← 2Timothy (3/4) → |
1. | Ni nuhnunga hai chun hun khir tak a hung tlung ding a nih ti hre rawh. |
2. | Mani chauh inhmangai hai, tangka sum ngaina hai, mi uongthuong hai, intivei hai, tong tlahol hai, nu le pa thu awinaw hai, lawmna chang hre lo hai, mi porche hai, |
3. | lunginsietna piengpui lo hai, ngaidamna nei lo hai, mi hril siet ching hai, insum thei lo hai, mi tawrothai, thil tha hrim hrim dit lo hai, |
4. | inphatsan hmang hai, poisak nei lo hai, chapo hai, Pathien hmangai neka mani inhoitirna lawm mi hai, |
5. | a langa insuksakhaw mi vieu sia a thilthawtheina hnawl tlat si hai chu an hung suok ding a na, chuong mihai laka chun inthier fihlim dai rawh. |
6. | Chuong ang mihai chu tlaktlum tumin mi inah an leng lawr a, nuhmei hrat lo, suolin a buk thluk le an chakna suol ang peia thle mihai chu an zawr thluk hlak. |
7. | Chuong ang nuhmeihai chu thil inchuk pei vieua inlang, sienkhom thutak hre thei bok si lohai chu an nih. |
8. | Jannia le Jambria-in Mosie an dodal ang khan hieng ngaituona porche le ringna tehlem neituhai hin thutak an dodal a. |
9. | Sienkhom, ieng rak tlung naw ni hai, Jannia le Jambria ang bok khan an invetzie mihaiin an inhmai teuh awm si nawh. |
10. | Nang ruok chun ka zirtirna hai, ka um dan hai, ka thiltum hai, ka ringna hai, ka dawtheizie hai le ka selzie hai i hriet a. |
11. | Antiokeia dam, Ikoniama dam le Lustra khuoa dam sukdudana le harsatna tam tak ka chunga tlunghai ka tuor nasatzie le chuonga inthoka Lalpan a mi san suok dan hai chu i hriet a. |
12. | Tu khomin Krista Isu ang taka khawsak a tum phot chun sukdudana tuok ngei a tih. |
13. | Mi suolhai le hlem hmanghai ruok chu an chan chau deu deu a ta, mi dang an hlem ang bokin hlemin um veng an tih. |
14. | Nang ruok chu i thil inchuk tah le i pom nghet tah kha chel tlat rawh, a zirtirtu che i hriet si a. |
15. | I naupang laia inthokin Isu Krista ringna leia sandam ni dinga kawkhmutu che Pathien Lekha thuhai chu i hriet ta hlak kha. |
16. | Lekha Thu po po hi Pathien inthuok khum a na; felna konga inzirtirna ding dam, inkawkna ding dam le insiem thatna ding damin a tangkai em em. |
17. | Pathien mi taphot chun hre bel hai sien, thil tha tinreng thaw thei dinga inthuom an ni theina dingin. |
← 2Timothy (3/4) → |