Acts (1/28)  →
1. Theofil, ka lekhabu hmasaa khan Isu rongbawl tana inthoka vana lak tung a ni chena a thilthaw le a thu inchuktirhai po po chanchin ka ziek tah a;
2. Thlarau Thienghlim hmangin a tirko thlanghai kuomah thu a'n cha a;
3. a tuor le thi hnungin a hring nawk ngei ti sel ruol loin hieng mihai kuoma hin voi tam tak ama ngeiin a'n entir a, ni sawmli sung an kuomah Pathien ram thu hrilin a'n lar a.
4. Tum khat chu, bu an fak tlang laiin an kuomah hi thu hi a pek a, "Jerusalem suoksan naw ro, Pa thutiem ka hril cheu kha lo nghak ro.
5. Johan khan tuiin a baptis hlak cheu a, sienkhom ni sawt naw te hnungah Thlarau Thienghlima baptis ning in tih" tiin.
6. An intuok khawm chun Isu kuomah, "Lalpa, tuhin a ni Israel ram i tungding nawk ding chu?" tiin an indon a.
7. Ama chun, " Pain a hun le ni ama thuneinaa a ruot chu nangni lo hriet ding a ni nawh.
8. Nisienlakhom, in chungah Thlarau Thienghlim a hung tlung pha thilthawtheina la nei in ta, chuongchun, Jerusalema hai, Judai ram le Samari rama hai le hnuoi kil tawp chenin ka thu hretu ning in tih" a ta.
9. Chuong thu chu a hril zoin, an hmu zing laiin sum lai an hmu phak loa lak tungin a um a.
10. Chuonga van tieng a kai an thlir zing lai chun, thawk le khatah puon var sil mi pahni an kuomah an hung ngir a.
11. "Galili mihai, ieng dinga van tieng thlira in ngir zing am a na? Hi Isu, in kuoma inthoka vana lak tung ngei hi, vana a fe in hmu ang tak hin a hung nawk ding a nih" an ta.
12. Chuongchun, Oliv tlanga inthokin Jerusalema bok an kir nawk a, an inkar hlatzie chu kilometer khat vela a nih.
13. Khuo an lut chun an tlungna pindan chunghnungah an kai a, chuonghai chu Peter hai, Johan hai, Jakob hai, Andri hai, Filip hai, Thoma hai, Batholomai hai, Matthai hai, Alfai naupa Jakob hai, Zelot pawla mi Simon hai le Jakob naupa Juda hai an nih.
14. An rengin, nuhmeihai le Isu nu Mari le Isu unauhai le chun ma loin an tongtai ruol hlak a.
15. Chuong hun laia ringtu za le sawmhni ruol um khawmhai lai chun Peter a ngir a.
16. "Unauhai, Isu mantuhai hung thuoitu Juda chungchang thu chu Davida baua Thlarau Thienghlimin a lo hril lawk Pathien Lekha thu ang khan a hung tlung ding a ni hrim a nih.
17. Ama chu eini lai a thang ve hlak a, ei rongbawlpui a ni hlak hrim kha.
18. (A ritlona man intel ngeia hmun pakhat an inchawka chun a khupin a tla hlum a, a ril suok vong khopin a phing a tet koi a.
19. Chu thu chu Jerusalema um po poin an hriet a, chu hmun chu anni tongin 'Akeldama' an ta, chu chu 'Thisen Hmun' tina a nih).
20. Peter chun hril zom peiin, "Sam ziekah hieng hin a lo chuong a:'A in le lo sukramin um sien,A sungah tu khom cheng naw raw se"ti le'A hotu nina chuMi dangin chang raw se'ti hi.
21. Chuongchun, ei Lalpa Isu rawia ei khawsak laia eini laia thang ve,
22. Baptistu Johan huna inthoka vana a mi kaisan ni chena eini laia thang hlak mi pakhat, a thonawkna mi hrepuitu ding ei thlang suok ding a nih" a ta.
23. Chuongchun, Josefa, (Barsaba amanih Justa an ti bok) le Mathia hai chu pakhat lem lem thlang an rot a.
24. "Lalpa, mi po po lungril i hriet a.
25. A tirko nina le rongbawlna sin tlawmsantu Juda Iskariot hmun hluotu dingin hieng mi pahnihai lai hin a tu lem am i thlang mi hung inhriettir rawh" tia tongtaiin an hni a.
26. Chu zoah thum an vawr a, Mathia chungah a tla a, tirko sawm le pakhathai lai chun lak lut a lo ni tah a.
      Acts (1/28)  →