←  Acts (23/28)  →
1. Paula chun Sanhedrina roreltuhai chu chieng kala enin, "Unauhai, voisun ni chen hin Pathien laka ka um dan ding ang takin ka um ti chu ka sie le tha hrietnain chieng takin a hriet" a ta.
2. Thiempu laltak Anani chun Paula bula ngirhai kuomah, "A hmurah benpek ro"x a ta.
3. Paula chun, "Nang, bang nal var pa, Pathienin ben lem a ti che. Dan anga ka chungthu ngaituo dingin i thung a, dan lo anga maw mi ben ding i ti chu?" a ta.
4. A bula ngirhai chun, "Pathien Thiempu laltak khom i suosal ngam maw!" an ta.
5. Paula chun, "Unauhai, thiempu laltak a nih ti ka hriet naw a nih. 'In hnam roreltuhai chungah thu tha lo sak suok naw rawh' ti ziek a ni kha" a ta.
6. Sanhedrina thunghai chu a then Sadukai, a then Farisai an nih ti Paulan a hriet leiin inring takin, "Unauhai, kei khom hi Farisai mi, Farisai naupa ka na, mithi thonawk ka beiseina thuah roreltu hmaah ka ngir a ni hi" a ta.
7. Chu thu a hril zo chun Farisaihai le Sadukaihai chu an insel buoi a, Sanhedrin chu an inthe tah a.
8. Sadukaihai chu thonawkna dam, vantirko dam le thlarau dam a um ring naw pawl an na, Farisaihai ruok chun chuong po po chu a um an ring bok si a.
9. Chuongchun, an ri a se ta hle a, Farisaihai tienga mi Dan zirtirtu thenkhat chu an ngir a, "Hi pa chunga hin thil indik lo ieng khom kan hmu nawh, Thlarauin amanih vantirkoin amani an inbiekpui khom lo ni ta reng sien, chu chu iem a na?" tiin an thang a.
10. An insel buoi deu deu leiin sipai kawmandar chun Paula an kei nawi neng an lau a, anni laia inthoka zu la suok a, kulbinga thuoi dingin sipaihai thu a pek a.
11. Chu zan chun Lalpa chu Paula bulah a hung ngir a, "Huoi takin um rawh; Jerusalema ka thu i hril ang bok hin Rom khawpuia khom i hril ding a nih" tiin a hril a.
12. Zingkar chun Paula that dan ding phierin Judahai a rukin an inkhawm a, an that hma khat chu ieng khom faa dawn lo dingin an inkham a.
13. Chuonga phierrutu chu mi sawmli neka tam hiel an nih.
14. Thiempu laltak le upahai kuomah an fe a, "Paula kan that hma chun ieng khom faa dawn lo dingin khun takin kan inkham a nih.
15. Chuleiin, nangni le Sanhedrinin a chungthu chieng nawk zuola indon fel in nuom thu suonlama hmangin, Paula chu in kuoma hung thuoi thla dingin kawmandar kuomah hang hni ro, a hung tlung thlak hmaa that dingin kan inpei zing a nih" an ta.
16. Nisienlakhom, Paula farnu naupain that tuma an lo inchan ruk thu chu a lo hriet ruk a, a hang fe a, kulbing sungah a lut a, Paula chu a hril a.
17. Paula chun sipai zahotu laia pakhat a ko a, "Hi tlangval hin kawmandar kuoma hril ding iemani a nei" a ta.
18. Chuongchun, kawmandar kuoma chun an thuoi a, "Tang pakhat Paula khan a mi ko a, hi tlangval hi i kuoma hung thuoi dingin a ngen a, thu iemani hril ding che a nei a ni awm" a ta.
19. Kawmandar chun a kutah chelin a thuoi bing a, a rukin, "Mi hril ding i nei chu iem a na?" a ta.
20. Ama chun "Paula chungchang thu chieng nawk zuola indon an nuom thu suonlama hmangin zingah Sanhedrin hmaa hung thuoi thla dingin Judahaiin hung ngen che an remti tlang a.
21. Nisienlakhom, an thu lo awi naw rawh; anni lai mi sawmli neka tamin an inchan zing a nih. Paula an that hma khat chu faa dawn lo dingin an inkham a. Tu hin i thu nghakin, inpei sa zingin an um a nih" a ta.
22. Kawmandar chun, "Hi thu hi i mi hril ti tu kuoma khom hril der naw rawh" a ta, tlangval chu a'n fetir tah a.
23. Sipai zahotu pahni a ko a, "Voi zan dar kuoa Kaisari-ay fe dingin sipai zahni le sakor chung chuong mi sawmsari le fei chawi mi zahni buotsai ro.
24. Chun, Paula chuongna ding sakor buotsai bok unla, him takin Larsap Felik kuomah in tlungpui ding a nih" a ta.
25. Hieng hin lekha a ziek a:
26. Klaudia Lusia-in:Larsap inzaum tak FelikChibai a buk.
27. Hi pa hi Judahaiin an man a, an that hman tep laiin sipai thuoiin ka zu fe a, ka san suok a.
28. That an tum san hriet ka nuom leiin an Sanhedrin hmaah ka thuoi a.
29. An Dan iemani thua an hek a nih ti ka hmu suok a, sienkhom thina khop amanih lung in intangna khop amanih thil suol a thaw ka hmu naw a.
30. Judahaiin that tumin an phierruk ti miin an mi hril charin i kuomah ka hung tir thlak nghal a nih. A hektuhai khom a chunga thu poi an nei taphot chu i hmaa hril dingin ka'n hriettir tawl bok" tiin.
31. Chuongchun, sipaihai chun a thupek angin a zan a zanin Paula chu an thuoi a, Antipatri khuo an tlungpui a.
32. A zingah sakor chung chuong mihai chun Paula chu an thuoi pei a, sipai danghai ruok chu an kulbing tieng panin an kir nawk a.
33. Kaisari an tlung chun Larsap kawlah lekha chu an pek a, Paula chu a hmaah an thuoi a.
34. Larsap chun a tiem zoin khaw laia inthoka hung am ti a'n don a, Kiliki rama mi a ni thu a hriet tah a.
35. "A hektuhai che an hung tlung pha i thu chu ngaituong ka tih" a ta, Heroda praitorianahz sie a, veng dingin thu a pek a.
←  Acts (23/28)  →