←  Acts (12/28)  →
1. Chuong lai chun lal Herodanu kohran mi thenkhat chu hrem dingin a man khawm a.
2. Johan unaupa Jakob chu kawlhnamin a'n sathlumtir a.
3. Chu chun Judahai a suklawm ti a hrietin Peter khom man a tum ta pei a. Hi hi chol thang lo bei kut hun lai a nih.
4. Peter chu a man a, lung inah a khum a, sipai pawl li, pali peia insawkin, a'n vengtir a. Fekan Kut zo pha vantlangin a chungthu an rel dinga thuoi dok a tum a nih.
5. Lung ina Peter intang sung chun kohran mihaiin thahnemngai takin Pathien kuomah an tongtaipek a.
6. Herodan a chungthu rel dinga thuoi suok a tum ni hma zan chun Peter chu a kut khing hnia thir khaidiet bunin, sipai pahni inkarah a in a, vengtu dang pahni chun kotkhar bulah ngirin an veng tlat bok a.
7. Ngai ta, thawk le khatah Lalpa vantirko pakhat a hung inlang a, rip sung chu a var ta phut el a, Peter chu a nakah a khik har a, "Tho vat rawh" a ta. A kuta inthok chun khaidiet chu a'n sut thla a.
8. Vantirko chun, "Insiem la, pheikhok bun rawh" a ta. Chuong ang chun a thaw a. Vantirko chun, "I zakuo fuol khan inzem la, mi zui rawh" a ti nawk a.
9. Peter chun a zui a, sienkhom vantirko thilthaw chu a tak ngei a nih ti a hriet nawh, zela um anga a'n ngai leiin.
10. Vengtu hmasa le a dottu an fe khel a, khawpui tienga fe suokna thir kotkhar chu an va tlung a, kotkhar chu amain a hung inhong a, an suok a, kotthler pakhata an fe laiin vantirko chun a maksan ta thut a.
11. A hung har chieng chun Peterin, "Lalpan vantirko a hung tir a, Heroda kuta inthok le Judahaiin ka chunga tlung ngei dinga an ngaia inthokin a mi san suok a nih ti tuhin ka hriet chieng tah" a ta.
12. Thil umzie a hriet fie hnung chun, Johan, 'Marka' tia an ko bok nu Mari ina chun a fe a, chu taka chun mi tam tak an um khawm a, an lo tongtai a.
13. Peter chun kotkhar a kik a, siehlaw nunghak pakhat Rodi chu kot hong dingin a va fe a,
14. Peter rawl a hriet chun lawm taluoin, kot khom hong loin, a tlan kir nawk a, kotkhar bulah Peter a ngir ti a va hril a.
15. Anni chun, "In vet an ta hi!" an lo ta. Ama chu a thang tlat a, sienkhom anni chun, "Ama vengtu vantirko a ni chu" an ti nawk pei a.
16. Peter chun kot chu a kik a kik a, an hang hong chun ama chu an hmu tah a, mak an ti em em a.
17. Anni rawi chu to dingin kutin a zap a, Pathienin lung ina inthoka a thuoi suok dan chu a hril tawl a. "Hieng thu hi Jakob le unauhai va hril ro" a ta, a suok a, hmun dangah a fe tah a.
18. Khuo a hung var chun vengtu sipaihai chu Peter chunga thil tlung thuah namen loin an buoi sie a.
19. Heroda chun a zong a, a hmu si naw a; vengtu sipaihai chu thil umzie an don chieng hnungin an renga sukhlum dingin thu a pek a. Heroda chu Judai rama inthokin Kaisari-ah a fe thlak a, chu taka chun a cham ta zing a.
20. Heroda chu Tura le Sidon mihai chungah a lungsen hle a, chuleiin anni chu inthuruolin ama be dingin an hung a. A khawnbawl upa, a ringzo em em Blasta chu thangpuitu dinga ruola an siem hnung chun, an ramin Heroda rama inthoka pur an inchawk hlak leiin inrem dingin an ngen a.
21. Inbiekna ni ding chun Heroda chu lal thuom inbelin lalthungphaah a thung a, an kuomah thu a hril a.
22. Mipui chun, "Pathien rawl a nih, mihriem rawl a ni nawh" tiin an khek a.
23. Heroda chun Pathien kuomah chawimawina a pek naw leiin Lalpa vantirkoin chop le chilin a hem thluk a, rulrukutin an fak hlumtir a.
24. Pathien thu ruok chu a'n dar a, ringtu an hung pung pei a.
25. Barnaba le Saulan an rongbawl sin an zo chun Johan (Marka) chu thuoiin Jerusalemav inthokin an kir nawk tah a.
←  Acts (12/28)  →