←  2Samuel (24/24)    
1. Chun, LALPA lungsenna chu Israelhai chungah a hung tuong nawk thut a. An chunga buoina intlungtir dingin Davida lungril a chok tho a, "Fe la, Israelhai le Juda mihai tiem vong rawh" a ta.
2. Chuongchun, lal chun Joab le sipai kawmandarhai kuomah, "Fe unla, Dan-a inthoka Beersheba chen inkara Israel mi ral do thei chin ieng zat am an um ti ka hriet theina dingin va tiem vong ro" a ta.
3. Joab chun lal kuomah, "LALPA i Pathien chun i mipuihai a let zain sukpung sien la, chu chu lalin a mit ngeiin hmu hman raw se. Amiruokchu, ieng leiin am ka pu, lal hin hieng thil hi i thaw chak a na?" a ta.
4. Joab le sipai kawmandarhai thu nekin lal thu chu a hrat lem si leiin Israelhai tiem dingin lal chu an suoksan ta a.
5. Jordan ral an kai a, Gad-hai ram tieng panna, ruom lailunga khuo Aroer sim tieng chun an inkul a, Gad ram chu fe thlengin Jazer chen an fe a.
6. Chun, Gilead ram le Tahtim Hodshio bielah an fe nawk a, chu taka inthoka fe peiin Sidon vela Dan Jan an tlung a.
7. Chun, Tura kul an va tlung a, Hiv-hai le Kanan mihai khuo po po an sir a, chu zoah Judai ram sim tieng Beersheba-ah an fe a.
8. Judai ram po po an fang suok hnung chun, thla kuo le ni sawmhni hnungah, Jerusalemah an hung kir nawk a.
9. Joab chun mihriem an tiem zat chu lal kuomah a ripawt a, kawlhnam chawia ral do thei chin Israel rama mi chu nuoi riet an ni a, Judai rama mi chu nuoi nga an nih.
10. A mihai a tiem zo hnungin Davida chun lungrila inthiemnawna nasa tak a hung nei ta a. LALPA kuomah "Ka thilthawa hin nasa takin ka suol a nih. Tuhin aw LALPA, i siehlaw thiemnaw changna hi la hmangpek hram dingin ka ngen che. Thil invetthlak tak ka lo thaw a nih" a ta.
11. A zinga chun Davida tho hmain LALPA thu chu Davida zawlnei, zawlnei Gad kuomah a hung tlung a:
12. "Fe la, hieng ang hin Davida hril rawh: 'Hi hi LALPA thu chu a nih: thil kong thum thlang ding ka pek che laia mi hi i chunga tlung dingin pakhat thlang rawh' a tih" tiin.
13. Chuongchun, zawlnei Gad chu Davida kuomah a fe a, a hril a, "I rama hin kum sarip tam intlaktir am, thla thum sung i hmelmahai hnot lenga um am, an naw leh i rama ni thum sung hripui inlengtir, a ieng am i thlang a? Tu hin inngaituo la, a mi tirtu kuoma ka hril ding thu tlukna siem la, mi hril rawh" a ta.
14. Davida chun Gad kuomah, "Ka bei a va hang dong ngei de! LALPA kutah tlu lut phot ei tiu, zangaina a hau si a. Mihriem kuta chu mi pe lut naw hram rawh" a ta.
15. Chuongchun, chu tuka inthoka ni thum sung chu Israel mihai chungah LALPAN hripui a'n lengtir a, Dan le Beersheba inkarah mi singsari an thi a.
16. Chun, vantirkoin sukse dinga Jerusalem tieng ban a phar lai chun, an siet tuok ding laka chun LALPA lung a na em leiin kut a'n hnukkirtir a, mipuihai hremtu vantirko kuoma chun, "A hun tah! I kut kei kir ta rawh" a ta. Chu lai chun LALPA vantirko chu Jebu mi Arauna hrizawla ngir a nih.
17. Davidan mi sukhlumtu vantirko a hmu chun LALPA kuomah, "Thilsuol thawtu chu keima hi ka na, ka thaw indik naw a nih. Mi danghai hi chu beram ang mei mei an nih. Iem suol thaw an nei hrim a? I kut chu kei le ka sunghai chunga hin thlak lem rawh" a ta.
18. Chu ni chun zawlnei Gad chu Davida kuomah a fe a, "Fe tung la, Jebu mi Arauna hrizawlah LALPA ta dingin maicham hang siem rawh" a ta.
19. Chuongchun, LALPAN Gad hmanga thu a pek angin, Davida chu a fe tung a.
20. Chun, Arauna chu a ngha vel a, ama tieng pana hung lal le a mihai chu a hmu a, a suok a, a hmaah hnuoi sika bokkhupin lal chu chibai a buk a,
21. Arauna chun, "Ieng leiin am ka lalpa, ka pu chu a siehlaw kuomah a hung el am an ta le? a ta. Davida chun, "Mipuihai laka hri a'n kieng theina dinga LALPA ta dinga maicham siemna ding i hrizawl inchaw dinga hung ka nih" a ta.
22. Arauna chun Davida kuomah, "Ka pu, ka lal chun awm a ti ang ang chu la sien, inthawina chu inhlan raw se. En ta, pumraw thilhlana ding bawngchal le thing ti ding hrizawl dap thingphek le bawng ringkolhai khom a um annawm.
23. Aw lalpa, Arauna chun hieng po po hi lal a pek vong a nih" a ta. Chun, Arauna bok chun lal kuomah, "LALPA i Pathien chun lo pom che raw se" a ta.
24. Sienkhom lal chun Arauna kuomah, "Ni lo e, a man pek ngeiin ka'n chawk ding a nih. Ieng khom seng loin LALPA ka Pathien hmaah pumraw thilhlan inhlan naw top ka tih" a ta. Chuongchun, hrizawl le bawngchalhai chu tangkaruo shekel sawmnga pein Davida chun a'n chawk a.
25. Chu taka chun Davidan LALPA ta dingin maicham a siem a, pumraw thilhlan le inremna thilhlan a'n hlan a. Chuongchun, LALPA chu a ram chungah a lungawi a, Israel rama inthokin hri inleng chu a'n kieng ta a.
←  2Samuel (24/24)