←  Acts (17/28)  →
1. Amfipoli le Apolonia an sir hnungin Thesalonika khuo an tlung a, chu taka chun Judahai sunagog a um a.
2. Paula chu a thaw dan pangngaiin Sunagoga chun a'n khawm ve a, Sabat voi thum zet Pathien Lekha thua inthoka suipuiin,
3. Krista chu thina tuor ding a ni thu le mithi laia inthoka tho nawk ding hrim a ni thu chu a hrilpui a, "Hi Isu, a chanchin kan hril cheu hi Krista chu a nih" a ta.
4. Chuongchun, anni laia thenkhat chun an ring a, Paula le Sila chu an zui a, chuonghai lai chun Pathien ngaisak Grik mi tam tak le khawtlanga nu challang thahnem tawk tak an thang ve a.
5. Nisienlakhom, Judahaiin an thik a, khawlaia mi suol invak khaw hrawl mei mei hai chu an inpun khawm a, a khaw phekin an chawk buoi a. Paula le Sila chu mipui hmaa thuoi suok tumin an zong a, Jason in an va thawng a.
6. Anni chu an hmu zo naw phing leh Jason le a unau thenkhathai chu khawtlang hotuhai hmaah an hung hnuk lut a, "Khawvel chok buoituhai kha hi taka khom hin an hung a,
7. Jason hin a lo intlungtir vei a. Hienghai hin an rengin, 'Lal dang a um, Isu an ti chu' tiin Kaisar thu kalin thil an thaw hlak a nih" tiin an khek a.
8. Chuong thu chu an hrietin mipui le khaw hotuhai chu an chi-ai hle a.
9. Jason le ama ruola an hung thuoi mi danghai chu an aia hren ding dakham an insietir hnungin an insuo tawl tah a.
10. Unauhai chun Paula le Sila chu a zan a zanin Beroi khuoah an infetir a. An tlung chun Judahai sunagog-ah an inkhawm a.
11. Anni chu Thesalonika mihai nek chun an lo inhong lem a, Paula thu hrilhai chu phur takin an dong a, a'n dik le indik naw chiengna dingin Pathien Lekha thu ni tin an tiem hlak a.
12. Juda mi tam takin an ring tah a, Grik mi challang tam tak khomin, a nuhmei a pasalin, an ring bok a.
13. Nisienlakhom, Thesalonikaa Judahaiin Beroi khuoa khom Paulan Pathien thu a hril ti an hriet chun an hung a, mipui an infuipor a, an sukbuoi nawk tah a.
14. Chuongchun, Paula chu longa infetir dingin tuipui kam tieng unauhai chun an fepui ta nghal a. Sila le Timothe ruok chu Beroia chun an la cham pei a.
15. Paula thuoituhai chun Athens khuo chen an va'n thla a, Beroi tieng an kir nawk chun Sila le Timothe hai chu a'n rang thei ang taka hung dinga hril dingin Paula chun thu a'n cha a.
16. Paulan Athens-a a lo nghak lai chun chu khuo chu pathien lima sip a nih ti a hmuin a'n voi tawl hle a.
17. Chuongchun, sunagog-ah Judahai le Grik mi, Pathien ngaisak mihai chu Pathien thu a suipui hlak a, vantlang pung khawmnaa hunghai khom a hmu taphot chu ni tin thu a hrilpui bok hlak a.
18. Chun, Epikurianm pawla mi thenkhat le Stoikn pawla mi var thenkhathai leh khom an insel a. Thenkhatin, "Hi nasetumpa hin iem a hril lie?" an ta. Isu thu le thonawkna thu a hril leiin a then chun, "Hnam dang pathien thu hriltu a ni awm ie" an ta.
19. Chuongchun, an thuoi a, Areopagi-aho an fepui a, "Hi zirtirna thar i hril hi iem a na, ngaithla thei kan ti?
20. Kan hrieta ngei thu dangdai tak i hung hril a, chuong thil umzie chu hriet kan nuom" an ta.
21. Athens mihai le ram dang mi, a khuoa chenghai chun thil dang thlu lek loa thil thar hril le ngaithlak an ching hlak hrim a nih.
22. Paula chu Areopagia hunghai hmaa chun a ngir a, a hril a, "Nangni Athens khaw mihai, iengkimah sakhaw mi tak in nih ti ka hriet.
23. Ka leng malama chibai inbuk ka en laiin maicham pakhat chungah, "Hriet lo Pathien ta ding" ti inziek ka hmu a. Hre loa chibai inbuk hlak thu chu keiin ka hung hril cheu a ni hi.
24. Pathien, khawvel le a sunga umhai po po siemtu chu, hnuoi le van lal a ni leiin, kuta siem tempula hai a cheng ve naw a.
25. Thil tlasam hlak, mihriemhai kuta rong bawlpek ngai khom a ni bok nawh; ama ngei chu iengkim kuoma hringna hai, inthuokna hai le thil po po petu a ni lem si a.
26. Hnuoi chung hmun tina cheng dingin thlatu pakhatap inthokin hnam tin a'n din a, an ta dingin hun bihai a thliekpek a, an umna ding ramrihai a khangpek a.
27. Pathien an zonga an dap an dap a, an dap fuk hlauh theina dingin a thaw a nih; ama chun a mi hlat naw seng si a.
28. Ama leiin ei hring a, ei chang a, ei um a ni si a. Nangni laia hlaphuoktu thenkhat khomin 'Eini khom a thlahai ei nih' tia a hril ang kha a nih.
29. Chuongchun, Pathien thlahai ei ni si chun, Pathien chu rangkachak amanih, tangkaruo amanih, lung amanih, mihriem themthiemna le remhrietnaa ser suok ang hi ni dingin ei ngai ding a ni nawh.
30. Khang anga mihriem ei mawl lai khan Pathien chun a mi en khum hlak a, tu ruok hin chu hmun tina cheng mi po po hi sim ta dingin thu a mi pek a nih.
31. Ama mi ruot ngeiin khawvel pumpui indik taka ro a relpek hun ding ni chu a ruot fel tah a; a ruot ngei ti mi tin kuoma sukchiengna dingin ama chu mithi laia inthokin a keitho tah a nih" a ta.
32. Mithi laia inthoka tho nawkna thu an hriet chun a thenin an nuisan a, a then ruok chun, "Hi thu hi ngaithlak nawk kan nuom" an ta.
33. Chuongchun, Paula chu anni laia inthokin a suok a.
34. Thenkhatin Paula chu an zui pei a, an ring tah a. Chuonghai lai chun Areopagi-a roreltuhai laia mi Dionisia hai, nuhmei pakhat Damari hai le mi dang tam tak an thang ve a.
←  Acts (17/28)  →