←  Acts (14/28)  →
1. Ikoniam khuoa khom Paula le Barnaba chun an thaw dan pangngaiin Judahai sunagog-ah an inkhawm a. Chu taka chun an thuhrilin a hne tawl em leiin Juda le Jentel mi tam takin an ring a.
2. Nisienlakhom, ring nuom ve lo Judahai chun Jentelhai chu an infuipor a, unauhai chu an intheidatir a.
3. Sienkhom Paula le Barnaba chu sawt fe an cham a, Lalpa thu chu huoi takin an hril a. A lunginsietna thu an hril hlak chu namnghetin Lalpan anni hmangin inchikna le thilmak tam tak a thaw a.
4. A khaw mihai chu an hung inthe a, a thenin Judahai an tan a, a thenin tirkohai an tan a.
5. Jentelhai le Judahai le an hotuhai chun anni chu soisak hrep a, lunga deng an tum ti tirkohan an lo hrietin,
6. Lukaoni rama Lustra khuoa hai, Derbe khuoa hai le a se vel rama hai an tlansan ta lem a.
7. Chuong hmuna hai khom chun Chanchin Tha an hril pei a.
8. Lustra khuoa chun mi pakhat a pienga inthoka ke zeng, la lawn ngai der lo a um a.
9. Ama chun Paula thuhril a ngaithlak ve a. Paulan ama chu a en zing a, damna dingin ringna a nei ti a hriet a,
10. inring takin, "I kein ngir suok rawh" a ta. Ama chu a'n chawm tho a, kein a fe thei el tah a.
11. Mipuiin Paula thilthaw an hmu chun, Lukaoni tongin inring takin "Pathienhai chu keini lai mihriem angin an hung tum tah a ni hi" an ta.
12. Barnaba chu Zeuse an ta, Paula chu thu hriltu tak a ni leiin Hermesf an ti thung a.
13. An Pathien Zeus tempul chu kotsuoah a um a, chu taka thiempuhai chun mipuihai leh tirkohai hmaa inthawina inhlan tumin bawngchal le par thi an hung lak a.
14. Tirko Barnaba le Paulan chu thu an hriet chun an puonhai an kei thler a, mipui lai chun an inchawm lut a, inring taka khekin,
15. "Puhai, hieng thil hi ieng dinga in thaw am a na? Keini khom nangni ang boka mihriem ve el kan ni hi. Hieng thil hmang lo hi nghatsan a, van hai, hnuoi hai le tuifinriet le a sunga um po po hai siemtu Pathien Hring tieng in nghat theina dingin Chanchin Tha kan hung hril cheu a ni hih.
16. Tuta hma khan hnam tin anni dan ang peia um a phal a.
17. Chuong sa khom chun sui suok thei lo dingin ama a'n thup ngai nawh; a thil tha thawin ama a'n hriettir a, vana inthokin ruotui a pek cheu a, a hun takah in thlaihai a'n ratir a, fak ding tam tak a pek cheu a, in lungril a sukhlim em em hlak a nih" an ta.
18. Chuong thu chu hrilin mipuihai chu an kuoma inthawina inhlan lo dingin an khap thei ta hram a.g
19. Nisienlakhom, Antiokei le Ikoniama inthokin Juda thenkhat an hung a, mipui chu an hung inhmin a, Paula chu lungin an deng a, a thi tah sawnin khuoa inthokin an hnuk suok a.
20. Sienkhom, zirtirhaiin an ngir huol laiin ama chu a hung tho a, khuoa chun a lut nawk a. A zinga chun Barnaba leh Derbe-ah an fe a.
21. Derbe-a chun Chanchin Tha an hril a, zirtirah mi tam tak an siem hnungin Lustra-ah an kir a, chu taka inthokin Ikoniama hai, Antiokeia hai an fe pei a.
22. "Rinum tam tak tuorin Pathien ram ei lut ding a ni hrim a nih" tiin zirtirhai lungril chu an suknghet a, ringna chu chel tlat dingin an infui a.
23. Kohran tinah upa dinghai an thlangpui a, bu ngheiin an tongtai a, an ring Lalpa kuomah an inkoltir pei a.
24. Pisidi ram chu an fang suok a, Pamfulia ram an hung tlung nawk a.
25. Perga-ah thu an hril a, Atali khuoah an zu fe a,
26. chu taka inthok chun longin an suok a, Antiokei an tlung nawk tah a. Antiokeia inthok hin a nih an rongbawlna sin tak thaw dinga unauhaiin Pathien lunginsietnaah inkoltir a, an inzin suok tan chu ni.
27. An tlung chun kohran mihai an ko khawm a, Pathienin anni hmanga thil a thaw po po le Jentelhai ta ding khoma Isu ringna lampui an hong thuhai chu an hril a.
28. Ringtuhai kuoma chun sawt fe an cham a.
←  Acts (14/28)  →