←  Acts (21/28)  →
1. Kan inthe thei hram hnung chun longin kan suok a, Kaws thlierkar kan ban a, a zingah Rodi thlierkar kan tlung a, chu taka inthokin Patar kan tlung a.
2. Foiniki rama fe ding long pakhat kan hmu a, kan chuong a, kan fe nawk pei a.
3. Kupra thlierkar kan hmu a, voi tieng pangah kan fe pel a, Suria ram panin Tura khuo kan tlung a, chu taka chun longa an thuomhnaw phurhai chu an lak thlak ding a na.
4. Zirtir umhai kan zong suok a, an kuomah ni sari kan cham a; anni chun Thlarau hrilin Paula chu Jerusalema fe lo dingin an ngen a.
5. Chu zoah kan suok nawk a, zirtirhai chun an rengin, an nuhmei le nauhai leh, kotsuo chenin an mi'n thla a, tuipui kama chun dingthathuonin kan tongtai a.
6. Chuongchun, chibai kan inbuk a, anni chu in tieng an kir nawk tah a.
7. Turaa inthok chun longin Tolemai khuo kan tlung a, unauhai chibai malamin an kuomah ni khat kan cham a.
8. A zingah kan suok nawk a, Kaisari khuo kan tlung a, Chanchin Tha hriltu Filip inah kan innghat a; ama chu upa pasarihai laia mi kha a nih.
9. Nau nunghak pali a nei a, Pathien thu an hril hlak a.
10. Ni sawt naw te kan cham a, kan cham sungin Judai rama inthokin zawlnei pakhat Agaba a hung thla a.
11. Kan kuomah a hung a, Paula kawngchun chu a lak a, ama kut le ke a zem a, "Jerusalema Judahaiin hieng ang hin hi kawngchun neitu hi khuop an ta, Jentelhai kutah peng an tih, Thlarau Thienghlimin a tih" a ta.
12. Chuong thu kan hrietin keini le chu khuoa mihai chun Paula chu Jerusalema fe lo dingin kan ngen rak a.
13. Paula chun, "Ieng dinga ka thla sukse dinga in tap in tap am a na? Lalpa Isu hming lei chun khuop chauh ni loin thi chen khom ka huom annawm" a ta.
14. Kei her ruol a ni naw phing chun, "Lalpa thu thu ni raw se" tiin kan ma tah a.
15. Chu hnung chun kan insiem a, Jerusalemah kan hang fe a.
16. Kaisari khuoa zirtir thenkhatin an mi zui a, kan tlungna ding Nason inah an mi thuoi a; ama chu Kupra thlierkara zirtir hmasahai laia mi a nih.
17. Jerusalem kan tlung chun unauhaiin hlim takin an mi lo lawm a.
18. A zinga chun Paula rawiin Jakob inah kan leng a, Kohran upa po po khom an lo um a.
19. Paulan anni chu chibai a buk zoin a rongbawlna hmanga Jentelhai laia Pathienin thil a thaw danhai chu kim takin a ripawt a.
20. Unauhaiin chuong thu an hriet chun Pathien an inpak a. Paula kuoma chun, "Unaupa, Judahai laia ringtu an tam takzie i hmu a, ei Dan ngaina tak vong an ni si a.
21. Nangin Jentelhai laia Juda um po po chu Mosie Dan bansan a, an nauhai ser tan lo ding le Judahai dan zawm lo dingin i zirtir hlak ti mi hril kan hriet a.
22. I hung tlung ti an hriet ngei ding a ni si a, ieng tin am thaw tang ei ta?
23. Chuleiin, kan hril ang che hin thaw rawh. Keini lai hin thutiem neiv lai pasal pali an um a.
24. Chuonghai chu thuoi la, anni ruol chun inthien ve la, an sengso po po tumpek rawh, an lu an vaw theina dingin. Chuonga i thaw chun mi po poin i chanchin an hriet hi khel a na, nang ngei khomin Dan zawmin Dan ang takin i la khawsa pei a nih ti hrieng an tih.
25. Jentelhai laia ringtuhai chungthu ruok chu, milem biekna sa fak lo ding, sa thisen fak lo ding, sa rek hlum sa fak lo ding ti le inngai bansan ding ti thu kan relhai chu kan hung thon ta kha" an ta.
26. Chuongchun, a zinga chun chuonghai chu Paulan a thuoi a, anni ruol chun a'n thien ve tah a. Chun, tempulah a lut a, an inthien zo ni ding le an hming kipa inthawina an hlanpek hun ding ni chu thiempu a'n hriettir a.
27. Ni sari a tling ding tepin Asia rama Judahaiin Paula chu tempulah an hmu a. Mipui po po chu an infui por a, an man a.
28. "Israel mihai, mi thangpui ro! Hi pa hi ei chipuihai, ei Danhai le hi hmun hi dodal zawnga hmun tina mihai inchuktir hlaktu a na; tu khom hin tempulah Grik mihai a lutpui a, hi hmun thienghlim hi a sukporche a nih" an ta. Efesi khaw mi Trofim chu a hmain khawpuiah Paula leh an hmu a, ama chu tempulah Paulan a hung thuoi amanih an ti a nih.
29. A khuoin an phek buoi a, kil tina inthokin mi an hung tlan khawm a,
30. Paula chu tempula inthokin an hnuk suok a, kothai an khar ta nghal a.
31. That an tum lai chun Jerusalem an phek buoi ti Roman sipai kawmandarin a lo hriet a.
32. Chuongchun, ofisar le sipai iemani zat thuoiin a tlan thla nghal a, mipuiin kawmandar le sipaihai an hmu chun Paula vuok chu an ma tah a.
33. Kawmandar chun a hung hnai a, Paula chu a man a, khaidiet pahni inbuntir dingin thu a pek a, tu'm a ni le iem a thaw ti a'n don bok a.
34. Mipui chu a then thu khatin an khek a, a then thu dangin an khek bok a. Buoina sosang lei chun an thu chinchang a hriet thei naw a, kulbingah thuoi lut dingin thu a pek a.
35. Kailawn an tlung chun mipuiin an baw nasat em leiin Paula chu sipaihaiin an chawi tung a.
36. Mipui po po chun, "Sukhlum ro" tiin an khek dur dur a.
37. Kulbinga an thuoi lut tawm chun Paulan kawmandar kuomah, "I kuomah thu bau khat chauh hril thei ka ti?" a ta. Ama chun, "Grik tong i thiem a ni maw?
38. Chuong a ni chun, Aigupta mi pakhat, kha hma deua helna chok suok a, firfiek sang li ruol thlalera thuoitu kha i ni naw maw?" a ta.
39. Paula chun, "Kei chu Juda mi, Kiliki ram Tarsa khaw mi ka na, khaw narana mi ka ni nawh. Lunginsiet takin mipui kuomah thu mi'n hriltir rawh" a ta.
40. A remti phing leh Paula chu kailawna chun a ngir a, mipui chu to dingin a kutin a zap a, an to ta thup a, Aramik tongin thu a hril ta a.
←  Acts (21/28)  →