2Thessalonians (3/3)    

1. A tawp taka chun unauhai, Lalpa thu chu nangni laia ropui tak le hrat taka a'n dar ang khan a'n dar pei theina ding le
2. mi indik naw le mi suolhai laka kan him theina dingin mi tongtaipui ro, a ring naw an la um si a.
3. Lalpa ruok chu a ringum a, ama chun sukhratin mi suol lakah veng him raw se cheu.
4. Thu kan pek cheu kha in thaw a, in thaw zom pei khom Lalpaa chun kan ring tlat a nih.
5. Pathien hmangaina hre nawk zuol pei ding le Krista tuorselna nei dingin Lalpan in lungrilhai chu keihruoi raw se.
6. Unauhai, kan kuoma inthoka thurosie in dong anga um loa zomthawa taka khawsa mei mei hai laka inthok chun inthier fihlim dingin ei Lalpa Isu Krista hmingin kan hril cheu a nih.
7. Kan thaw dan inchuk ding in nih ti nangni ngeiin in hriet a, nangni lai dawngda takin kan um ngai naw kha.
8. Tu bu khom a thlawnin kan fak ngai naw a, nangni lai tu khom kan sukrik nawna dingin sun le zan inrim takin sin kan thaw hlak a ni kha.
9. In mi chawm kan phut thei naw lei a ni naw a, in mi enton dingin kan thaw lem hlak a ni kha.
10. In kuoma kan um lai khan, "Sin thaw pei naw chun a fak khom fa naw raw se" tiin kan hril hlak cheu kha.
11. Nangni laia thenkhat in zomthaw a, mani sin thaw si loa mi sinthawnaa inrol in ching ti kan lo hriet a nih.
12. Chuong ang mihai chu sin thaw mol mol a, mani thaw suok ngei ring dingin Lalpa Isu Krista hminga thu pein kan infui a nih.
13. Unauhai, nangni ruok chun thil tha thaw nghok ngai naw ro.
14. Tu khom hi lekhathona kan thu hung hril zawm nuom nawtuhai chu inchik bik unla, pawl ser ro, an inza theina ding cheuin.
15. Amiruokchu, hmelma ang chun ngai naw unla, unau angin zil lem ro.
16. Remna Lalpa ngei chun kumkhuoin kong tinrengah inremna pe sien la cheu, Lalpa chu in renga kuomah um raw se.
17. Kei Paulan keima kut ngeia chibai ka bukna cheu a ni hi. Hienga ka ziek hi ka lekhathon taphot inchikna a nih.
18. Ei Lalpa Isu Krista lunginsietna in renga kuomah um raw se.

  2Thessalonians (3/3)