Acts (27/28)  

1. Italy ram tieng longa fe danding an rel fel charin Paula le tang danghai chu Awgasta Sipai Pawl an tia sipai zahotu Julio kutah an sie a.
2. Adramitimaa inthokin tuifinriet kam Asia rama long chawlna khuo umhai sira inzin ding longa chun kan chuong a, kan fe tah a; Makedonia rama Thesalonika khaw mi Aristarka chun a mi zui a.
3. A zinga chun Sidon kan tlung a, Julio chu Paula chungah ngil a nei hle a, a ruolhai kuomah leng a, a chakkhai khom lam a phalpek a.
4. Chu taka inthoka longa fe peiin, thliin naw tieng a mi baw leiin Kupra thlierkar phen, thli inupna tieng kan pan a.
5. Kiliki ram le Pamfuli ram dep tuipui kan khel hnungin Lukia rama Mura khuo kan tlung a.
6. Chu taka chun Aleksandra khaw long, Italy pana fe ding chu sipai zahotun a hmu a, chu longa chun a mi'n chuongtir a.
7. Ni tam tak damten kan intawl a, harsa takin Nido khaw zawn kan tlung hram a. Thliin a mi dangkir leiin Kret thlierkar phen, thli inupna tieng kan hel kuol a, Kret thlierkar hmor zum Salmoni an ti chu kan pel a.
8. Harsa takin va kam hrul kan hrut a, hmun pakhat Chawlna Mawi an ti chu kan tlung a, chu chu Lasai khaw bula um a nih.
9. Hun kan khawral rawn tah a, Bunghei Hunc a pel tah hiel a, tuipuia inzin a ti-um tak leiin Paulan thurawn a pek a,
10. an kuomah, "Puhai, tuta ei fe pei chun sietna rapthlak tak ei tuok ding a nih ti ka hriet a; long le a thuomhnaw phur chauh ni loin longa chuonghai ta ding khoma bohmangna tlung a tih" a ta.
11. Nisienlakhom, sipai zahotu chun Paula thu hril nek chun longpu le long neitu thu chu a lak lem a.
12. Thlasik tuorna dingin chu long chawlna chu a remchang naw leiin, fe suok a, Foiniki khuo tlung hram a, chu taka thlasik tuor chu mi tam lemin an nuom a. Foiniki khuo hi Kret thlierkara long chawlna pakhat, sim thlang le hmar thlang ngha zawnga um a nih.
13. Sim thli damten a hung hrang hieu hieu a, an dit ang tak hmuah an inngai a, an thirchakaihai chu an khai suok a, Kret thlierkar kam dep chu hrutin kan suok a.
14. Nisienlakhom, sawt naw teah, khawmuol tienga inthokin thlipui na tak a hung hrang ta phut el a, chu thlipui chu Eurokuilod an tih.
15. Thlipui chun long chu a hung nuoi vir nok a, thli tieng nor dinga long lu hang kar her ruol a ni naw leiin kan inthla a, a mi fen a mi fen el ta a.
16. Thlierkar chite, Klauda an ti phen, thli inupna tieng chun a mi fen lut a, harsa takin longleng chu kan hum thei hram a.
17. Longa chun longleng chu an khai lut a, a koi dar nawna dingin hruiin an vet bur a. Libya ram tieng kam, Sirti tieudupa len lut an inlau leiin long puonzarhai chu an kei hnuoi a. chuongchun a mi fen a mi fen nawk tah a.
18. Thli le tui fawn chun a vor zing leiin a zinga chun long thuomhnaw phurhai chu an pei suok tan a.
19. Ni thum ni chun anni kut ngeiin long hmangruohai khom an pei suok nawk tah a.
20. Ni sawt tak chu nisa le arasihai a'n lang naw a, thli chun nasa takin a mi nuoi zing a, dam hrim kan inbeisei ta nawh.
21. Bu fa loa ni tam tak kan um hnung chun anni lai Paula chu a ngir a, "Puhai, ka thu kha awiin Kret thlierkara inthok khan suok naw inla chu hieng ang sietna le inhmangna hi ei tuok naw ding a ni bah.
22. Nisienlakhom, tuhin thlamuong taka um dingin ka ngen cheu a nih. Nangni lai tu khom thi naw ti niu; long ruok hi chu a se ding a nih.
23. A ta ka ni a, a rong ka bawl hlak Pathien chun vantirko pakhat voizan khan a hung tir a, ka bulah a hung ngir a,
24. Paula, ti naw, Kaisar hmaah i ngir ding a nih. Ngai ta, longa i'n zinpuihai kha nangma leiin Pathienin a hum ding a nih' a hung ti a.
25. Chuleiin, uauhai, thlamuong takin um ro. Pathien ka ring a, a mi hril ang chun tlung ngei a tih.
26. Thlierkar khaw lai amanih a mi len suok ding a nih" a ta.
27. Zan sawm le zan lina, thliin Adriatic Tuipuiae a mi len phei zing lai chun longpuhaiin khawmuol khaw lai amanih tlung dingin an inhriet a.
28. Tui inthuk dan an hang inkhi chun hlam sawmhnia inthuk niin an hriet a, sawt naw te hnunga an hang inkhi nawk chun hlam sawmpangaa inthuk a ni tah a.
29. Lung kawhrot hmuna len lut an inlau leiin long mei tieng chun thirchakai pali an thlak a, khaw var kar an nghakhla hle a.
30. Long mihai chun an long chu tlansan an tum ruk leiin long lu tieng chun thirchakai thlak tum ni awm takin longleng chu tuipuia chun an thlak thla a.
31. Chu phing leh Paula chun sipai zahotu le sipaihai kuoma chun, "Hienghai hi longa an um zing naw chun him thei naw ni hai" a ta.
32. Chuongchun, sipaihai chun longleng hrui chu an sat tan a, an inlen hmangtir tah a.
33. Khaw var ding tepin Paula chun longa chuong po po chu bu fa dingin a ngen a, "Voisun hi ieng khom fa loa in umna ni sawm le ni lina a ni tah a.
34. Chuleiin, bu fa dingin ka ngen cheu a nih, in damna dingin; nangni lai tu khom sam zai pakhat khom inhmang naw ti niu" a ta.
35. Chuong thu chu a hril zoin bei a lak a, an renga hmaa chun Pathien kuomah lawmthu a hril zoin a khoi a, an fak tan tah a.
36. Chuongchun, an rengin thlamuong takin an fak a.
37. Longa chuong chu kan rengin zahni sawmsari parukf kan nih.
38. An fak khop vong hnung chun long sukzangna dingin an bu phurhai chu tuipuiah an pei suok nawk tah a.
39. Khuo a hung var chun an hriet ngai lo khawmuol an hmu a, chu taka litengsawla chun khal lut a, tieuphoa chun long chu innghat an tum a.
40. Chuongchun, thirchakai hruihai chu an sat tan a, tuipuiah an maksan a; chu ruol chun a kar herna khuopnahai chu an sut a, hma tieng puonzar chu thli mut ding zawngin an khai sang a, tieupho chu an pan tah a.
41. Nisienlakhom, tui zang khauh pahni infinnaah kan lut a, long chu tieudupah a vor lut a, long hn�r tieng chu sukchang ruol lo khopin an tauh lut bur a, a'n tang tlat a. Long mei tieng chu tuifawnin a a vawr nasat leiin a koi tan a.
42. Sipaihai chun tanghai chu that vong an rot a, inhlieu kai dam um an ta, tlan hmang an tih ti an inlau lei a nih.
43. Sipai zahotu chun Paula sanhim a nuom leiin an thil rot chu a khap a, tui inhlieu thiem taphot chu tuipuiah inchawm thla a, khawmuola lo kai hmasa ding le
44. mi dang po po chu thingphek chung amani long koi har phek chung amani chuonga kai dingin thu a pek a. Chuong ang chun kan rengin khawmuolah him takin kan kai ta vong a.

  Acts (27/28)