←  2Samuel (8/24)  →
1. Chu hnunga chun Davidan Filistin mihai chu a bei a, a hne a, a tukdol tawl a, Metheg Amahc chu an kuta inthokin a lakpek a.
2. Davida chun Moab mihai khom a hne a. Anni chu hnuoiah hrui khangin tlar thumin an inzaltir a, tlar hnia mi po an sukhlum a, tlar khata mi po an indamtir a. Chuongchun Moab mihai chu sie khuoah a siem a, sie an hung chawi hlak a.
3. Zoba lal, Rehob naupa Hadadezer chu Eufretis vadung hrula a lalna tungding nawk dingin a fe a, ama chu Davidan a lo bei bok a.
4. Davida chun Hadadezer sakor tawlailir sangkhat, tawlailir khaltu sangsari le a sipai singhni a manpek a, an sakor laia zakhat ti chauh lo chu an zaper tha a satpek vong a.
5. Damaskaa inthoka Aramd mihai, Zobaa lal Hadadezer san dinga hunghai chu Davidan singhni le sanghni a lo that bok a.
6. Aramhai khawpui Damaskaa chun optu sipai a sie a, Aramhai chu Davida lalna hnuoiah an um a, a kuomah sie an hung chawi hlak a. Davida chu a fena taphotah LALPAN hnena a'n changtir pei a.
7. Davida chun Hadadezer ofisarhai rangkachak phaw po po chu a lak khawm a, Jerusalemah a hung chawi a.
8. Chun, Hadadezer op khuo Beta (Teba) le Berot-haia inthokin dar tam tak a hung hawn bok a.
9. Chun, Hamat lal Tou-ine Hadadezer sipaihai po po Davidan a hne tah ti a lo hriet a.
10. Ama leh khom lo indo tah hlak Hadadezer a hne leia chibai buk le lawmpui dingin Tou chun a naupa Joram chu tangkaruo bel dam, rangkachak bel dam le dar bel dam inchawitirin Davida kuomah a tir a.
11. Chuong thilpekhai chu hnam dang lal a hnehaia inthoka a rallak tangkaruo le rangkachakhai a'n hlan hlak ang bokin Davida chun LALPA kuomah a'n hlan a.
12. Chuong ang rallak a'n hlan tahai chu Suria mihai ta dam, Moab mihai ta dam, Amon thlahai ta dam, Filistin mihai ta dam, Amalek mihai ta dam, Zoba lal Rehob naupa Hadadezer hai laka a rallak dam a nih.
13. Chi Ruoma Edom mihaif singkhat le sangriet thata a hung kir hnung chun Davida hming chu a hung inthang ta hle a.
14. Edom ram hmun tinah optu sipai a sie a, Edom ram chu sie ramah a siem a. Davida chu a fena taphotah LALPAN hnena a'n changtir pei a.
15. Davida chun Israel ram po po a op a, mipuihai chungah ro indik tak le fel takin a rel a.
16. Zeruia naupa Joab chu sipai lu takah a thang a; Alihud naupa Jehosafat chu chanchin ziektu a ni a;
17. Ahitub naupa Zadok le Abiathar naupa Abimelek hai chu thiempu an ni a; Seraia chu ziektu a ni a;
18. Jehoiada naupa Benaia chu Keret mihai le Pelet mihai hotu a ni a; Davida nauhai chu lal kuoma thurawn petu an nih.
←  2Samuel (8/24)  →