←  2Samuel (3/24)  →
1. Saula sunghai le Davida sunghai chu sawt tak an indo a, Davida chu a hung hrat tiel tiel a, Saula sunghai ruok chu an hung chau tiel tiel thung a.
2. Hebron khuoa Davida naupa pienghai po laia a hmasa tak chu Jezrela mi Ahinoam laka a hring Amnon a nih;
3. a pahnina Kileab chu Karmela Nabal nuhmei thisan Abigaila inthok a nih; a pathumna Absalom chu Gesur lal Talmai naunu Maka laka mi a nih;
4. a palina chu Adonija, Hagit laka mi a nih; a pangana chu Sefatia a na, Abitala laka mi a nih;
5. a parukna chu Ithream a na, Davida nuhmei Egla laka mi a nih. Chuonghai chu Davida naupahai, Hebrona pieng an nih.
6. Saula sungkuohai le Davida sungkuohai an indo sungin Abner chu Saula sungkuohai lakah a tlatlum hman hle a.
7. Saula chun hmei a nei a, ama chu Aia naunu Rizpa a nih. Chun, Isboset chun Abner kuomah, "Ieng dinga ka pa hmei i zalpui am a na?" tiin a suosal a.
8. Isboset tong chun Abner chu a suklungsen hle a, "Judahai uicho ang mei meia i mi ngai a ni? Voisun chen hin i pa Saula sunghai le a unauhai le a ruolhai chungah ringum takin ka um a, Davida kuta khom ka pek naw che a ni kha. Chuong sa khom chun tu hin hi nuhmei laka suolah i mi'n tum hi.
9. Dan-a inthoka Beersheba chen Saula sungkuoa inthoka ram chu lakpek a,
10. LALPAN Davida lalthungpha indin dinga inkham meua thu a lo tiem tah anga ka sukpuitling naw vai chun Pathienin Abner hi a law lawin law sien la, chu neka nasa dai khom chun thaw raw se" a ta.
11. Isboset chun Abner chu a ti leiin a don ngam hrim hrim nawh.
12. Abner chun a aiin Davida kuomah mi a tir a, "Hi ram hi tu ta am a na? Ka kuomah thu thlung la, Israel ram po po i kuta hui lut vong dingin thangpui ka ti che" tiin thu a thon a.
13. Davida chun, "A tha, thu thlung ka tih. Amiruokchu, hi thil pakhat hi ka ngiet a, i hung pha leh, Saula naunu Mikal kha i hung thuoi naw chun ka hmel hmu thei naw ti nih" a ta.
14. Chu zoah Davida chun Isboset kuomah, "Filistin mihai ser vun zakhata ka'n chawk sa ka nuhmei Mikal kha mi hung pe kir rawh" tiin mi a tir a.
15. Isboset thupekin Mikal chu a pasal Paltiel, Laish naupa kuoma inthokin an va thuoi a.
16. A pasal chun tap zing pumin Bahurim chen a hung zui a, Abnerin "Kir ta rawh" a ti leiin a in tieng a kir nawk ta a.
17. Abner chun Israel upahai chu a biek a, "Kha hma khan Davida chu in lalah in dit hlak a.
18. Tu hin in lalah siem ro. LALPA chun Davida kuomah, 'Ka siehlaw Davida kutin ka mi Israelhai chu Filistin mihai kuta inthok le an hmelmahai po po kuta inthokin san suok ka tih' tiin thu a tiem a nih" a ta.
19. Abner bok chun Benjamin mihai hriet ngeiah chu thu chu a hril nawk a. Chu zoah Israel mihai le Benjamin sungkuo po poin thaw dinga an dithai chu Davida hriet ngeia hril dingin Abner chu Hebron-ah a fe a.
20. Abner le a mi thuoi sawmhni ruolin Davida inhmupui dinga Hebron an hung tlung chun Davidan ruoi a buotsaipek a.
21. Abner chun Davida kuomah, "Kir nawk nghal ka ta, Israel mihai po poin i kuoma thu an thlung theina ding le i duthusam ang taka an chunga ro i rel theina dingin, ka lalpa kuoma hung inkhawm dingin va huoihot tawl ka tih" a ta. Davida chun a'n fetir a, thlamuong takin a kir nawk ta a.
22. An fe charin mi runa fe Davida mihai le Joab chu an hung tlung a, rallak sum tam tak an hung hawn a. Abner ruok chu Hebrona Davida kuoma chun a lo um ta naw a, Davidan thlamuong takin a lo inkirtir ta a.
23. Joab le a sipai thuoihai an hung tlung chun, "Nera naupa Abner chu lal kuomah a hung a, lal chun thlamuong takin a lo infetir nawk tah" tiin Joab chu an lo hril a.
24. Chuongchun Joab chu lal kuomah a fe a, "I thil lo thaw hi iengtizie am a na? En ta, Abner chu i kuomah a hung a. Ieng leia i lo infetir am a na? Tu hlak hin a fe dai ta bok si a!
25. Nera naupa Abner chu tu am a nih ti i hriet; dawha ding che le i chang dan iengkim chik a, i thilthaw taphot hriet suok tuma hung a ni chu" a ta.
26. Davida kuoma inthoka Joab a hung suok chun Abner hnot dingin mi a tir nghal a, Sira tuikula inthokin an hung thuoi kir nawk a, sienkhom chu chu Davidan a hriet ve nawh.
27. Abnerin Hebron a hung tlung chun Joab-in kul kotkhara chun be ru dingin a thuoi hrang a, a unaupa Asahel thisen thungrulna dingin a phingah a sun a, a thi ta a.
28. Chu thu chu a hnung deuah Davidan a lo hriet chun, "Nera naupa Abner thisen insuona thua hin kei le ka ram chu LALPA hmaah kumkhuoin fihlim kan tih.
29. A thisen maw chu Joab lu chunga le a pa sunghai po po chungah tla raw se. Joab sunghai lai panna huoisuol nei dam, vun hri chi hrang hrang invoi dam, funghrol ringsana khawsa dam, kawlhnama thi dam le suongsama um bo naw raw hai se" a ta.
30. [Joab le a unaupa Abisai haiin Abner an that san chu Gibeon hmuna indonaah an unaupa Asahel a that lei a nih.]
31. Davida chun a hlang chu zuiin, Joab le a bula um mi po po kuomah, "In puonhai pot thler unla, saiip puon sil unla, Abner hi sun ro" a ta.
32. Abner chu Hebron-a chun an phum a. Abner thlana chun rawlpui insuo meuin lal chu a tap a, mipui po po khom an tap a.
33. Lal chun Abner sunna thu a'n sam a:Mi invet thi ang elin,Abner chu a thi a ni maw?
34. I kut khuop a ni naw a,Keah kol i bun bok nawh.Mi rilohai hmaa miAn tluk anga tlu i nih tiin. Chuongchun, mi po po chu an tap nawk a.
35. Chun, a lusun lai chun iemani bek fa dingin mi po poin Davida chu an hung ngen a. Davida ruok chun, "Nisa tlak hmaa bei amani le thil dang ieng khom ka fak hlek chun Pathienin a law lawin mi law sien la, chu neka nasa khom chun mi thaw raw se" tiin a'n kham a.
36. Chu chu mi po poin an hrietin an lawm hle a; lal thilthaw taphot chun mipuihai chu a suklawm a nih.
37. Chu nia inthoka chun Nera naupa Abner an thatna chungchangah lal chu a thang ve nawh ti mi po poin an hung hriet ta a.
38. Chun, lal chun a mihai kuomah, "Voisun hin Israelhai mi lien le mi ropui tak a thi ti in hriet naw maw?
39. Lala hriek nal ni lang khom voisun hin kei chu ka la hrat tawk naw leiin Zeruia nauhai hi tuorhlaumin an pawng taluo a nih. Thil suol thawtu chu a suolzie ang peiin LALPAN thungrul raw se" a ta.
←  2Samuel (3/24)  →