←  Acts (22/28)  →
1. "Unauhai le pahai, tuta in kuoma ka thiemna thu ka hril ding hi ngaithla ro" a ta.
2. Aramik tongin a hril an hriet chun an to nawk zuol a.
3. Ama chun, "Juda mi, Kiliki ram Tarsa khuoa pieng ka na, amiruokchu, hi khawpuia seilien ka nih. Gamaliel zirtirna hnuoiah ei thlatuhai Dan a ngiel a ngana inchuk tah le voisuna nangni ang boka Pathien ta dinga a kul a taia thahnem ngai ve hlak ka ni a.
4. Hi Lampui mihai hi sukhlum hiel khopa sukdudatu ka ni a, a nuhmei a pasalin ka man khawm a, lung inah ka'n khumtir hlak a.
5. Thiempu lal le Kansilw membar po pohai hi chu thu mi hrepuituhai chu an nih. An kuoma inthokin Damaskaa unauhai pek ding lekha ka lak a, chu taka umhai chu khuop a, hrem dinga Jerusalema hung thuoi dingin ka'n thok suok a.
6. "Chuonga ka fe chu, Damaska ka tlung tawm, sun chang lai hin vana inthokin var nasa takin ka velin a hung khaw a.
7. Hnuoiah ka tla thla a, rawl ka hriet a, ka kuomah, 'Saula, Saula, nangin ieng dinga i mi sukduda am a na?' a mi ti a.
8. Kei chun, 'Lalpa, tu am i na?' ka ta. Ama chun, 'Nazaret Isu, i sukduda hi ka nih' a ta.
9. Ka ruolhai chun var chu an hmu vea chu mi betu rawl ruok chu an hriet nawh.
10. Chun, keiin, 'Lalpa, ieng am thawng ka ta?' ka ta. Lalpa chun, 'Tho la, Damaska khuoah lut la, chu taka chun thil iengkim i thaw dinga ruothai chu hril an ti che' a ta.
11. Chu var ropui tak lei chun khuo hrim ka hmu thei ta naw a, ka ruolhaiin an mi keibat a, Damaska ka lut a.
12. Mi pakhat Anania, Dan ang taka Pathien be hlak mi le chu khuoa um Judahai po poin an inza le ngaisang mi chu ka kuomah a hung a.
13. Ka bulah a hung ngir a, 'Unau Saula, i mit hung var ta raw se' a ta. Chu phing leh ama chu ka hmu thei ta nghal a.
14. "Ama chun, 'Ei thlatuhai Pathienin ama ditzawng hretu Mi Feltak a hmu a, chu rawl ngei chu hre dingin a thlang ta che.
15. I thil hmu le hriet thua khan mi po po hmaa a thu hrepuitu ning i tih.
16. Tu hin ieng dinga i la muongchang? Tho la, a hming lamin baptisma chang la, i suolhai sawp fai rawh' a mi ti a.
17. "Chun, Jerusalemah ka kir nawk a, tempula ka tongtai laiin zelin ka um a.
18. Lalpa ka hmu a, ama chun, 'Inhmaw la, Jerusalem hi suoksan rawh; ka chanchin i hril hi pom chuong naw ni hai' tiin a mi hril a.
19. Kei chun, 'Lalpa, sunagog tinah lut a, nangma ringtuhai vaw a, lung ina inkhumtir hlaktu kha ka nizie anni ngeiin an hriet si a.
20. I thu hretu Stefan thisen an insuo lai khan anni lai ka ngir a, ka remtipui a, a thattuhai puon lo vengpektu khom ka ni kha' ka ta.
21. Ama chun, 'Fe el rawh, hla takah Jentelhai kuomah ka tir ding che a nih' a mi ti a" a ta.
22. Chu thu a hril chen chun an ngaithlak a, inring takin, "Hieng ang mi hrep hi, hnuoia inthoka sie hre dai ding a nih, dam tlak an nawh" tiin an khek a,
23. an khek ruol chun an puonhai an hlip a, pilvut an van vawr a.
24. Kawmandar chun Paula chu kulbingah a'n thuoi luttir a, a chunga chuong ang khopa an khekna san chu a hmu suok theina dingin vuokna hruola vaw a, dawp suok dingin thu a pek a.
25. Vaw dinga savun hrui an phier zoin Paulan a kawla ngir sipai zahotu kuomah, "Roman lalram khuo le tui, thiem naw inchangtir khom ni si loa vuok a thieng am a ni?" a ta.
26. Sipai zahotuin chu chu a hrietin kawmandar kuomah a fe a, "Ieng tin am i thaw ding a na? Hi mi hi Roman khuo le tui a lo ni zing el!" a ta.
27. Kawmandar chu a hung a, "Roman khuo le tui i ni maw? Mi hril rawh" a ta. Ama chun, "Ni e" a ta.
28. Kawmandar chun, "Kei chun Roman khuo le tui nina ding hin sum tam tak ka seng a nih" a ta. Paula ruok chun, "Kei chu Roman khuo le tui hrima pieng ka nih" a ta.
29. Chuongchun, soisa a, thu dawp suoktu dinghai chun ama chu an maksan a, kawmandar khomin Roman khuo le tui a lo khuop ti a hriet chun a ti thawng hle a.
30. A zinga chun Judahan Paula chungah thupoi ieng ieng am an nei ti hriet chiengna dingin thiempu lalhai le Sanhedrinhai chu inkhawm dingin thu a pek a. Paula chu a sut a, a thuoi suok a, an hmaah a'n ngirtir a.
←  Acts (22/28)  →