← Acts (18/28) → |
1. | Iemani chen hnungah Paulan Athens khuo a suoksan a, Korinth khuoah a fe a. |
2. | Chu taka chun Juda mi pakhat Akuila a hmu a, ama chu Ponto rama pieng a nih. Rom lal Klaudia-in Juda mi po po Rom khuo suoksan dinga thu a pek leia a nuhmei Prisilla leh Italy rama inthoka hung tlung hlim an nih. |
3. | Paula chun anni chu a va sir a, ama ang boka puon in siemtu an ni ve leiin a tlung chil a, sin a thawpui hlak a. |
4. | Sabat ni po leh Sunagog-ah thu a hril a, Judahai le Grikhai chu inringtir tumin thang a lak a. |
5. | Makedoniaa inthoka Sila le Timothe an hung tlung thlak chinah Paula chu thuhril rongbawlna tieng a'n pumpek a, Isu kha Krista chu a nizie Judahai a'n hriettir hlak a. |
6. | Nisienlakhom, Judahaiin ama chu nasa taka kala an biek sisaw leiin Paulan a puon a thin a, "In thisen maw chu in lu chungah tla raw se. Chu mawphurna laka inthok chun kei chu ka'n thieng. Tuta inthok chu Jentelhai tieng ngha tang ka tih" a ta. |
7. | Chu taka inthok chun a fe suok a, sunagog bul ela um Tita Justa, Pathien ngaisak mi ina chun a lut a. |
8. | Sunagog hotu Krispa le a sunghai po poin Lalpa an ring a, a thu hril ngaithlatu Korinth khuoa mi tam tak khomin an ring bok a, baptisma an chang tah a. |
9. | Zan khat chu Paulan inlarna a hmu a, Lalpa chun a kuomah, " Ti naw rawh, ma loin thu hril pei rawh. |
10. | Kei i kuomah ka um leiin, sukna ding chein i chungah tu khomin kut thlak naw ni hai, hi khuoa hin mi tam tak ka nei si a" a ta. |
11. | Paula chu anni lai chun Pathien thu hrilin kum khat le thla ruk a cham a. |
12. | Gallio chu Akaia ram optu a ni laiin Judahai inthuruolin Paula chu an bei hron a, roreltu hmaah an thuoi a. |
13. | "Hi pa hin kan Dan kal zawnga Pathien be dingin mi a thlem hlak a nih" an ta. |
14. | Paula chun hang don a tum a, sienkhom Gallio chun Judahai kuomah, "Aw Judahai, hi thil hi thil indik lo amanih le dan bawsietna thil chu ni sien, in thu ka ngaithlak ding a na. |
15. | Nisienlakhom, thu le hming le nangni Dan chungchanga in buoina thu el a ni chun nangnin ngaituo ro, kei chuong thila chun inrol naw ning" a ta. |
16. | Rorelna ina inthok chun a'n suoktir a. |
17. | Sienkhom mi dang po po chu sunagog hotu Sosthen chunga chun an tuong a, an man a, rorelna ina chun an vuok a. Chu khom chu Gallio chun ienga khom a uksak chuong nawh. |
18. | Paula chu Korinth khuoah sawt tak a cham hnungin unauhai maksanin Suria ram panin longin a suok a, Prisila le Akuila hai pahniin an zui a. Longa an chuong hma chun, a hmaa thu a lo tiem tah angin Paula chun Kenkriei-ah a lu a'n vawtir a. |
19. | Efesi khuo an tlung a, chu taka chun Prisila le Akuila chu a maksan a. Ama ruok chu sunagog-ah a lut a, Judahai chu Pathien thu a suipui a. |
20. | Anni chun la cham hri dingin an thlo a, sienkhom a remti naw a. |
21. | "Pathienin rem a ti chun in kuomah ka la hung nawk ding annawm"q tiin tha takin a'n thla tawl a, Efesi-a inthok chun longin a suok nawk a. |
22. | Kaisari a tlung a, chu zoah kohranhai chibai buk dingin Jerusalemah a hang fe a, Antiokei tieng a kir nawk a. |
23. | Antiokeia iemani chen a chawl hnungin a suok nawk a, Galati ram le Frugia ram a fang suok a, ringtuhai chu a suknghet pei a. |
24. | Chun, Juda mi pakhat, Apolo, Alexandria khuoa pieng chu Efesi khuoah a hung a. Ama chu lekha thiem, Pathien Lekha thu hre tak a na. |
25. | Lalpa lampui thuah inchuktirna tha tak dong tah a ni leiin Isu chanchin chu thahnem ngai tak le chieng taka hrilin mi a'n chuktir hlak a; nisienlakhom, Johan baptisma chauh a la hriet a. |
26. | Sunagoga khom thu huoi takin a hril a, Prisila le Akuilan a thu hril an hriet chun an inah an thuoi a, Pathien lampui chu ngun takin an hril fie a. |
27. | Akaia ramah a fe tum ti an hriet chun unauhaiin an thangpui a, ama an lo lawm lut theina dingin zirtirhai kuomah lekha an ziekpek a. A zuk tlung chun ringtuhai chu Pathien lunginsietna zarin nasa takin a thangpui a. |
28. | Isu chu Krista a nizie Pathien Lekha thu hmangin mi a'n chuktir a, vantlang hmaah Judahai chu a sel dong hlak. |
← Acts (18/28) → |