2Samuel (7/24)  

1. Lal chun a lal in a hluo hnung le a vela a hmelmahai po po laka LALPAN ralmuonga an umtir hnungin,
2. zawlnei Nathan kuomah, "Hi, kei chu sidar thinga bawl inah ka um a, sienkhom Pathien Bawm chu puon inah a la um zing si a" a ta.
3. Nathan chun lal kuomah, "I lungrila i ti ang tak chun thaw el rawh, i kuomah LALPA a um annawm" a ta.
4. Chu zan chun LALPA chun Nathan kuomah:
5. "Fe la, ka siehlaw Davida kuomah hieng hin hril rawh. 'LALPA chun hieng hin a tih: Nang hi ka umna ding in mi bawlpektu ding chu i ni am a ni?
6. Israel thlahai Aigupta rama inthoka ka thuoi suoka inthoka tu chen hin inah ka um naw a, hmun hrang hrangah insonin puon inah ka um pei lem hlak.
7. Hmun hrang hranga ka fe kuolpui Israel thlahai le ka mi Israelhai enkoltu dinga ka ruot roreltuhai kuoma khom, 'Iengti dana sidar thingin in in mi bawlpek naw am a na?' tiin ka hril hlak amanih?
8. " Chuleiin, ka siehlaw Davida kuomah hieng hin hril rawh: Iengkim LALPA chun hieng hin a tih: I beram vengna hmuna inthokin ka mi Israelhai chunga roreltu dingin ka ko suok che a.
9. I fena taphotah i kuomah ka um zing a, i hmaa hmelma umhai ka hnepek che a, tuhin hnuoia mi ropui takhai angin i hming ka sukropui ding a nih.
10. Ka mi Israelhai chu an um nghetna ding hmun peng ka ta, tu sukbuoi ta lo dingin anni hmuna ngei chun anni chu phun ka tih. Tuta hma ang khan mi rilohaiin sukrimsi ta naw ni hai.
11. Ka mi Israelhai chunga roreltu ka ruot hlim lai ang kha ni ta bok naw ni a, in hmelmahai po po lakah inchawldamtir ka ti cheu. Kei LALPA hin in sungkuo chu ka tungding ding a nih ti ka hril che.
12. I nihai a kin phaa i thlatuhai kuoma i'n lawi ve pha chun nangma hung thlaktu ding che i rila ra ngei chu indin ka ta, a ram chu suknghet ka tih.
13. Ama chun ka hminga dingin in bawl a ta, a ram lalthungpha chu kumkhuoa dingin suknghet ka tih.
14. A pa ning ka ta, ama chu ka naupa ning a ta, thil suol a thaw chun pain hmol hmanga a naupa a thunun angin thunun ka tih.
15. Amiruokchu i hmaa ka hnawl Saula laka ka hmangaina ka lak hmang ang khan ka hmangaina chu a lakah la kir ngai naw ning.
16. I sungkuo le i ram chu kumkhuoin suknghet ka ta, i lalthungpha khom kumkhuoin suknghet bok ka tih' " tiin.
17. Nathan chun inlarna thu po po chu a kip a kawiin Davida a hril a.
18. Chun, lal Davida chu LALPA puon inah a lut a, LALPA hmaah a thung a, a tongtai a: "Aw LALPA Pathien, kei hi tu am ka na, ka sunghai khom ieng am an na, hieng chen chen i mi thuoi el hi?
19. Aw LALPA Pathien, chu khom chu i mithmuah huntawk la ti loin, i siehlaw thlahai chen khom suknghet i la tum ta pei a. Aw LALPA Pathien, hieng ang hi mihriem i thaw dan pangngai khom a ni hrim am a ni?
20. Hieng bak lawm lawm hi Davida hin i kuomah ieng am ngen sap ding a nei a? Aw LALPA Pathien, i siehlaw hi i hriet tlang vong si a.
21. I thu le i ditzawng angin hi thil ropui tak hi i thaw a, i siehlaw kuomah i'n hriettir a.
22. Aw LALPA Pathien, i va hang ropui ngei de aw! Kan hrieta chu nangma ang hi tu khom an um naw a, nang naw chu Pathien dang hrim an um nawh.
23. Aigupta rama inthoka an Pathienin a mihai ni dinga a san suok, thil mak le rapum tak tak thaw a, an hmaa hnam tinhai chu an pathien chopa a hnot suokpek, khawvel pumpuia a hming a serna hnam, Israel hnam ang hi hnam dang tu am an um a?
24. Israelhai chu chatuona i mihai ni dingin i suknghet a, aw LALPA, nang chu an Pathien i hung ni tah.
25. "Chuongchun, aw LALPA Pathien, i siehlaw chungchang thu le a sunghai chungchang thu chu i tiem tah ang khan kumkhuoa dingin suknghet la, i hril tah ang khan hlen rawh.
26. Chuongchun, mihaiin, 'Iengkim LALPA chu Israelhai Pathien a nih' ting an ta, i hming chu chatuonin ropui a ta, i siehlaw Davida sungkuohai chu i hmaah suknghetin um an tih.
27. "Aw Iengkim LALPA, Israelhai Pathien, i siehlaw kuomah 'Sungkuo indinpek ka ti che' tiin i puong ta si leiin i siehlaw chun hi thu hi i kuomah a hung intlun ngam a nih.
28. Aw LALPA Pathien, nang chu Pathien i ni a, i thu chu innghatna tlak a ni a, i siehlaw kuomah thil tha i tiem ta si a.
29. Chuleiin, i siehlaw sunghai chu i hmaa kumkhuoa an um zing theina dingin lunginsiet takin malsawm rawh. Aw LALPA Pathien, i tiem tah angin, i siehlaw sunghai hi i malsawmna zarin kumkhuoin malsawmin um ngei an tih" tiin.

  2Samuel (7/24)