←  Acts (16/28)  →
1. Derbe khuo an sir hnungin Lustra an tlung a, chu taka chun zirtir pakhat Timothe a um a, a nu chu ringtu Juda a na, a pa ruok chu Grik mi a nih.
2. Lustra le Ikoniama unauhai chun Timothe chu an inpak hle a.
3. Paula chun inzinpui dingin a dit leiin a ser a tanpek a. Chu chu chuong laia um Judahai leia a thaw a nih, Timothe pa chu Grik mi a nih ti an hriet vong si a.
4. Khaw tin an sir malamin Jerusalema tirkohai le upahai thu rel kha zawm dingin an hril pei a.
5. Chuongchun, kohranhai chu ringnaa suknghetin ni tinin an hung pung ta pei a.
6. Asia rama thu hril lo dinga Thlarau Thienghlimin a ti leiin Paula le a'n zinpuihai chun Frugia le Galati ram po po chu an fang suok a.
7. Maisia ramri an va tlung a, Bithunia ramah lut an tum a, chu khom chu Isu Thlarauin a phal naw a.
8. Chuongchun, Maisia ram chu an fe thleng a, Troas khuo an tlung thla a.
9. Paulan zanah inlarna a hmu a, Makedonia rama mi pakhat ngirin, "Makedonia ramah hung kai la, mi hung san rawh" tiin a lo ngen a.
10. Inlarna a hmu zo chun an kuomah Chanchin Tha hril dingin Pathienin a mi ko niin kank hriet a, Makedonia rama fe kan tum tah nghal a.
11. Troas khuoa inthokin longin kan suok a, tluong takin Samotraki khuo kan tlung a, a zingah Neapoli khuo kan tlung nawk a.
12. Chu taka inthok chun Filipi khuoah kan fe a, chu khuo chu Makedonia biela khaw poimaw tak,l Rom sorkar khuo a nih. Chu taka chun ni iemani zat kan cham a.
13. Sabat ni chun kul kotkhar puo tieng va kamah tongtaina hmun remchang zongin kan fe a, chu taka chun inthungin nuhmei hung inkhawmhai kuoma chun thu kan hril a.
14. Thuatir khaw mi, nu pakhat Ludi, Pathien ti mi, puon senduk zortu chun kan thu hril a hung ngaithlak ve a. Paula thu hrilhai zawm dingin Lalpan a lungril a hongpek a.
15. A sunghai leh baptisma an chang a, "Lalpa ring takzeta in mi ruot chun ka inah hung tlung ro" tiin a mi ngen a, a mi thlo tang tah a.
16. Ni khat chu tongtaina hmun pana kan fe laiin bawi nunghak pakhat, ramhuoi zawl, aisan thiem hin a mi'n tuokpui a. A aisan thiemna chu a puhai chun an hlawkpui hle a.
17. Chu nu chun Paula le keini chu a mi zui a, "Hieng mihai hi Pathien Chunghnungtak siehlawhai an na, sandamna lampui an hril cheu a ni hi" tiin a khek a khek a.
18. Chuong ang chun ni tam tak a thaw a, Paula chun a ngai thei ta naw a, a ngha kir a, ramhuoi kawla chun, "Isu Krista hmingin thu ka pek che; a sunga inthok khan hung suok rawh" a ta. Chu char chun ramhuoi chun a suoksan ta nghal a.
19. Suok neituhai chun an sum hnar a chat der tah tih an hrietin Paula le Sila chu an man a, bazar hmun, mi pungkhawmnaa chun an hnuk lut a,
20. roreltuhai hmaah an thuoi a, "Hieng mihai hi Juda mi an na, ei khuo an sukbuoi a nih.
21. Eini Rom mihai zawm le thaw ve thieng lo dan dang an inchuktir a nih" an ta.
22. Chuongchun, mipuihai khom chu tirkohai bei ding chun an hung inthok ve a. Roreltuhai chun an zakuo hlippek a, hmola vaw dingin thu an pek a.
23. An vuok hrep hnung chun lung inah an khum a, vengtuhai kuomah anni chu him taka veng dingin thu an pek a.
24. Chuong ang khopa thu an pek khauh lei chun anni chu rip sungrilah an khum a, an keah thir kol an inbuntir a.
25. Zan rila chun Paula le Sila chu Pathien kuomah an tongtai a, hla an sak a, tang danghaiin an ngaithlak a.
26. Thawk le khatah lir nasa tak, lung in thut lungphum chen inhning dur dur khopa nasain a hung inhning a, lung in kotkhar po po chu a'n hong a, tanghai kol bun khom a'n sut vong a.
27. Lung in vengtu a hung har chun tanghai chu an tlan suok vong tah sawnin, a kawlhnam a phawi a, insun hlum a tum a.
28. Paula chun inring takin, "Ieng khom inlaw naw rawh, kan rengin hi taka hin kan la um vong annawm!" a ta.
29. Chu phing leh khawnvar a lam a, a'n chawm lut a, tia inthin pumin Paula le Sila ke bula chun a bokkhup a.
30. Anni chu tuolah a thuoi suok a, "Puhai, sandam ka ni theina dingin ieng am thawng ka ta?" a ta.
31. Anni chun, "Lalpa Isu ring la, chuongchun sandam ning i tih, nang le i sunghai leh" an ta.
32. Ama le a ina um po pohai kuoma chun Lalpa thu an hril a.
33. Chu zan chun, chu darkar la la chun anni chu a thuoi a, an vuokna hliemhai chu a sawppek a, an sungin baptisma an chang nghal a.
34. Chun, a inah a thuoi a, fak ding a pek a, Pathien an ring tah leiin an sungkuo chun an hlim tah em em a.
35. A tuk zingkar chun roreltuhaiin, "Kha mihai kha insuo rawh" tia lung in vengtu hril dingin pulis an tir a.
36. Lung in vengtu chun an thu chu Paula a hril a, "Roreltuhai chun insuo ding cheuin mi an hung tir a, tu hin suok unla, thlamuong takin fe ta ro" a ta.
37. Nisienlakhom Paula chun pulishai kuomah, "Rom mi kan ni si a, thiem naw chang khom kan ni naw a, vantlang hmaah an mi vuok a, lung inah an mi khum a. Tu hin dei zota mi'n suo el an tum rok a ni? Ni top naw nih; anni ngei hungin mi hung thuoi suok raw hai se" a ta.
38. Pulishaiin chuong thu chu roreltuhai an va hril a, Rom mi an nih ti an hriet chun an ti ta hle a.
39. Suklawm tumin an hung a, thupha an chawi a, an thuoi suok a, an khuoa inthoka suok dingin an ngen a.
40. Chuongchun, lung ina inthok chun an suok a, Ludi inah an fe a, unauhai an hmu chun an thlamuong a, chu zoah an suok tah a.
←  Acts (16/28)  →