2Timothy (1/4)  →
1. Kei Paula, Kristaa hringna thutiem puongtu dinga Pathien ditzawnga Krista Isu tirko hin ka naupa dittak Timothe, chibai ka buk che.
2. P� Pathien le ei Lalpa Krista Isu kuoma inthoka lunginsietna le inremna chu i kuomah um raw se.
3. Ei thlatuhai thaw dan anga sie le tha hrietna fim taka a rong ka bawl Pathien kuomah lawmthu ka hril. Sun le zana ka tongtainaah ka hriet zing hlak che.
4. I mitthli tlak dam kha ka hang suikir a, hlima ka sipna dingin inhmu nawk ka chak ngot el.
5. I ringna takzie thu khom ka lo hriet zui pei a, chu chu i pi Loisiin a nei a, i nu Euniki khomin a nei bok a, nang khomin i nei ve ta pei a nih ti ka hriet.
6. Chu lei chun i chunga kut ka'n nghat laia Pathien thilpek i dong kha mut chok zing dingin ka hril non che.
7. Pathien chun dawina thlarau a mi pek naw a, hratna le hmangaina le mani inthunun theina thlarau a mi pek lem a nih.
8. Chuleiin, ei Lalpa Isu thu hi puong inzak naw la, ama leia lung ina intang kei khom hi mi'n zapui bok naw rawh. Pathien hratna ringin, Chanchin Tha leia rinum tuor ve inhuom pei lem rawh.
9. Ei thilthaw lei ni loin, ama tum dan le a lunginsietna zar lemin a mi sandam a, thienghlim taka hring dingin a mi ko a nih. Chu lunginsietna chu leilung insieng hma daih khan Krista Isuah a mi lo pek tah a;
10. chu chu tu hin Isu Krista a hung inlang khan, suklang a ni chauh a nih. Ama chun thina a hne a, Chanchin Thaa hin hringna le thi thei nawna chu a hung suklang tah a nih.
11. Kei hi chu thu chu tlang insampui dinga a tirko le zirtirtua ruot ka nih.
12. Chu lei chu annawm hienga ka tuor hi. Sienkhom ka'n zak nawh. Ka ring chu ka hriet a, chu Nia dinga ka'n koltir khom chu vong him tlat a tih ti ka hriet chieng.
13. Ka kuoma inthoka thu i hriet hlak hai kha zirtirna indikah pom tlat la, ringna le hmangainain Krista Isua chun cheng tlat rawh.
14. Nangmaa ro hlu sie le inkoltira um kha einia cheng Thlarau Thienghlim thangpuinain vong tlat rawh.
15. Asia biela mihai khan, Fugel le Hermogen chenin, an mi zamsan vong tah ti i hriet.
16. Lalpa chun Onesifora hai sung lunginsiet raw se. Ama khan a mi sukhlim em em a, lung in intang ka ni hi a mi'n zapui nawh.
17. Rom a hung tlung charin a mi hung zong suok ngat ngat a nih.
18. Efesi khuoa khom a mi thangpui nasatzie i hriet kha. Lalpa chun chu Nia chun a lungsietna indongtir raw se.
      2Timothy (1/4)  →