Acts (13/28)  

1. Antiokei kohran lai chun zawlnei le zirtirtu an um a, chuonghai chu Barnaba hai, Simeon, Nigerw an ti bok hai, Kurini khaw mi Lukia hai, lal Herodan unaua a nei Manainax hai le Saula hai dam an nih.
2. Bu ngheia Lalpa an chawibiek laiin Thlarau Thienghlimin, "Barnaba le Saula hi anni ka ko san rongbawl sin thaw dingin mi siehrangpek ro" a ta.
3. Chuongchun, bu an nghei a, an chungah kut inghatin an tongtai a, an tir suok tah a.
4. Thlarau Thienghlim tir suokin Selukia khuoah an fe thla a, chu taka inthok chun longin Kupra thlierkarah an fe a.
5. Salami khuo an tlung chun Judahai sunagog-ah Pathien thu an hril a, Johan khom anni thangpuitu dingin an thuoi bok a.
6. Chu thlierkar chu an fang suok vong hnungin Pafos-ah an tlung a, chu taka chun Juda mi dawithiem le zawlnei tehlem, a hming Bar-Isu an ti chu an hmu a.
7. Chu pa chu a ram optuy Sergia Paula meitehema thang a nih. Ram optu chu mi var tak a na, Pathien thu ngaithlak a nuom leiin Barnaba le Saula hai chu a ina leng dingin a fiel a.
8. Dawithiem Elima (chu chu a hming umzie tak chu a nih) chun Ram optu chu ringna thu inawitir naw tumin, Barnaba le Saula chu a lo kal a.
9. Saula, Paula an ti bok chu Thlarau Thienghlimin a sip a, Elima chu a hmaiah inchang takin a en a,
10. "Nang hlemna tinreng le dawhaa sip, diebol naupa, thil indik taphot hmelma pa, Lalpa lampui indika inthoka mi thuoi suol i ma naw ding maw?
11. Hre rawh, tu hin Lalpa kut i tuor ding a ni hih, i mit indel a ta, khaw var hrim hmu ta ngai naw ti nih" a ta. Chu phing leh sum le thimin a hung baw a, a keitu ding zongin an mai vel ta ruoi a.
12. Ram optuin chu chu a hmu chun a ring tah a, Lalpa thu an inchuktir chun a lungril a tawk hle a.
13. Paula le a ruolhai chu Pafos-a inthokin longin an suok a, Pamfulia ram Perga khuo an tlung a, Johanin anni chu a maksan a, Jerusalem tieng a kir nawk a.
14. Pergaa inthokin Pisidi rama Antiokei khuoah an fe pei a. Sabat ni chun sunagog inkhawmah an fe a, an inthung a.
15. Dan bu le Zawlnei Lekhabu an tiem zoin sunagog hotuhai chun mi an tir a, "Unauhai, infuina ding thu iemani dam hril ding in nei chun hril ro" an va ti a.
16. Chuongchun, Paula chu a ngir a, kutin a zap a, a hril tah a. "Nangni Israel mihai le Pathien betu Jentelhai, lo ngaithla ro.
17. Israelhai Pathien khan ei thlatuhai kha a thlang a, an mikhuolna Aigupta ramah an um sung khan hnam ropui takin a'n ngir a, chu taka inthok chun thilthawtheina ropui tak hmangin a thuoi suok a.
18. Kum sawmli sung lai thlalerah dawthei taka enkolin a thuoi a.
19. Kanan ramah hnam sari a suktlawm hnungin an ram chu a'n hluotir a.
20. Chu chun kum zali le sawmnga lai a aw a. Chu zoah roreltuhai a pek hlak a, zawlnei Samuel chen khan.
21. Chu hnunga chun lal an hni a, Pathienin Benjamin chia mi, Kisa naupa Saula chu kum sawmli sunga dingin a pek nawk a.
22. A lalna a suktawp hnungah Pathienin Davida a'n laltir a, 'Ka lungril ang put mi Davida, Jesai naupa ka hmu suok tah, ama chun ka ditzawng taphot chu thawng a tih' a ta.
23. Chu thlaa inthok chun, Pathienin thu a tiem angin, Israelhai kuomah Sandamtu Isu a hung pek a.
24. Isun rong a bawl tan hmain Johanin simna baptisma chang ding a ni thu Israel mihai po po kuomah a hung hril hmasa a.
25. Johan chun a rongbawlna a hlen ding lai khan, 'Nangnin tu am ni dingin in mi ruot? Ama chu ka ni nawh. Ngai ta u, ka hnungah a hung mek a nih, a pheikhok hrui sut tlak khom ka ni nawh' a ta.
26. "Ka unau, Abraham thlahai le nangni Pathien ti mi Jentelhai, chu sandamna thu chu ei renga kuomah a hung tlung tah a nih.
27. Jerusalema umhai le an roreltuhaiin ama chu an hriet naw a, thiemnaw an inchangtirna chun Sabat ni taphota an tiem hlak zawlneihai thu hril chu an intlung kimtir tah a nih.
28. Thina khop meuh a chungah ieng khom an hmu naw sa khomin sukhlum dingin Pilat kuomah an ngen a.
29. A chungthu zieka lo umhai kha an hlen zo hnung in kraws-a inthokin an lak thlak a, thlanah an vui a.
30. Nisienlakhom, Pathienin ama chu mithi laia inthokin a keitho nawk tah a nih.
31. Jerusalema ama ruola hang fe vehai kuomah ni sawt tak sung a'n lar hlak a; chuong mihai chu tuhin Israel mihai laia a thu hrepuituhai chu an nih.
32. Chu Chanchin Tha, Pathienin ei thlatuhai kuoma a lo tiem chu hril ding cheuin kan hung a nih.
33. Chu chu eini an thlahai kuomah Isu keithoa a um khan a hung hlen tah a nih. Sam nambar pahninaa, 'Nang hi ka Naupa i nih, Voisun hin i Pa ka ni tah'ztia ziek a ni ang khan.
34. A ruong khom hmon loa keitho a ni ding thu hrilin,'Davida kuoma ka thutiem thienghlim,Inkhel lo ding chu peng ka ti che'atiin a lo hril kha.
35. Chuleiin, hmun danga khom,'I Mi thienghlim chun hmon hmel,A hmu ding phal naw ti nih'b a lo ti bok a nih.
36. "Davida ruok chu a dam sunga Pathien ditzawng a thaw zo hnungin a in innghil a, a thlatuhai bulah an phum a, a hmon hmang vong tah.
37. Pathienin a keitho ruok kha chu a hmon hmang ve nawh.
38. Chuleiin unauhai, hre ro, ama Isu lei chun suol ngaidamna thu in kuomah ka hung hril a ni hi.
39. Mosie Dana thiem in chang thei nawna po poa khan Isu ringtu taphot thiem inchangtir an ni tah.
40. Chuleiin, fimkhur ro, chuong naw chun zawlneihai lekhabua a hril kha in chungah hung tlung hlauh rawi a tih:
41. 'Deusawtuhai enin la,Maktiin bohmang ro;In hun lai ngei thil thawng ka ta,Chu chu mi'n hrilhai sien cheu khom,Ring chuong ngai naw ti niu'cti hi" a ta.
42. Inkhawm tin an suok lai chun Sabat nawk phaa chuong thuhai chu hril nawk dingin mihai chun an ngen a.
43. Mipui an tin vong hnung chun Juda tam tak le Juda saphun, Pathien ngaisak mi tam takin Paula le Barnaba chu an zui a, an titipui a, Pathien lunginsietnaa cheng zing dingin an infui a.
44. Sabat nawk chun Lalpa thu chu ngaithla nawk dingin a khaw nawt deuthawin an hung inkhawm a.
45. Nisienlakhom, Judahaiin mipui an hmu chun an thik ta em em a. Paula thu hril taphot chu an selkal a, an hrilsiet bor bor a.
46. Paula le Barnaba chun huoisen takin an don a, "Pathien thu hi nangni kuoma hril hmasak ding a ni hrim a; nisienlakhom in hnawl a, chatuon hringna nei tlak loa in inngai a ni ruok chun, hre ro aw, Jentelhai tieng ngha tang kan tih.
47. Chuonga thaw dingin Lalpan thu a mi pek a nih:'Jentelhai var ni dingin ka ruot che, Kawlkawdong chen sandamna thu, A tlung theina dingin'dtia ziek ang khan" a ta.
48. Jentelhaiin chu thu an hriet chun an lawm a, Lalpa thu chu an chawimawi a; chatuon hringna nei dinga ruot taphot chun an ring tah a.
49. Lalpa thu chu chu ram puma chun a'n dar pei a.
50. Nisienlakhom, Judahai chun mi lien nuhmei ruol, Pathien ti mi leh a khuoa mi challang deuhai chu an infuipor a, Paula le Barnaba chu soisa dingin mi an cho phawk a, a biela inthok chun an hnot suok tah a.
51. An thilthaw chu demin tirkohai chun an kea pilvut kai chu an thin thlak a, Ikoniam khuoah an fe tah a.
52. Zirtirhai chu Thlarau Thienghlimin an sip a, an hlim em em a.

  Acts (13/28)