29. Chu thu lei chun Mosie chu a tlan hmang a, Midian ramah sawt tak a va thang a, chu taka chun nau pasal pahni a nei a.
30. "Chun, kum sawmli an voi hnungin thlaler hmun Sinai tlang bulah chimbuk chok hmangin a kuomah vantirko a'n lar a.
31. Mosien a thil hmu chu mak a ti em em a. En chieng tuma a va pan hnai chun Lalpa rawlin,
32. "Kei hi i thlatuhai Pathien, Abraham hai, Isak hai, Jakob hai Pathien chu ka nih' a hung ti a. Mosie chu tiin an thin a, a en ngam ta naw a.
33. Lalpa chun a kuomah, 'I pheikhok kha hlip rawh, i ngirna kha hmun thienghlim a nih.
34. Aigupta rama ka mihai an sukrimsikzie ka hmu zing a, an inrum ri khom ka hriet zing a, anni thuoi suok dingin ka hung tum a nih. Hung ta, Aigupta ramah tir kir ka ti che' a ta.
35. "Chu Mosie, 'hotu le roreltuah tuin am a siem che' tia an hnawl ngei chu, Pathienin hotu le sansuoktu dingin, chimbuka a kuoma inlar vantirko hmangin a hung tir tah a nih.
36. Ama chun anni chu a thuoi suok a, Aigupta rama dam, Tuipui Sena dam, thlalera dam kum sawmli sung thilmak le inchiknahai thawin a thuoi a.
37. Chu Mosie chu annawm Israel nauhai kawla, 'Pathienin keima ang in unauhai laia mi zawlnei la siempek a ti cheu' titu kha.
38. Ama chu a nih ei thlatuhai, thlalera pung khawmhai laia thang ve le Sinai tlanga a betu vantirko kuoma inthoka einihai kuoma inhlan sawng pei ding thu hringhai dongtu kha.
39. Ei thlatuhai chun a thu an zawm nuom naw a, an hnawl a, Aigupta tieng kir nawk an nuom a.
40. Aron kuomah, 'Aiguptaa inthoka mi thuoi suoktu Mosie hlak hi iem a chang tah ti khom kan hriet si nawh, kan hma thuoitu dingin pathienhai mi siempek rawh" an ta.
41. Chuongchun, bawngte lem an siem a, milem kuoma chun inthawina an inhlan a, anni kuta siem chawimawina dingin lawmna an siem a.
42. "Chuongchun, Pathienin anni chu a nghatsan a, vana arasihai be dingin a pek suok tah a; zawlnei lekhabua,'Aw, Israel, thlalera khan kum sawmli sung,Inthawina ran in mi'n hlan hlak am?
43. Molok puon in le in pathien Refan lim Arasi chu zawnin chibai in buk kha; Chuleiin, Babulon khel ramah,Intangtir ka ti cheu'lti ziek ang khan.
44. "Ei thlatuhai chun thlalera khan Pathien chengna puon in an nei a, chu chu Mosie kuoma Pathienin siem dan ding a hril le a lim a'n entir anga siem a nih.
45. Chu Pathien bawkte ngei chu ei thlatuhaiin an som pei a, Pathienin Jentelhai a hnotsuokpek hnunga Josua rawia Kanan ram an hung hluo khan an somlut pei a, Davida hun chen khan a um ta zing a.
46. "Davida chun Pathien ditsakna a dong a, Jakob Pathien ta dingin in bawl phalna a hni a,
47. sienkhom Solomonin a bawlpek ta lem a.
48. Amiruokchu, Chunghnungtak ruok chu kuta bawl inah a um ngai nawh; zawlneiin,
49. Lalpan, 'Van ka lalthungpha a na,Hnuoi ka ke innghatna a na,In ieng am mi bawlpek in ta ?Ka chawlna hmun ding khom khaw lam?
50. Hieng po po hi ka kuta siem An ni vong an naw am a ni?'m a tih tia a hril ang khan.
51. Mi kawmaw, lungril le naa sertan ve lohai, in thlatuhai ang bokin nangni khomin Thlarau Thienghlim chu in kal rop hlak.
52. In pi le puhaiin zawlnei suknomnat lo hrim tu am an nei a? Mi Fel Tak hung ding hrillawktuhai kha an that a; nangni hi tuta Ama inmantirtu le thattuhai chu in nih.
53. Vantirkohai hmanga pek Dan dongtu in na, sienkhom in zawm nuom si nawh" a ta.
54. Chuong thu chu an hrietin an lung a khei hle a, lungsenin ha an rawt a.
55. Nisienlakhom, Stefan chu Thlarau Thienghlimin a sip a, van tieng a thlir zing a, Pathien ropuina le a chang tienga Isu ngir a hmu a.
56. "Ngai ta u, van inhong ka hmu a, Pathien chang tienga Mihriem Naupa ngir khom ka hmuh" a ta.
57. Anni chun na hupin, inring taka khekin, Stefan chu an bei hron a,
58. khuoa inthokin an hnuk suok a, lungin an deng a. Thuhretuhai chun an puon chu tlangval pakhat Saula an ti ke bula chun an deng khawm a.
59. Lunga an deng mur mur lai chun Stefanin "Lalpa Isu, ka thlarau la rawh" tiin a tongtai a.
60. Chuongchun, a dingthathuon a, "Lalpa, an thil suol thaw maw hi an chungah intlaktir naw hram rawh" a ta. Chu chu a hril zoin a in innghil tah a.
←  Acts (7/28)  →