←  2Timothy (2/4)  →
1. Ka naupa, Krista Isu lunginsietna chun sukhrat che raw se.
2. Mi tam tak hrieta ka zirtirna i ngaithlakhai kha inchuktir sawng pei thei ding awma mi i ring tawkhai kuomah inba sawng pei rawh.
3. Krista Isu sipai ringum angin rinum mi tuorpui ve rawh.
4. Sipai chu a hotu suklawm dingin khawvel thil dangah a'n kei buoi ngai nawh.
5. Inruolsieknaa thang khom dan ang taka a thaw naw chun lawmman a hmu thei nawh.
6. Lohma tieng khom, sin inrimtu chun ra hmasa chu a chang ding a nih.
7. Ka hrilhai che hi ngaituo chik la, Lalpan kong iengkimah hriet thiemna inril peng a ti che.
8. Chanchin Tha ka hril hlak, Isu Krista, Davida thlaa mi, mithi laia inthoka tho nawk tah thu kha hre zing rawh.
9. Chu Chanchin Tha lei chun rinum ka tuor a, tuolthattu ang ela khaidieta khit ka ni hi. Pathien thu ruok chu khuop ruol a ni nawh.
10. Krista Isua um sandamna chu chatuon ropuina leh an chang theina dingin thlanghai leiin hieng po po hi ka tuor a nih.
11. Hi thu hi a'n dik a nih:Ama leh ei thi chun,Ama leh hring ei ta,
12. Ei tuor ve a ni chun,Ama leh ro rel ei ta;Ei hnawl a ni chun,Mi hnawl veng a tih;
13. Ringum naw inla khom,Ama chu a ringum zing,Ama le ama a'n hnawl thei si nawh.
14. Hieng thu hi inhriettirin, Pathien hmingin hril la, thu inchua insel hi bansan rawh, a tangkaina a um naw a, ngaithlatuhai a sukkhawlo mei mei a nih.
15. Nang chun Pathien lawmzawng mi, mani sina inzapuium lo, thutak indik taka thedartu ni inchuk rawh.
16. Tep lo hrila khawvel mihai titi sep chu nghatsan rawh, chuong ang thil chun Pathien ngaisak nawna tieng mi a thuoi deu deu hlak a nih.
17. An thu inchuktir chu pan sie angin a'n dar a; anni laia mi chu Humenai le Filet kha an nih.
18. Thutak an nghatsan a, 'thonawkna chu a um dai tah' an ta, mi thenkhat ringna khom an sukphet tah a nih.
19. Pathien thutak lungphum nghet ruok chu a chang ve naw a, "Lalpan a mihai a hriet" ti le "Lalpa hming lamtu taphothai chun ritlona an nghatsan ding a nih" ti ziek a chuong.
20. In ropui taka bur le belhai khom rangkachak le tangkaruoa siem vong a ni naw a, thinga siem dam, pila siem dam khom a um a, a then thil poimawa hmang ding, a then ruok chu hmang pawlawt ding a nih.
21. Hieng thil tha naw ka hrilhai laka inthoka inthier fihlim mi chu hmangraw hlu, in Neitupa ta dinga hmang tlak, sawp fai sa diem, thil tha tinreng thawnaa hmang el thei dinga inpei zing ang chu hung ning a tih.
22. Tleirawl chakna suol chu nghatsan la, lungril thienghlim taka Lalpa lamtuhai leh felna dam, ringna dam, hmangaina dam le inremna dam hnot lem rawh.
23. Hieng inselna tangkai lo le invetthlak hi nghatsan rawh, innghirnghona a chok suok mei mei a nih.
24. Lalpa siehlaw chun inhal a ching ding a ni nawh; tu khom laina mi, thiem tak le dawthei taka zirtir lem mi a ni ding a nih.
25. Ama kaltuhai khom thutak hre thei dingin Pathienin an lungril a'n lamlettir thei ti beiseiin, zainem takin zirtir raw se.
26. Chuonga a thaw chun, Diebolin a nuom zawng inthawtir dinga a changa a awk an nih ti hung inman suok an ta, intal suok thei an tih.
←  2Timothy (2/4)  →