←  2Timothy (4/4)    
1. Pathien le Krista Isu, mihring le mithihai ro reltu ding hmaah, a hung nawkna le a ram salin thu ka pek che:
2. Thu chu hril rawh; a huna khom, a hun nawa khom hril dingin inpei zing rawh; dawthei taka zirtirin, an indik nawnaah kawkhmu la, zil la, infui rawh.
3. Zirtirna indik an ngaithlak pei naw hun a la hung tlung ding a nih. An nuom zawng ngaithla ding le an na ver zawnga hriltu ding zirtirtu tam tak an fiel khawm hun la tlung a tih.
4. Thutak hre dingin an na sukset an ta, pipu thusim tieng na daw lem an tih.
5. Nang ruok chu iengkimah thluok fim takin um la, harsatna tuor fan fan la, tirko sinah inbur la, i rongbawlna sin po po kha hlen rawh.
6. Kei chu inhlan dinga bun suokina ka um mek tah a, ka fe suok hun a tlung tah.
7. Intlansiekna tha chu ka zo tah a, ka tlan chen ding khom ka suo tah a, ringna chu ka vong zing a nih.
8. Tuta ka hmabak chu felna lallukhum dong chauh a ni tah a, chu chu roreltu indik Lalpa chun, chu Ni-a chun mi peng a tih, keima chauh ni loin, a hung nawkna nghakhlatu po po khom peng a tih.
9. Ka kuomah hung nawk vak tum hram raw khai.
10. Dema chun tu lai khawvel a ngainat leiin Thesalonika tieng a mi fesan tah a, Kreska chu Galati ramah a fe a, Tita khom Dalmatia ramah a fe bok a.
11. Luka chauin tuhin a mi umpui a nih. Marka kha rongbawl konga mi thangpuitu tha tak a na, hung thuoi ve rawh.
12. Tukik chu Efesi khuoah ka tir tah.
13. I hung pha leh Troas khuoa Karpa kawla korfuol ka maksan kha hang la la, ka lekhabu leh, abikin savun lekhahai lem kha chu hung chawi ngei ngei rawh.
14. Dar sung thiem Aleksandra khan ka poi a tawk nasa hle a, a thilthaw ang peiin Lalpan la thungrul a tih.
15. Nang khom ama laka khan fimkhur rawh, ei thu a kal nasa hle a nih.
16. Ka thiemna thu ka hril hmasa tak tum chun ka tienga thang tu khom an um naw a, an mi thlathlam vong a nih. A maw chu phur naw hram raw hai se.
17. Sienkhom Lalpa ruok chun a mi ngirpui a, keima hmanga Jentelhai po po hrieta Chanchin Tha chu puong dar vong a ni theina dingin a mi sukhrat a. Sakeibaknei baua inthokin san suokin ka um a.
18. Lalpa chun thil tha naw laka inthokin mi san suok pei a ta, him takin a van ram chu mi'n tlun a tih. Chatuon chatuonin ropuina chu a kuomah um raw se. Amen.
19. Priskilab le Akuila hai kha Onisefora sunghai leh chibai ka buk.
20. Erasta chu Korinth khuoah a um zing a, Trofim ruok chu Mileti khuoah damloin ka maksan.
21. Thlasik hma ngeia hung tlung tum hram rawh. Eubul hai, Puden hai, Lina hai, Klaudia hai le unau po poin chibai an buk che.
22. Lalpa chu i thlarau kuomah um raw se. Lunginsietna i kuomah um raw se. Amen.
←  2Timothy (4/4)