Acts (15/28)  

1. Judai rama inthokin mi thenkhat an hung thla a, "Mosie Dan anga ser in tan kher naw chun sandam ni thei naw ti niu" tiin unauhai chu an hung inchuktir a.
2. Paula le Barnaba hai leh chun nasa taka an inkal tlat leiin Paula le Barnaba le anni laia mi thenkhat chu Jerusalemah hang fe a, chu chungchang thua tirkohai le upahai hang inhmupui dingin an ruot a.
3. Chuongchun, kohranhai chun an inthla a, lampuiah Foiniki ram le Samari ram an fang suok a, unau umhai kuoma chun Jentelhai khomin Pathien thu an lo awi ve tah ti thu chu an hril pei a, chu chun a suklawm tawl hle a.
4. Jerusalem an hang tlung chun kohran mi hai, tirko hai le upa hai chun an lo lawm a; Pathienin anni hmanga thil a thaw po po chu an kuomah an hril a.
5. Farisai pawla mi, ringtu thenkhat ruok chu an ngir a, "Jentelhaiin ser an tan ding a na, Mosie Dan khom zawm dinga phut tlat ding a nih" an ta.
6. Chu thu chu ngaituo dingin tirkohai le upahai an inkhawm a.
7. Sawt tak an hril tlang hnungin Peter a ngir a, an kuomah, "Unauhai, Jentelhaiin keima baua inthoka Chanchin Tha an hrieta an ring theina dingin Pathienin nangni laia inthoka kha hmaa a mi thlang suok thu kha in hriet a.
8. Lungril hretu Pathien chun eini a mi pek ang bokin an kuoma khom Thlarau Thienghlim pein, Jentelhai chu a dit a nih ti a suklang kha.
9. Eini le anni a thlier bik naw a, ringna leiin an lungril a sukthienghlim a.
10. Chuleiin, ei thlatuhai le eini ngei khoma ei phur zo ta lo ringkol kha tu hin ringtuhai liengkoah inbat luitir tumin ieng dinga Pathien fie in tum am a na?
11. Anni ang bokin eini khom Lalpa Isu lunginsietna leia sandam ni dingin ei inring si a" a ta.
12. Chuongchun, mipui chu an to a, Barnaba le Paulan anni hmanga Jentelhai laia inchikna le thilmak Pathienin a thaw dan chanchin an hril chu an ngaithlak thup a.
13. An hril zo chun Jakobin a hril ve a, "Unauhai, ka thu hi ngaithla ro.
14. Simeonh khan Pathienin Jentelhai ngaisakin ama hming phurtu dingin anni laia mi a lak suok tan thu a hril a.
15. Chu thu le hi zawlnei thu ziek hi an inmil char a nih:
16. Chu hnungah kir nawk ka ta,Davida in chim ta chu tungding ka ta;A tlu sophai chu bawl thang ka ta,Indin thar nawk vong ka tih;
17. Hlaa la umhai khomin Lalpa zong an ta,Jentelhaiin ka hming phur an tih;
18. Tiena inthoka hieng thu inhriettirtu Lalpa chun a tih.
19. "Chuleiin, hieng hin thaw inla ka ti a nih: Jentelhai laia Pathien thu awihai chu sukbuoi naw inla;
20. mi lem biekna thil tirdakum fak lakah inthier fihlim ding dam, inngai bansan ding dam, sa rekhlum sa le sa thisen fa lo ding damin lekha thon lem ei tiu.
21. Mosie Dan chu tiena tlanga inthok khan khaw tinah an puong a, sunagoga hai le Sabat ni taphotin an tiem hlak" a ta.
22. Chuongchun, tirkohai le upahai chun kohran mi po po leh anni laia mi thlang suok a, Paula le Barnaba ruola Antiokeia tir dingin thu an sukthluk a, unauhai laia an thuoitu Juda, Barsaba an ti le Sila chu an thlang a.
23. Anni kuta chun hi lekha hi an thon a: "Tirkohai le upahai le unauhai hin:Antiokei mihai, Suria rama mihai le Kiliki rama Jentel unau umhai chibai kan buk cheu.
24. Keini laia mi thenkhat in kuomah hungin, kan thu hmu si loin an sukbuoi hrep cheu ti le in lunginzing rak ti kan lo hriet a.
25. Nangni kuoma hung ding kan aiaw lunginruol takin kan thlang a,
26. anni chu kan dittak le ei Lalpa Isu Krista hming leia thi huom Barnaba le Paula ruol hin hung tir thain kan hriet a.
27. Chuleiin, Juda le Sila hi kan hung tir a nih; anni khomin hi thu bok hi bau ngeiin hril an ti cheu.
28. Hieng a hnuoia thil poimaw zuol ti nawhai chu in chungah phurrik ieng khom innghat naw inla ti Thlarau Thienghlim le keini ngeiin tha dingin kan hriet:
29. Milem biekna sa dam, sa thisen dam le sa rek hlum sa dam fa naw unla; inngai bansan ro; hieng thil laka hin in fihlim thei chun in ta dingin thang a tih.i Dam takin" tiin
30. Chuongchun, anni chu an fe thlak a, Antiokei an tlung chun mipui an ko khawma, lekha chu an pek a.
31. Anni chun an hang tiem a, an infuina thu lei chun an lawm tlang hle a.
32. Juda le Sila chu zawlnei an ni bok a, unauhai chu infuina thu tam tak hrilin an suknghet a.
33. Chu taka iemani chen an cham hnungin, anni tirtuhai kuomah thlamuong taka kir nawk dingin unauhai chun an inthla a.
34. Sila ruok chu chu taka chun a cham ta zing a.j
35. Paula le Barnaba khom Antiokeia chun an um zing a, mi dang tam tak leh Lalpa thu hrilin mi an inchuktir hlak a.
36. Ni iemani zat hnunga chun Paulan Barnaba kuomah, "Kir nawk inla, Lalpa thu ei hrilna khaw tina unau umhai kha kan inla, iem an chang pei va en ei tiu" a ta.
37. Barnaba chun Johan, Marka an ti bok chu thuoi nawk a nuom a.
38. Paula ruok chun, Pamfuli-a inthoka anni kirsan a, an rongbawlnaah a thang ve pei ta naw lei khan ama chu thuoi nawk chi niin a ngai naw a.
39. Nasa taka an insel hnung chun an inthe a, Barnaba chun Marka a thuoi a, Kupra thlierkar tieng longin an suok a.
40. Paula ruok chun Sila a thlang a, unauhaiin Pathien lunginsietnaa an inkoltir hnung chun an suok ve tah a.
41. Paula chun Suria ram le Kiliki ram hai chu a fang suok a, kohranhai chu a suknghet pei a.

  Acts (15/28)