Acts (25/28)  

1. A biel a hung tlunga inthok ni thum hnungah Festa chu Kaisari-a inthokin Jerusalemah a hang inzin a.
2. Thiempu laltak le Judahai chun Paula le an thubuoi chu an lo hril a.
3. Paula chu Jerusalema hung inthuoitir dingin a ditsakna an lo ngen a, lampuiah lo lambuna that an tum a nih.
4. Festa chun, "Paula chu Kaisari lung inah a um zing a, kei khom ka fe thlak nawk el ding a na,
5. thil suol a thaw a ni chun in hotuhai laia mi a thenin mi zui thla hai sien, hek raw hai se" a ta.
6. Anni lai ni riet amani ni sawm amani a cham hnung chun Kaisari-ah a kir thla nawk a. A zinga chun rorelna thungphaah a thung a, Paula chu hung thuoi dingin thu a pek a.
7. A hung tlung chun Jerusalema inthoka hung Judahai chun an ngir huol a, thu rik tak takin an hek a, sienkhom an hekna chu a'n dik ti an hril chieng thei si nawh.
8. Paula chun a thiemthu a hril ve a, "Judahai Dan ka bawsiet naw a, tempul ka sukporche naw a, Kaisar poi ieng khom ka hril bok nawh" a ta.
9. Festa chun Judahai lakah tlaktlum a nuom a, Paula kuoma chun, "Jerusalemah hang fe a, ka hmaa an heknahai che hi relpek i nuom am?" a ta.
10. Paula chun, "Tu hin Kaisar rorelna thungpha hmaah ka ngir a, hi taka ngei hin relpek ka ni ding a nih. Judahai chungah ieng khom ka thaw suol nawh ti nangma ngeiin chieng takin i hriet.
11. Thil suol ka thaw a, thina khop meuh thil ka thaw a ni chun thi khom ka sel nawh. Amiruokchu, Judahai mi hekna hi ieng khom lo a ni chun anni kuta mi'n hlan theina tu khomin an nei nawh. Ka thu hi Kaisar kuoma intlun ka ngen" a ta.
12. Festa chun a rorelpuituhai a rawn hnungin, "Kaisar kuoma intlun i ngen a, Kaisar kuomah fe mol i tih" a ta.
13. Ni iemani zat hnunga chun Lal Agripab le Berniki chu Festa lawmlutna chibai buk dingin Kaisari-ah an hung a, ni tam tak an cham a.
14. Festa chun Paula chungchang thu chu Lal Agripa a hril a, "Felik khan tang pakhat a maksan a,
15. Jerusalema ka hang inzinin thiempu lalhai le upahaiin a chungchang thu an lo hril a, thiem naw inchangtir dingin an ngen a.
16. Kei chun an kuomah, 'Mi tu khom ama hektuhai leh inhmatona an insal hmaa thiem naw inchangtir el chu Rom sorkar dan a ni nawh' ka ta.
17. Anni rawi chu hi taka hin an hung thlak a, a zinga chun rorelna ka tan nghal a, ama chu hung thuoi dingin thu ka pek a.
18. Ka ring ang hrimin a hektuhai chun thu poia lak tlak ieng khom an hril ta mang si naw a.
19. Anni sakhaw thu le mi pakhat thi tah, Paulan a hring nawk nia a hril, Isu chungthua buoi mei mei an lo ni chau a.
20. Chuong ang thil sui suok chu ka thiem zawng khom niin ka hriet naw a. Chuleiin, Jerusalemah hang fe a, an thu chu relpek a nuom le nuom naw ka'n don a.
21. Paulan an thu chu Kaisar hmaa intlun a ngen leiin Kaisar kuoma ka thon hma po hi taka kol dingin thu ka pek a nih" a ta.
22. Agripa chun Festa kuomah, "Kei khom chu p� thu hril chu ngaithlak ka nuom a nih" a ta. Festa chun, "Zingah i ngaithlak ding annawm" a ta.
23. A zinga chun Agripa le Berniki chu ropui takin an hung a, thu hrilna inah an lut a, sipai lalhai le a khuoa mi poimawhai khom an thang ve a. Festa thupekin Paula chu an hung thuoi lut a.
24. Festa chun, "Lal Agripa le hi taka hung po po hai, en ro, Jerusalem le Kaisaria um Juda mipui po poin hek a, 'Ama hi dam tlak a ni nawh' tia an khek khum pa chu ama hi a nih!
25. Thina khop suol a thaw ka hmu naw a, sienkhom Kaisar hmaa a thu intlun a ngen leiin Rom tieng thon dingin ka sukthluk tah a.
26. Amiruokchu, Laltak kuom meua hang intlun ding thu mumal ziek ding ieng khom ka hriet si naw a, chuleiin in hmaah ka hung thuoi suok a ni hih. Lal Agrippa, i hmaa ka hung thuoi a ni bik deuh tak a, thu ei indon hnunga iemani bek ziek ding ka nei thei takduoiin.
27. An hekna chieng taka ziek si loa Laltak kuoma tang thon rikngot chu thil awmin ka hriet si naw a" a ta.

  Acts (25/28)