←  Acts (10/28)  →
1. Chun, Kaisari khuoah mi pakhat Korneli, Italy Regiment an tia sipai zahotu a um a.
2. Ama chu Pathien ngaisak mi, a sunghai po po leh Pathien ti mi, inphal taka retheihai somdawl mi le Pathien kuoma tongtai rop mi a nih.
3. Ni khat chu chawhnung dar thum velah chieng takin inlarna a hmu a. Pathien vantirko a kuomah a hung a, "Korneli" a hung ta.
4. Korneli chun mit ar intaa ama chu enin, "Iem a na, Lalpa?" a ta. Vantirko chun, "I tongtainahai le mi pasiehai kuoma i thilpekhai kha Pathienin a hriet zing a.
5. Tuhin Jopa khuoah mi tir la, mi pakhat Simon Peter chu inkotir rawh.
6. Ama chu tuipui kama savun siemtu Simon ina tlung a nih" a ta.
7. A betu vantirko chu a liem charin Korneli chun a siehlawhai laia mi pahni le sipai pakhat, Pathien ngaisak mi tak chu a ko a.
8. Anni chu thil umzie iengkim a hril zo chun Jopa khuoah a tir a.
9. A zing sun chang lai, khuo an tlung tawm chun Peter chu tongtai dingin in chungah a lawn tung a.
10. A phing a tam ta hle a, bu fak a nuom a, sienkhom fak rong an bawl lai chun zelin a um a.
11. Van inhong a hmu a, bawm, puon hlap kil lia khit, puom pur el ang chu hnuoi tienga hung inkhai thla a hmu a.
12. Chu bawm sunga chun ran ke pali nei chi hai,r bokvaka intawl le intel chi hai le chungleng vate chi tinreng an um a.
13. Rawlin, "Tho la, that la, fa rawh" a hung ta.
14. Peter ruok chun, "Ni lo e, Lalpa, thil inthieng lo ka fak ngai nawh" a ta.
15. Rawl chun, "Pathienin a sukthieng tah chu thieng naw ti naw rawh" a hung ti nawk a.
16. Chuong ang chun voi thum a hung ti a, bawm chu van tienga khai tungin a um nawk tah a.
17. Chuonga Peterin a thil hmu maktia a ngaituo lai chun Korneli mi tirhai khan Simon in zong suokin a kotkhar bulah an lo ngir a.
18. "Hi taka hin Simon Peter a tlung am?" tiin an hung indon a.
19. Peterin a thil hmu a ngaituo lai chun Thlarauin a kuomah, "Mi pathumin an zong che.
20. Tho la, tum thla la, ieng khom ringhlel loin anni chu zui rawh; anni chu ka hung tir an nih" tiin a hril a.
21. Chuongchun, Peter chu a tum thla a, an kuomah, "In zong pa chu kei hi ka nih. Iem a na in hungna san?" a ta.
22. Anni chun, " Sipai zahotu Korneli mi tir kan nih. Ama hi mi fel, Pathien ti mi, Judahai po po inza kai a na, vantirko thienghlimin ama chu a biek a, i thuhril a ngaithlak theina dingin, a ina nangma fiel ding chein a hril a nih" an ta.
23. Peter chun anni chu a ko lut a, a'n riektir a. A zinga chun anni chu Peter leh an suok a, Jopa khuoa unau thenkhatin an zui bok a.
24. A zing nawk chun Kaisari chu an tlung a. Korneli chun a laibunghai le a ruol thahai fiel khawmin Peter chu a lo nghak zing a.
25. Peter-in in a hung thlung chun Korneli'n a lo hmuok a, a ke bulah bokkhupin chibai a buk a.
26. Peterin ama chu a kei tho a, "Tho rawh, kei khom mihriem el ka ni ve hi" a ta.
27. Ama le inbe zing pumin Peter chu inah a lut a, mi tam tak lo um khawm chu a hmu a.
28. An kuoma chun, " Judahai ta dingin Jentelhai le insir paw le anni kan a thieng nawzie chu nangni ngeiin in hriet a. Nisienlakhom, tu khom thieng naw le porche ka ti ding a ni nawzie Pathienin a mi'n hmutir a.
29. Chuleiin, in mi fielna ka hriet charin sel der loin ka hung a nih. In mi hung fielna san iem an ta le?" a ta.
30. Korneli chun, "Voisun hi ni lina a ni tah a, tu ang hun chawhnung dar thumah ka tongtai laiin, ngai ta, mi pakhat puon var sil ka bulah a hung ngir thut a.
31. Korneli, i tongtaina le i thilpekhai Pathienin a hriet zing.
32. Jopa khuoah mi tir la, Simon, Peter an ti chu inkotir rawh. Tuipui kama savun siemtu Simon inah a tlung a nih' a ta.
33. Chuleiin, i kuomah mi ka hung tir nghal a nih; i hung thei hi a tha ngot el. Tu hin Lalpan thu a pek taphot che chu ngaithla dingin Pathien hmaah kan reng hin kan lo um khawm a nih" a ta.
34. Peter chun, "Pathienin mi ditsak bik a nei nawzie ka hriet chieng tah.
35. Hnam tin lai tu khom ama tia thil indik thaw taphot chu a lawmzawng mi an nih.
36. Israel nauhai kuomah Pathien chun thu a hung intlun a, remna Chanchin Tha chu Isu Krista hmangin a hung puong ngei a, sienkhom Isu chu mi po po Lalpa a nih.
37. Johanin baptisma thu a hril hnunga Galili rama inthoka intana Judai ram puma thil hung tlung kha lo hre tah ngei in ta.
38. Nazaret Isu chu Pathienin Thlarau Thienghlim le thilthawtheinain a'n thuom a, Pathien chun a umpui zing a, thil tha thawa inzin velin Diebolin a soisak po po a sukdam pei a.
39. Judai ram le Jerusalema a thilthaw po po hretu kan nih; ama chu kraws-ah hemdein an sukhlum a ni kha.
40. Nisienlakhom, Pathienin ni thum niah a kei tho a, hmu theiin a'n lartir a.
41. Mi tin hmua ruok chu a'n lar nawh, Pathienin hretu dinga a lo ruot lawk keinihai chauh hin kan hmu a; a tho nawk hnung khan fain kan dawn tlang si a.
42. Chu chu tlang insampui ding le Ama chu mihring le mithi chunga roreltua Pathien ruot chu a nih ti mihai inhriettir dingin thu a mi pek a nih.
43. Zawlnei po po khomin ama ring taphot chu a hming leiin an suol ngaidam ning a tih ti an lo hril hlak a ni kha" a ta.
44. Chuong thu chu Peterin a hril lai zingin a ngaithlatuhai po po chungah chun Thlarau Thienghlim a hung tlung a.
45. Sertanhai laia ringtu Peter hung zuituhaiin Thlarau Thienghlim thilpek Jentelhai chunga khom buok a ni ve chu mak an ti hle a;
46. tong hriet lo dama thu hrila Pathien an inpak chu an hriet si a.
47. Peterin, "Hieng mihai hin eini ang bokin Thlarau Thienghlim an dong si a, tuia baptisma an chang tuin am a khap thei a?" a ta.
48. Chuongchun, Isu Krista hminga baptisma inchang dingin thu a pek a. Chuong thil hnunga chun ni iemani zat bek la cham dingin an thlo a.
←  Acts (10/28)  →