2Thessalonians (1/3) → |
1. | Paula, Silvan le Timothe hai chun Thesalonika khuoa Pa Pathien le Lalpa Isu Krista kohranhai chibai kan buk. |
2. | Pa Pathien le ei Lalpa Isu Kristaa inthoka lunginsietna le inremna chu in kuomah um raw se. |
3. | Unauhai, ringna tieng le inhmangai tuona tienga in inthanglien pei leiin Pathien kuomah lawmthu kan hril hlak a, chu chu kan thaw ding tak hrim a nih. |
4. | Suknomnatnahai le fienahai sel tak le ringna nghet taka in tuorhai hi Pathien kohranhai hmaah kan uongpui hle hlak. |
5. | Pathien ram leia tuor in ni a, chu taka lut tlak ni dinga Pathien thil rel hang indikzie sukchiengna chu in nih. |
6. | Pathien chu a'n dik a, nangni sukrinumtu cheu chu rinumnain thungrul veng a tih. |
7. | Lalpa Isu chu vana inthoka ama vantirko thilthawthei takhai leh meichoka a hung inlang huna chun, nangni rinum tuorhai hi hung inchawltir a ti cheu a, keini khom mi'n chawltir bok a tih. |
8. | Pathien hre lo le ei Lalpa Isu Chanchin Tha ring nuom nawhai chungah phuba hung lang a tih. |
9. | Kumkhaw sietnaah chun pei hawn ning an ta, Lalpa le a thuneina ropui tak hmaah khar khipin um an tih. |
10. | Chu ni chu a mi thienghlimhaiin an chawimawi ni ding le ama ringtuhaiin mak ropui an ti ni ding chu a nih. Nangni khom in kuoma kan thu hril in lo pom leiin ringtuhai lai chun thang veng in tih. |
11. | Chuong ang lei chun, Pathienin a kona cheu phua in um theina ding le that in nuomna po po le ringnaa in thilthaw tinreng chu a hratnaa a sukfamkimpek theina ding cheuin ma loin kan tongtaipek hlak cheu a nih. |
12. | Chuongchun, ei Pathien le Lalpa Isu Krista lunginsietna zarah ei Lalpa Isu hming chu chawimawiin um thei a ta, nangni khom ama zarah chawimawiin um thei bok in tih. |
2Thessalonians (1/3) → |