←  Acts (2/28)  →
1. Pentikosb ni a hung tlung chun an rengin hmun pakhatah an um khawm a.
2. Thawk le khatin van tienga inthokin thlipui na tak ri ang an hriet a, an thungkhawmna in chu a hung tuom ta mup el a.
3. Meichok, lei ang tak, insem dar an hmu a, mi tin chungah a fu a.
4. An rengin Thlarau Thienghlimin an sip ta vong a, Thlarauin a'n tongtir ang peiin tong dang dangin an tong tawl a.
5. Khawvel hnam tin laia cheng, Pathien titu Judahai chu Jerusalema chambang an la um a.
6. Chu ri chu an hrietin mi tam tak an hung pung khawm a, an thu hrilhai chu mi tinin mani tong ang senga an hriet thei leiin mak an ti hle a.
7. Makti takin, "Hieng thuhriltuhai hi Galili mi an ni naw am a ni?
8. Ieng tin am ei rengin mani tong ang ela an thu hril ei hriet thei am a na?
9. Thenkhat Parthi mi dam, Medai mi dam, Elimatai mi dam ei na, a then Mesapotamia ram dam, Judai ram dam, Kapadokia ram dam, Ponto ram le Asia ram dam,
10. Frugia ram le Pamfulia ram dam, Aigupta ram le Libia rama Kurini khaw se vela um dam,
11. thenkhat Rom khuoa inthoka hung inzin Juda mi le Juda saphunhai dam, thenkhat Kret thlierkara mi le Arab rama inthoka hung dam ei nia chu Pathien ropuizie an puongna thuhai chu mani tong ang sengin ei hriet si hi!" an ta.
12. An rengin makti le a ngaina hre loin, "Hi hi ieng thil am an ta a?" tiin an indon tuo a.
13. Thenkhat ruok chun an nuisan a, "Uoiin thar an inrui a ni hi" an ta.
14. Peter chu sawm le pakhathai leh a ngir a, rawl inring takin, "Nangni Juda unauhai le Jerusalema umhai po po, hi thil hi hril fieng ka ti cheu, ka hril hi ngun takin lo ngaithla ro.
15. Hienghai hi in ring angin an inrui nawh. Zing dar kuoc chauh a la ni hi.
16. Hi thil hi zawlnei Joel hril kha a ni lem:
17. Pathienin hieng hin a hril:Ni nuhnunga chun mi po po chungah,Ka Thlarau la buok ka ta,In naunu le naupahaiin,Ka thuhai la hril an ta,In tlangvalhan inlarna hmung an ta,In upahan mangah mang an ta;
18. Suoknu le suokpa chungah,Chu ni chun ka thlarau buok ka ta,Ka thuhai la hril an tih.
19. Chung tieng vanah thilmakhai,Hnuoiah inchikna thisen le mei,Meikhu intur ngul el hai chu,Ka hung inlangtir ding a nih;
20. Lalpa ni ropui tak inlang hmain,Nisa chu thimah inchang a ta,Thla khom thisenah inchang a tih;
21. Lalpa hming lam taphothai chu,Sandamin um an tih'
22. "Nangni Israel mihai, hi hi ngaithla ro. In hriet tah angin, Pathienin Nazaret Isu chu nangni lai a hung tir ngeizie suklangna dingin, ama hmangin thil ropui tak tak dam le inchikna thilmakhai nangni lai a thaw a.
23. Ama chu Pathien tum lawk le rel lawk angin in kuta pek a na, nangnin mi rilohai kut hmangin kraws-ah hemdein in sukhlum a.
24. Amiruokchu, thina chel tang ruol a ni naw leiin, Pathien chun thina baua inthokin an suo a, a keitho a.
25. Davida khomin a chungchang thu hieng hin a lo hril kha:Ieng lai khomin ka hmaah,Lalpa ka sie zing hlak a,Ka chang tieng a um leiin,Inhning ngai hrim hrim naw ning.
26. Chuleiin ka lung a lawm,Ka thla a hlim em em bok,Ka taksa khom muong takin,A chawl hadam tah a nih.
27. Ka thlarau chu Seolah,Maksan phal ngai nawng i ta,I Mi Thienghlim chun hmon hmel,A hmu ding phal naw ti nih.
28. Hringna lam i mi kawkhmu a,I bulah lawmna a kim,I chang tieng chun inhoina,Chatuonin a um si a.d
29. "Unauhai, thlatu Davida thu chu huoi takin ka hril cheu hi, ama chu a thi tah a, an phum a, a thlan khom ei kawl hnai elah a la um zing annawm.
30. Nisienlakhom ama chu zawlnei a na, a thlahai laia pakhatin a lalthungpha a la hluo ding thu inkham meua Pathienin a kuoma a tiem chu a hriet a.
31. Thil hung tlung ding chu a hmu lawk leiin, thlanah maksan a ni naw ding thu le a ruong khom hmon a phal naw ding thu a hril hin Krista thonawkna thu a lo hril a nih.
32. Hi Isu ngei hi Pathienin a keitho nawk tah a, ei rengin chu thudik hrepuitu chu ei nih.
33. Ama chu Pathien kut chang tieng chawimawiin a um tah a, Pain a tiem Thlarau Thienghlim chu a dong a, tuta in hmu le hriet hi a thilpek a hung buok chu a ni hih.
34. Davida chu vanah a hang lawn naw a, sienkhom ama ngeiin,LALPAN ka Lalpa kuomah,"Ka chang tieng hin hung thung rawh,
35. I hmelmahai po po chu I ke sirsana ka siemHmakhat chun"e tiin a hril lem a ni kha.
36. Chuongchun, in hemde tah Isu ngei kha Pathienin Lalpa le Kristaah a siem tah ti Israel mi po poin chieng takin hre raw hai se" a ta.
37. Chu thu chu mipuiin an hrietin an lungril a tawk hle a, Peter le zirtir danghai kuomah, "Unauhai, iem thaw tang kan ta?" an ta.
38. Peter chun, "In suolhai ngaidam a ni theina dingin inrengin sim unla, Isu Krista hmingin baptisma chang ro. Chuongchun, hi thilpek Thlarau Thienghlim hi dong in tih.
39. Thutiem hi nangni ta ding a na, in nauhai ta ding khom a na, ram tina mi, ei Lalpa Pathienin a ko taphothai ta ding khom a nih" a ta.
40. Fimkhur dinga infuina thu dang tam tak hrilin, "Tu lai ruolthar suol takhai laka hin inthier fihlim ro" a ta.
41. A hril chu mi tam takin an awi a, baptisma an chang a; chu ni chun mi sangthum laiin an hung pung sa tah a nih.
42. Tirkohai inchuktirna chu ngaithlain, bei khoiaf fa tlangin, tongtaiin an inpawl khawm hlak a.
43. Tirkohai chun inchikna thilmak tam tak an thaw a, mi tinin mak an ti a, an inza hle a.
44. Ringtu po po chu an cheng khawm a, iengkim an intawm a.
45. An in le lo le an thil neihai an zor a, an mamaw ang peiin an insem tlang a.
46. Ni tin lungruol takin tempulah an inkhawm a, an inah hai bei khoiin, lungril hlim tak le inphal takin bu an fak tlang a,
47. Pathien an inpak a, mi po po ditsak an hlaw a, Lalpan a sandamhai chun ni tin an hung belsa pei a.
←  Acts (2/28)  →