Acts (26/28)  

1. Agripa chun Paula kuomah, "I thiemthu hril thei i tih" a ta. Chu phing leh Paula chun kut a phar a, a thiemthu a hril tan a.
2. "Lal Agripa, voisun hin i hmaah Judahai mi hekna po poa ka thiemthu hril ding ka ni leiin vangnei ka'n ti hle.
3. Abikin, Judahai khawsak dan le an inkhing hlak danhai hre chiengtu i ni leiin vangnei ka'n ti zuol. Chuleiin, dawthei taka ka thu hi mi ngaithlapek dingin ka ngen che.
4. "Tlanglakte ka nia inthoka kan ram tieng le Jerusalema ka khawsak dan chu Judahai po poin an hriet a.
5. An mi hrietna a sawt tah a, an hril nuom lem chun, kan sakhaw pawla khermei tak Farisai pawla mi ka ni thu khom hril thei an ti che.
6. Kan thlatuhai kuoma Pathien thutiem chu hlen a ni ngei beiseitu ka nina chungthuah tu hin rorelna hmaah ka ngir a ni hi.
7. Chu thutiem chu hlen a ni beiseiin kan hnam sawm le pahnihai chun thahnemngai takin sun le zanin Pathien rong an bawl hlak a. Aw lal inzaum tak, chuong ang beiseina lei chun Judahaiin an mi hek a nih.
8. "Pathienin mithi a keitho thei ti hi thil ni thei loah ieng dinga in ngai am a na?
9. Kei ngei khomin Nazaret Isu hming dodal zawnga thei tawp suoa thang dingin ka lo inngai hlak a.
10. Chuong ang chun Jerusalemah ka thaw hlak a, thiempu lalhaia inthoka thu lain, mi thienghlim laia mi tam tak lung inah ka khum a, sukhlum dinga an rel khomin ka remtipui hlak a.
11. Sunagog tinah anni rawi chu hrem dingin ka fe a, Pathien hming inhrilsiettir dingin ka nor lui hlak a, anni rawi do chu ka'n vet chilh leiin ram dang khuo chen chenah fein ka sukduda tawl hlak.
12. "Chuong anga thaw ding chun thiempu lalhaia inthoka thu hmu le an lekha chawiin Damaska ka pan a.
13. Chuongchun, Lal Inzaum tak, sun chang lai hi a na, lampuia kan fe lai chun vana inthokin var, nisa neka var lem, ka hmu a, chu chun kei le ka fepuihai chu a mi hung kap a.
14. Hnuoiah kan tla thla vong a, rawlin Aramik tongin, 'Saula, Saula, ieng dinga i mi sukduda am a na? Hawlna hmol zum kheng hi i ta dingin a na thlawn chauh a nih' mi hung ti hin ka hriet a.
15. "Kei chun 'Lalpa, tu am i na?' ka ta. Lalpa chun, "Isu, i suknomnat hi ka nih.
16. Tuhin tho la, ngir rawh. Ka rongbawltu le hrepuitua ruot ding chein i kuomah ka hung inlar a nih. I mi hmu thu le thil ka la'n entir ding che chu mihai i hril ding a nih.
17. I mihai le Jentelhai lakah san suok ka ti che a, an kuomah tir ka ti che,
18. kei an mi ring leia an mithai sukvara um a, thima inthoka var tieng innghattirtu ding le an suolhai ngaidama um a, sukthienga um tahai lai hmun chang ve thei dinga Setan thuhnuoia inthoka Pathien tieng innghattirtu ding chu i nih' a mi ti a.
19. "Aw Lal Agrippa, chu taka inthok chun vana inthoka hung inlar thu chu ka sel thei ta naw a nih.
20. Chuongchun, Damaska mihai kuomah hril tanin Jerusalema mihai kuoma dam, Judai rama mi po po le Jentel mihai kuoma dam sima Pathien tieng ngha ding le an sim takzet ti thilthawa inlangtir dingin ka zirtir a.
21. Chu lei chun tempula ka um laiin Judahan an mi man a, mi that an tum a.
22. Nisienlakhom, Pathienin a mi thangpui leiin voisun chen hin mi lien le mi chinhai hmaah thu hrilin ka la ngir thei a ni hi. Zawlneihai le Mosien thil hung tlung ding an hrilhai bak ieng khom ka hril nawh.
23. Krista chun tuor a ta, mithi laia tho hmathuoitu ning a ta, Judahai le Jentelhai kuomah var thu inhriettir a tih' tia an hril bak chu ieng khom ka hril nawh" a ta.
24. Chuonga a thiemna thu a hril lai chun Festan rawl inring takin, "Paula, lungril pangngai i put ta naw a ni hi! I thil inchuk tamin a sukvet ta che a nih" a ta.
25. Paula ruok chun, "Festa inzaum tak, ka'n vet nawh. Ka thu hril hi a'n dikin pom tlak a nih.
26. Hieng thil hi Lal Agrippa khomin a hriet a, a kuomah intim der loin ka hril a ni hi. Hieng thilhai hi a ieng khom hriet hmai a nei der nawh ti ka hriet, a ruka thaw ieng khom a um si naw a.
27. Lal Agrippa, zawlneihai thu i ring am? I ring ti ka hriet" a ta.
28. Agrippa chun Paula kuomah, "Sawt naw te sunga Kristiena mi'n hmin thei in ring a ni maw?" a ta.
29. Paula chun, "Sawtin sawt naw sien, nang chauh ni loin, voisuna ka thu hretuhai po po khom hi keima anga um dingin Pathien kuomah ka hni a nih, kol ruok hi chu bun ve loin" a ta.
30. Lal Agrippa le Larsap Festa le Berniki hai chu an thungpuihai leh an tho a.
31. An suok lai chun inbe tuoin, "Hi pa hin thina khop le intangna khop ieng khom thil a lo thaw naw takluo ngei hi tie!" an ta.
32. Agrippa chun Festa kuomah, "Hi mi hin Kaisar kuoma a thu intlun lo ngen naw chu ni sien, insuo el thei a ni reng a nih" a ta.

  Acts (26/28)