←  Acts (5/28)  →
1. Mi pakhat Anania le a nuhmei Safira khomin an ram an zor ve a,
2. a nuhmei hrietpuiin Anania chun anni ta dingin an ram man iemani zat chu a sie tha a, a dang po chu tirkohai kuomah a hung inhlan a.
3. Nisienlakhom Peterin, "Anania, Thlarau Thienghlim hlem ding le ram man a then ip dingin ieng leia Setanin i lungril a hluo am a na?
4. I zor hma khan i ta a na, i zor hnung khomin a man chu i thu thua i thaw ding a ni naw maw? Iengti dana hieng ang thil thaw dinga lungril i put am a na? Mihriem hlem i ni naw a, Pathien hlem i ni lem" a ta.
5. Anania-in chuong thil a hriet chun a tlu a, a thi ta nghal a. A hre taphotin an ti tah em em a.
6. Tlangvalhai an hung a, an tuom a, an zawn suok a, an phum tah a.
7. Darkar thum vel hnungah a nuhmei chu thil umzie hre der loin a hung lut ve a.
8. Peter chun a kuomah, "Mi hril rawh, ram man chu hieng zat char hi maw in lak?" a ta. Ama chun, "Ni e, hieng zat char hi" a ta.
9. Peterin, "Iem a ta Lalpa thlarau fie tuma in inthuruol? En rawh, i pasal phumtuhai khomin kotkhar bul an hung tlung ta saw; nang khom zawn suok veng an ti che" a ta.
10. Chu char chun a ke bulah a tlu a, a thi ve ta nghal a. Tlangvalhai chu an hung lut a, ama chu thiin an hung hmu a, an zawn suok a, a pasal bula chun an phum ve tah a.
11. Kohran po po le chuong thu hre taphot chu namen loin an ti a.
12. Tirkohai chun mipui lai inchikna thilmak tam tak an thaw pei a. Anni rawi chu lungruol takin Solomon tuolpuka chun an inkhawm hlak a.
13. Mihaiin an ngaisang hlea chu tu khom anni lai an thang ngam hri nawh.
14. Chuong sa khom chun, anni hung belsatu Lalpa ringtu chu a nuhmei a pasalin an hung pung tuol tuol a.
15. Chuongchun, Peter inlon vel hlim bekin a hlie beiseiin mihai chun an damnawhai chu kotthlerah an zawn suok a, khum le zampherah an inzal thlek thluk a.
16. Jerusalem se vela inthok khomin mi an hung a, damnawhai le ramhuoi tirdakum manhai chu an hung thuoi a, chuonghai po po chu an hung dam ta vong a.
17. Chun, thiempu laltak le a thawpuihai po po, Sadukai pawla mihai chun an thik em em a.
18. Chuongchun an man a, vantlang lung inah an khum a.
19. Nisienlakhom, zanah Lalpa vantirko pakhatin lung in korkhar chu a hung hong a, a thuoi suok a.
20. "Fe unla, tempulah va ngir unla, mipuihai kuomah hringna thu le a umzie po po hi va hril ta ro" a ta.
21. Hrila an um ang chun an fe a, vartienah tempulah an lut a, mi an inchuktir a. Thiempu laltak le a thawpuihai an hung tlung chun Israelhai rorelna inpui Sanhedrin inkhawm an ko nghal a, tirkohai chu lung ina inthoka va thuoi dingin mi an tir a.
22. An mi tirhai chu an fe a, sienkhom lung inah anni chu an hmu si nawh.
23. An hung kir nawk a, "Lung in chu him taka inkharin, a vengtuhai khom kotkhar bula ngir kan hmu a, nisienlakhom kan hang hong a, a sungah tu khom kan hmu nawh" tiin an hung ripawt a.
24. Tempul pulis hotu le thiempu lalhaiin an hriet chun, "Ieng ti lei am ning a ta aw?" tiin an buoi hle a.
25. Chuong lai chun mi pakhat a hung a, "Ngai ta u, lung ina in mi khumhai khan tempula son mi an zirtir zing annawm" a hung ta.
26. Tempul pulis hotu chu a rawihai leh an va fe a, tirkohai chu thawluina thang loin an hung thuoi a, an man lui chun mipuiin lungin an deng an ti si a.
27. An hung thuoi tlung chun Sanhedrin hmaah an inngirtir a.
28. Thiempu laltak chun an kuomah, "Hi hminga inchuktir ta der lo dingin thu khauh takin kan pek cheu a. Sienkhom, in thu zirtirin Jerusalem a sip tah a, hi p� thisen maw hi kan chungah intlaktir tep tep in tum a ni hi" tiin an suosal a.
29. Peter chun, "Mihriem thu nekin Pathien thu kan zawm lem ding a nih.
30. Thinga khai kanga in sukhlum tah Isu kha ei thlatuhai Pathien chun a keitho nawk tah a.
31. Israelhai chu an suol insimtira a ngaidam theina dingin ama ngei kha Pathienin lal le sandamtu ni dingin a chang tieng a chawimawi tah a.
32. Chuong thilhai hrepuitu chu keini le a thu zawmtuhai kuoma Pathienin a pek Thlarau Thienghlim chu kan nih" tiin a don a.
33. Chuong chu an hrietin an lung a khei hle a, tirkohai chu sukhlum an tum a.
34. Nisienlakhom, Farisai pakhat, a hming Gamaliel, Dan zirtirtu, mi po po ngaisang chu Sanhedrina chun a ngir a, tirkohai chu insuoktir vak dingin anni vengtuhai chu a hril a.
35. Roreltuhai kuoma chun, "Israel mihai, hieng mihai chunga in thilthaw tuma hin fimkhur ro.
36. Kha hma deu khan Theuda chu mi ropui tak nia insalin a hung a, mi zali velin an zui a. Ama chu an that a, a zuituhai khom an indar vong a, ieng khom an ni ta nawh.
37. Chu hnung chun, intiempui lai khan Galili rama mi Juda kha a hung nawk a, ama khomin mi a hip hle a. Nisienlakhom, ama khom an that a, a zuituhai po po khom an indar nawk vong a.
38. Chuleiin, tuhin ka hril cheu hi, hieng mihai hi tawk naw ro, inumtir mei mei ro. Hieng an thil thaw tum le an thilthawhai hi mihriema inthoka suok a ni chun bo nawk el a tih.
39. Pathiena inthoka suok a ni ruok chun dang thei naw ti niu; Pathien dodal ni lem hlauh rawi in tih" a ta.
40. Chuongchun, a thu chu an zawm a, tirkohai chu an ko a, an vuok a, Isu hminga thu hril ta der lo dingin thu an pek a, an insuo tah a.
41. Zirtirhai chu Sanhedrina inthok chun an suok a, Hming leia muolphona tuor tlaka ruot an ni leiin an lawm hle a.
42. Isu chu Krista a nizie thu ni tinin tempul le in tieng inchuktir le puong dar an ma chuong nawh.
←  Acts (5/28)  →