←  Acts (11/28)  →
1. Jentelhai khomin Pathien thu an lo awi ve tah ti Judai ram khaw tina tirkohai le unau umhaiin an lo hriet tah a.
2. Jerusalemah Peter a hang fe chun ringtu sertanhaiin an lo soisel a,
3. "Sertannawhai inah i fe a, anni lai bu i fak el a" an ta.
4. Peter chun thil hung tlung danhai chu a ni ang takin a hrilfie a:
5. "Jopa khuoah ka um a, ka tongtai laiin zelin ka um a, bawm, puon hlap lien tak ang, kil lia khit, vana inthoka ka umna bula hung inkhai thla ka hmu a.
6. Ka en zing a, hnuoia mi ran ke pali nei hai, bokvaka intawl le intel chi hai le chungleng vate hai a sunga chun ka hmu a.
7. "Chun, rawlin, 'Peter, tho la, that la, fa rawh' a mi tiin ka hriet bok a.
8. Kei chun, 'Ni lo e, Lalpa, thil inthieng naw le tirdakum ieng khom ka bauah a lut ngai nawh' ka ta.
9. Vana inthoka rawl chun, "Pathienin a sukthienghlim tah chu nangin thieng naw ti naw rawh' a mi ti nawk a.
10. Chuong ang chun voi thum a um a, van tieng khai tung a ni nawk tah a.
11. Chuong lai chun mi pathum, Kaisaria inthoka an hung tirhai chu ka tlungna in kotkhar bulah an lo ngir ta zing a.
12. Rin der loa anni zui nghal dingin Thlarain a mi hril a. Hieng unau parukhai khom hin an mi zui ve a, Korneli inah kan lut a.
13. Ama chun a inah vantirko a hmu thu le a kuomah, 'Jopa khuoah mi tir la, Simon Peter inkotir rawh,
14. ama chun thu hril a ti che a, a thu hril lei chun nang le i sunghai po po sandamin um in tih' a ti thuhai a mi lo hril a.
15. Thu chu ka hang hril tan a, Thlarau Thienghlim chu, a tira ei kuoma a hung tlung ang bok khan, an chungah a hung tlung a.
16. Lalpan, 'Johanin tuiin a baptis hlak a, nangni ruok chu Thlarau Thienghlima baptis ning in tih' a tihai dam kha ka hriet suok nawk a.
17. Lalpa Isu Krista ei ringa inthoka Thlarau Thienghlim ei dong ang kha Pathienin a pek ve si chun, kei telul hin Pathien chu ka kal thei ding am a ni?" a ta.
18. Chuong thu an hriet chun soiselna ding an hriet tah naw a, "Chuong a ni chun Pathienin Jentelhai khom sima hring dingin a phalpek ve an tah chu" tiin Pathien an inpak a.
19. Stefan leia sukdudana tuokhai chu Foiniki rama dam, Kupra thlierkara dam, Antiokei khuo chen dam an tlan dar a, Judahai kuoma chauh Pathien thu an hril a.
20. Anni laia thenkhat chu Kupra thlierkara mi le Kurini khuoa mi an na, chuonghai chun Antiokei an tlung chun Grik mihais kuoma khom Lalpa Isu Chanchin Tha chu an hril ve tah a.
21. Lalpan anni chu a thangpui a, mi tam takin an ring a, Lalpa tieng an ngha tah a.
22. Jerusalem kohranin an chanchin an lo hriet chun Barnaba chu Antiokei-ah an tir a.
23. A zuk tlung chun Pathien lunginsietna sinthaw chu a zu hmu a, a lawm hle a, anni chu ringum taka Lalpa chel tlat dingin a'n fui tawl a.
24. Barnaba chu mi tha tak, Thlarau Thienghlim le ringnaa sip a na, mi tam tak chu Pathien kuoma thuoi lut an hung ni tah a.
25. Chun, Barnaba chu Saula zong dingin Tarsa tieng a fe nawk ta a.
26. A hmu chun Antiokeiah a hung thuoi a, kum khat zet kohran mihai kuomah an pahni chun an khawsa a, mi tam tak an zirtir hlak a. Antiokei khuoa hin a nih zirtirhai chu 'Kristien' an ti hmasa takna chu.
27. Chuong lai chun Jerusalema inthokin zawlnei thenkhat Antiokei-ah an zu fe a.
28. Anni laia pakhat Agaba chu a ngir suok a, Thlarau inhriettirin Roman lalram sunga tampui mitsim tlak ding thu a hril lawk a (Klaudiat inlal laiin tam chu a tla ta ngei a).
29. Zirtirhai chun an thei ang tawk senga thaw khawmin Judai rama unau umhai chu thangpuina thon an tum a.
30. An tum ang chun an thaw khawm a, upahai kuomah Barnaba le Saula kutah an thon a.
←  Acts (11/28)  →