2Samuel (5/24)  

1. Israel pahnamhai po po chu Hebron-ah Davida kuomah an hung a, a kuomah "Ngai ta, i thisen inzompuihai kan ni hi.
2. Kha hmaa kan chunga Saula an lal lai khom khan ral beinaa mi thuoitu tak chu nangma i ni hlak a, LALPA chun i kuomah, 'Ka mi Israelhai thuoi i ta, an lalah i um ding a nih' a ti che a ni kha" an ta.
3. Israel upahai po poin Hebron-ah Lal Davida kuom an hung tlung chun anni chu LALPA hmaah thu a lo thlungpui a, Davida chu an lal dingin Hebrona chun hriek an nal a.
4. Lal a hung ni chun Davida chu kum sawmthum mi a ni ta a, kum sawmli ro a rel a.
5. Hebrona inthokin Judai ramah kum sari le thla ruk a'n lal a, Jerusalema inthokin Israel ram po po le Judai ramah kum sawmthum le kum thum a'n lal bok a nih.
6. Chun, lal le a mihai chu Jerusalem hluotu Jebuhai do dingin an inthok suok a. Jebuhai chun Davida kuomah, "Hi taka hin lut naw top i tih, mitdel le kebaihai chauh khomin lo dang el an ti che" an ta. Anni chun an lungrilin, "Davida a lut thei teu awm naw em el" an ti a nih.
7. Amiruokchu, Davida chun Zion kul chu a lak miel a, chu chu Davida Khawpui chu a nih.
8. Chu ni chun Davidan a mihai kuomah "Nangni lai hin keima anga that nuom khopa Jebuhai theidatu in um ve am? Jebuhai hne ding chun tui hor kuoah lut inla, mitdel le kebaihai chu hlukhum ro" a ta. Chu lei tak chu annawm, 'Mitdel le kebaihai chu lal inah an lut ding a ni nawh' ti a ni ta zing hi.
9. Davida chun kul sungah umhmun a khuor a, a hmingah Davida Khuo tiin a'n buk a. A muol suo tienga kul thut dinga hnuoi an sung zawla inthoka tanin a vel tuokin khawpui a rem a.
10. Iengkim LALPA Pathienin a umpui leiin a hung ropui ta deu deu a.
11. Tura lal Hiram chun Davida kuomah mi a tir a, sidar thinghai a thon a, themthiemhai le lung ser thiemhai a tir bok a, Davida chu lal in a bawlpek a.
12. LALPAN a mi Israelhai zarin Israel mihai chungah lalin ama chu a suknghet a nih ti le a ram khom chu a chawisang a nih ti Davidan a hriet a.
13. Hebron a suoksan hnungin Davida chun Jerusalemah nuhmei le hmei a nei belsa a, naupa le naunu khom a la nei sa a.
14. Chuong a nauhai chu Samua hai, Sobab hai, Nathan hai, Solomon hai,
15. Ibar hai, Elisua hai, Nefeg hai, Jafia hai,
16. Elisama hai, Eliada hai le Elifelet hai an nih.
17. Davida chu Israel mihai lal dingin hriek an nal ti Filistinhaiin an hriet chun ama zong dingin burip takin an inthok tung a, Davidan chu chu a lo hrietin kulbingah a fe thlak a.
18. Filistin mihai chu an hung tlung a, Refaim ruoma chun an inzar phei a.
19. Davida chun LALPA kuomah, "Fein Filistinhai chu ka bei di'm a ni? Anni chu ka kutah i pek ding am a ni?" tiin a rawn a. LALPA chun, "Fe rawh, Filistinhai chu i kutah pe ngei ngei ka ti che" a ta.
20. Chuongchun, Davida chu Baal Perazim-ah a fe a, anni chu a hne a, "LALPAN ka hmelmahai chu tuiting inthe ang elin ka hmaah a sukdar vong tah" a ta. Chuleiin, hi hmun hminga hin Baal Perazim a'n buk a.
21. Chu taka chun Filistinhaiin an milemhai an tlansan a, Davida le a mihai chun an lak a.
22. Filistin mihai chu an hung tung nawk a, Refaim ruoma chun an inzar nawk a.
23. Davida chun LALPA a rawn nawk a, ama chun, "Pan tung loin an hnung tieng inhuol la, thingtheihmi thing zawna khin hang bei rawh.
24. Thingtheihmi chunga ke pen ri thuop thuop i hriet charin inrang takin che nghal rawh, Filistin sipaihai do dingin i hmaah LALPA a fe tina a nih" a ta.
25. LALPA thupek angin Davida chun a thaw a, Filistin mihai chu Gibeon-ab inthoka Gezer chenin a hne ta vong a.

  2Samuel (5/24)