←  Acts (3/28)  →
1. Chawhnung dar thum tongtai hun pangngaiah Peter le Johan chu tempulah an hang fe a.
2. Pa pakhat, a pieng tira inthoka kebai hi an hung zawn a, ama chu tempula fehai kuoma kut lo daw dingin kotkhar 'Mawi' an ti bula chun ni tin an sie hlak a.
3. Ama chun Peter le Johan, tempula an lut tawm tep chu a hmu a, kut a lo daw a.
4. Peter le Johan chun ama chu chieng takin an en a. Peter chun a kuomah, "Mi hang en ta" a ta.
5. Ama chun iemani dong beiseiin a hang en a.
6. Peter chun, "Tangka le rangkachak ka nei nawh. Nisienlakhom, ka nei ve chu peng ka ti che: Nazaret Isu hmingin lawn ta rawh" a ta.
7. A kut chang tienga chelin a keitho a, a ke le a kemithai chu an hung hrat ta nghal a.
8. Chuongchun, ama chu a'n chawm tho a, kein a ngir a, a lawn tah a. Lawn le inchawm pei puma Pathien inpakin tempula chun anni ruolin a lut ve tah a.
9. Mipui po poin kea a lawn le Pathien a'n pak an hmu chun,
10. tempul kotkhar Mawi bula kutdaw thung hlak kha a nih ti an hriet si a, a chunga thil tlung chu maktiin a ngaina hrim an hriet nawh.
11. Chun, ama chun Peter le Johan a la chel zing laiin mipui makti chu Solomon tuolpuk an tia chun an hung tlan khawm a.
12. Chu chu Peterin a hmu chun an kuomah, " Israel mihai, hi hi ieng leia mak in ti? Hi pa hi kan lunginsiet leia kan thilthawtheinaa kan inlawntir anga ngai ni awm hiela ieng dinga in mi en am a na?
13. Abraham Pathien, Isak Pathien, Jakob Pathien, ei thlatuhai Pathien chun a siehlaw Isu a chawimawi tah a ni hi. Ama chu sukhlum dingin in pek suok a, Pilatin insuo dinga a rel khomin in hnawl tlat a ni kha.
14. Mi thienghlim le fel tak kha in hnawl a, suomhmang insuopek lem dingin in ngen a.
15. Hringna petu chu in that a, nisienlakhom Pathienin ama chu mithi laia inthokin a keitho nawk tah a, chu thu hrepuituhai chu kan nih.
16. Hi p�, in hmu le hriet hlak hi Isu hming ringna leiin, chu hming lei tak chun sukhratin a um a, Isu ringna lei chun, hi p� hi in hmu ngeiah, a hung dam ta var a ni hih.
17. "Tuhin unauhai, nangni le in hotuhai thilthaw kha thil in hriet naw lei a nih ti ka hriet.
18. Kristan a tuor ding thu Pathienin zawlnei po po hmanga a lo hril lawk kha hieng ang hi a lo intlungtir dan chu a nih.
19. Chuleiin, in suolhai sim unla, Pathien tieng ngha kir unla, chuongchun in suolhai chu hru fai a ta,
20. Lalpa kuoma inthoka har tharna hun chu hung tlung a ta, in ta dinga Mesia a ruot, Isu ngei chu, hung tir a tih.
21. Amiruokchu, Pathienin a zawlnei thienghlimhai hmanga tiena inthoka iengkim siem tharna hun hung tlung ding a lo tiem chu a tlung hma chun ama chu vanah a um hri ding a nih.
22. Mosie khomin, 'Lalpa in Pathien chun keima ang in unauhai laia inthokin zawlnei pakhat in ta dingin hung indin suok a ta, a hril taphot cheu chu zawm ro.
23. Tu khom ama thu ngai nawtu taphot chu a mihai laia inthoka sat thlak ning a tih'g a ti kha.
24. Samuel le a hnunga zawlnei po po khom khan tu lai chanchin hi a nih an lo hril lawk chu.
25. "Nangni hi zawlneihai le in thlatuhai kuoma Pathienin thu a lo thlung tahai po po rochungtu chu in nih. Abraham kuomah, 'I thlaa chun khawvel hnam tinin hamthatna dong an tih' a ti kha.
26. Chuongchun, Pathienin a siehlaw a kei tho phing leh, ritlona lampuia inthoka thuoi kir ding cheu le malsawm ding cheuin in kuomah a hung tir hmasa a nih" a ta.
←  Acts (3/28)  →