←  Acts (20/28)  →
1. Buoi a re chun Paulan zirtirhai a ko khawm a, a'n fui phur a, chibai buka a'n thla tawl hnungin Makedonia ram panin a suok a.
2. Chu ram chu a fang suok a, zirtirhai chu thu tam tak hrila nasa taka a chokphur zo chun Grik ram a tlung a.
3. Chu taka thla thum a cham hnung chun, Suria ram pana longa a suok tawmin Judahaiin that tumin thu an phierruk ti a hriet leiin Makedonia ram sir kuola kir a tum ta lem a.
4. Beroi khaw mi Pura naupa Sopater hai, Thesolonika khaw mi Aristarka le Sekunda hai, Derbe khaw mi Gaia hai, Timothe hai, Asia biela mi Tukik le Trofim haiin an zui a.
5. Chuonghai chun hma an lo lawk a. Troas khuoah an mi lo nghak a.
6. Keini ruok chu chol thang lo bei kut zo hnungin Filipi khuoa inthokin longin kan suok a, ni nga hnungah Troas kan tlung a, chu taka chun ni sari kan cham a.
7. Pathiennia zan bu fa tlang dinga kan inkhawmin, a zinga suok a tum leiin an kuomah zan ril chenin Paulan thu a hril a.
8. In sawng, kan inkhawmna pindana chun khawnvar tam tak a um a.
9. Tlangval pakhat, Eutuka an ti hi tukver bulah a thung a, Paulan thu a hril sawt em leiin a imu a suok a, a lo inlusu a, in sawng thumnaa inthok chun hnuoiah a tla thla a, thiin an lak a.
10. Paula chu a tlan thla a, a baw a, a pom a, "Thlaphang naw ro, a la dam ie" a ta.
11. A kai tung nawk a, bei a khoi a, a fak a, zing khawvar zakin thu a hril a, a fe suok tah a.
12. Tlangval chu damin in tieng an thuoi a, nasa takin an thla a muong a.
13. Keini ruok chu Aso khuo tieng panin longin kan lo fe hmasa a, Paula chun kea hung a, Aso-a inthoka longa chuong chauh dingin rem a mi ruotpui a.
14. Aso-a kan intuok nawk chun longah a hung chuong ve tah a, Mituleni khuo kan tlung a.
15. Chu taka inthok chun longin kan suok nawk a, a zingah Kio thlierkar zawn kan tlung a, a zing nawk chun Samo thlierkar kan fe pel a, a zingah Mileto khuo kan tlung a.
16. Asia rama hun a hmang sawt nawna dingin Paula chun Efesi khuo chu sun pel a tum a, a thei phot chun Jerusalemah Pentikos Kut hmang hman dinga tlung a tum leiin a'n hmaw a nih.
17. Miletoa inthok chun Efesi kohran upahai chu hung dingin a'n cha a.
18. An hung tlung chun an kuomah, "Asia ram ka hung sir hmasa tak nia inthoka in kuoma ka um sung poa ka um dan kha in hriet a.
19. Judahai phierrukna leia fiena rik tak phur zingin, thuhnuoirol tak le mitthli pumin Lalpa rong ka bawl hlak a ni kha.
20. In ta dinga tangkai dinga ka hriet reng reng chu ieng khom intim loin, vantlang lai le in tina hai ka zirtir hlak cheu kha.
21. Judahai le Jentelhai kuoma khom sima Pathien tieng ngha ding le ei Lalpa Isu ring dingin ka'n hriettir hlak cheu kha.
22. Tuhin, Thlarau Thienghlimin a mi tir tlat leiin Jerusalemah ka fe ding a na, chu taka chun ka chungah iem a hung tlung ding ka hriet nawh.
23. Lung in le harsatnahai chauhin khaw tinah an mi hmuok ding thu Thlarau Thienghlimin a mi hril hlak ruok chu ka hriet.
24. Intlansiekna chu zo a, Lalpan rongbawlna sin a mi pek, Pathien lunginsietna thu puongdarna sin chu ka hlen phot chun, ka hringna chu thlakthla tlakah ka ruot nawh.
25. "Tuhin hre ro, nangni rawi, Pathien ram thu hrila ka'n vak ka'n vak hlakna hai hin ka hmel hmu nawk ta naw ti niu ti ka hriet.
26. Chuleiin, in renga thisenah ka'n thiengu ti voisun hin ka'n hriettir cheu.
27. Pathien remruot dan po po ip loin ka hril vong ta cheu kha.
28. Pathien kohran, a thisena ama ta dinga a'n chawk chu chawm dingin nangni le in beramhai ta dingin fimkhur ro; Thlarau Thienghlimin an chunga hotu dingin a sie cheu a ni hi.
29. Ka fe hnungin satene kol tak tak nangni lai hung lut an ta, beramhai hla naw ni hai ti ka hriet.
30. Nangni laia mi ngei khomin zirtirhai chu anni tieng inpakaitir dingin thu kawi la hung rol an tih.
31. Chuleiin, inveng fimkhur ro; kum thum rauh sun-zan zomin mitthli le zil cheu ka ma nawh ti kha hre zing ro.
32. Tu hin, Pathien kuta le a lunginsietna thu-ah ka'n hlan cheu a, chu thu chun a siem puitling thei cheu a, mi thienghlimhai lai rochan a'n neitir thei bok cheu a nih.
33. Tangkaruo le rangkachak le silfen tu ta khom ka'n hnar ngai naw kha.
34. Ka kut ngei hin kei le ka ruolhai mamaw ka phuhruk hlak ti in hriet.
35. Chuong anga inrima thawin mi hrat nawhai ei thangpui ding a nih ti kong iengkimah ka sukhmu hlak cheu kha; ei Lalpa ngeiin, 'Lak nekin pekin lukhawng a nei lem' a ti kha hre zing ro" a ta.
36. Chuong thu a hril zo chun an rengin an dingthathuon a, an tongtai a.
37. An rengin an tap a, Paula ringah an kuo a, an fawp ngawi ngawi a.
38. An thlasietna tak chu a hmel an hmu ta naw ding thu a hril chu a nih. Chuongchun, long chenin ama chu an inthla a.
←  Acts (20/28)  →