Acts (24/28)  

1. Ni nga hnunga chun thiempu laltak Anani le a upahai thenkhat chu an ukil Tertulla thuoiin an hung thla a, Paula chu Larsap hmaah an khing a.
2. Paula an ko lut hnungin Tertulla chun an khingna thu chu Larsap Felik hmaah a hang intlun a: "Felik inzaum tak, nangma zarin hun sawt tak keini lai muongna a'n leng tah a, hmathlir i nei that leiin kan ram khomin nasa takin a that pha a.
3. Felik inzaum tak, hmun tinrengah kong tinrengin i chungah kan lawm takzet a nih.
4. I ta dinga nghokum ni ka nuom naw a, sienkhom thu tlawmte ka hril ding hi lunginsiet taka mi ngaithlapek hram dingin ka ngen che.
5. "Hi pa hi mi hnoksap tawp el, hmun tina Judahai laia buoina chok suoktu le Nazaret pawla an thuoitu lu tak a nih ti kan hriet a,
6. tempul khom sukporche a tum leiin kan man a nih.
7. Kan dan angin a chungthu rel kan tum a, sienkhom sipai kawmandar Lusia a hung a, a mi lakluipek a, a hektuhai chu i hmaa hung dingin thu a mi pek bok a.a
8. Nangma ngeiin indon chik la, kan hekna san thudik chu amaa inthokin hre chieng thei i tih" a ta.
9. Judahai khomin a heknahai chu a'n dik vong tia thangin an lo thlop a.
10. Larsapin thu hril dinga Paula a hei mitmei charin, "Hi chihai roreltuah kum tam tak i thang tah leiin lawm takin ka thiem thu ka hril ding a nih.
11. Jerusalema Pathien chawibiek dinga ka hang fena hi ni sawmpahni bak a la ni nawh ti olsam takin indon chieng thei i tih.
12. Tempul amanih, sunagog amanih le khawpui khaw lai hmuna khom mi ka'n selpui thu le buoina siem dinga mi ka'n fui por tu khomin an hriet nawh.
13. Tuta an mi hekna khom hi a san bulbal i kuomah hril ding hre naw ni hai.
14. Thil pakhat ka thaw ruok chu hi hi a nih: kan thlatuhai Pathien chu anni rawiin pawl hranga an ngai 'Lampui' zuitu ka nina angin ka chawibiek hlak. Dan thu le zawlneihai lekhabua ziek po po le inmilhai chu ka ring vong bok.
15. Anni ang bokin Pathienah beiseina ka nei a, mi fel le fel lohai an thonawk khom ka ring.
16. Chuleiin, ieng lai khomin Pathien le mihriem hmaa soisel kai lo sie le tha hrietna inthieng put ka tum hram hram hlak a nih.
17. "Kum tam tak ka thang hmang hnungin ka chipuihai ta dinga somdawlna thilpek chawiin inthawina inhlan dingin Jerusalemah ka hang fe a.
18. Chuonga inthienna ser le sang ka thaw zo hnung chun tempulah an mi hmu a, sienkhom pung khawm an um naw a, ieng buoinaa khom ka thang bok nawh.
19. Asia rama Juda thenkhat an um ve a, chuonghai chun ka chungah thu poi an nei a ni chun hi taka hin hungin i hmaah hril raw hai se.
20. Chuong an naw leh, hi taka hunghai hin Sanhedrin hmaa ka ngir lai khan iem ka thawsuol hril raw hai se;
21. an hmaa ka ngir laia, 'Mithi thonawkna thuah voisun hin in hmaah hekin ka um a ni hi' ka ti kha a ni nghal si naw chun" a ta.
22. Felik chun Lampui thu chu a lo hriet ta hle a, "Sipai kawmandar Lusia a hung thlak pha i thu ngaituong ka tih" a ta, a thu chu a sie hri a.
23. Paula chu zalen takin a'n umtir a, a ruolhaiin a rong an bawlpek khom khap lo dingin sipai zahotu chu thu a pek a.
24. Ni iemani zat hnungah Felik chu a nuhmei Drusila, Juda mi chu thuoiin a hung a, Paula chu a'n kotir a, Krista Isu ringna thu a hril chu a ngaithlak a.
25. Thiem inchangtirna thu dam, insum theina thu dam, rorelna a la um ding thu dam Paulan a hril lai chun Felik chun pangzatum a ti hle a. "Fe nawk ta la, hun remchang ka nei nawk hunah la hung inkotir ka ti che" a ta.
26. Paulan thamna a pek a beisei sa bok leiin a ko rop a, a biek hlak a.
27. Kum hni a'n voi hnungin Felik chu Porkia Festa-in a hung thlak a. Felik chun Judahai suklawm a nuom leiin Paula chu lung inah siein a fesan tah a nih.

  Acts (24/28)