2Samuel (23/24)  

1. Hienghai hi lal Davida thuhril nuhnung tak chu a nih: Jesai naupa Davida, Chunghnungtakin a chawimawi, Jakob Pathienin hriek a nal, Israelhai laia zaipu chun hieng hin a hril:
2. "LALPA Thlarau chun a thu,Keima hmangin a hung hril a,A thu chu ka leiah a um.
3. Israelhai Pathien chun a hril,Israelhai Lungpui ngei chun:'Mi chungah indik taka thaw a,Pathien ti puma ro rel hlaktu chu,
4. Sum um lo zing khaw thieng a,Ni var mawi suok ang hi a na,Raw sur zo khaw inthieng a,Thlai hung har sieu ang a nih.
5. "Ka sungkuo hi Pathien lakah,Chuong ang chu a ni naw am a ni?Chatuonin thu mi thlungpuiin,Iengkim sukfelin a suknghet a. Mi sandamin ka duthusam,Tinreng a mi pek naw dim a ni?
6. Mi suolhai ruok chu hling angin,Hnawma peihawnin um an ta,Kuta lak khawm thei an ni nawh;
7. Hling tawktu chun thir hriemhrei le Chem sei ngei a hmang lem a,A hmunah an raw hmang hlak".
8. Hienghai hi Davida sipai huoisen le hmingthanghai chu an nih: Takemon mi Jose-Basebet chu sipai hotu lien pathum laia a lu tak a nih. Ama hin tum khata inbeinaah a fei ringotin mi zariet a that.
9. Ama dottu chu Aho mi, Dodai naupa Eleazar a nih. Ni khat chu indo dingin Filistinhai an pung khawm a, an hung cho a, Israel mihai an fe hmang vong tum a ni si leiin Davida le sipai pathum chauin an lo bei a, chuonghai laia pakhat chu a nih.
10. Ama chu a tho a, a kut a kham taluo leia a kawlhnam a hlang thei ta naw chenin Filistinhai chu a that ngat ngat a, chu ni chun LALPAN nasa takin a ngampek a; Israel sipaihai chu a hnungin rallak sum inchu ding ringotin Eleazar kuoma chun an hung kir nawk a nih.
11. Chu dottu chu Harar mi Age naupa Sama a nih. Lehi khuoa dailuo bilah Filistinhai an pung khawm a, Israel mipuihai chu an tlansie a.
12. Nisienlakhom, ama chu chu hmuna chun a ngir a, a veng tlat a, Filistinhai chu a that ngat ngat a, LALPAN nasa takin a'n ngamtir a.
13. Busik hun lai hin sipai huoisen sawmthum thlang suok laia pathum chu Davida kuomah Adulam pukah an fe a, Filistin mihai chu Refaim Ruomah an inkul a.
14. Chuong lai chun Davida chu kulah a um a, Filistin sipai pawl khat chu Bethlehemah an inkul a.
15. Davida chun tui a chak em em el a, "Bethlehema tuikul tui, kul kotkhar bula um kha dawn dinga mi chawipek ding um hai sien la chu aw" a ti vong vong a.
16. Sipai huoisen pathumhai chun Filistin sipaihai riebuk chu tawn tlangin, kul kotkhar bula um Bethlehem tuikula tui chu an hang chawi a, Davida kuomah an fepui a, sienkhom dawn loin LALPA ta dingin a bun thlak ta lem a.
17. "Aw LALPA, hi hi chu thaw naw top ka tih; thi huoma fehai thisen chu ka dawn ding am a ni?" a ta, chu lei chun a dawn nuom naw a nih. Chuong thilhai chu mi huoisen pathumhai chun an thaw a nih.
18. Zeruia naupa Joab unaupa Abisai chu mi huoisen sawmthum laia hotu tak a nih. Ama chun a feiin mi zathum a bei a, a sunhlum vong a, anni sawmthum lai chun hming that a hlaw chungchuong a.
19. Anni sawmthumlai chun chawimawi a phu bik hrim a ni naw am a ni? Amiruokchu, mi huoisen pathum an tihaii lai chun tiem sa a ni ve nawh.
20. Kabzeel mi huoisen naupa Jehoiada naupa Benaia, thil nasa tak tak thawtu chun Moab mi huoisen pahni a that a, chu zoah a fe thlak a, vur tlak hun lai hin puka intom sakeibaknei a that nawk a.
21. Chun, Aigupta mi lien tak el a that bok a. Aigupta pa chun fei a chawi a, Benaia chun hmol chau chawiin a zu pan a, a fei chu a lakpek a, ama fei ngei chun Aigupta mi lien chu a sunhlum a.
22. Chuong ang thil chu Jehoiada naupa Benaia chun a thaw leiin mi huoisen sawmthumhai lai chun hming that a hlaw a.
23. Mi sawmthumhai nek chun chawimawi chungchuong a ni hrim a, sienkhom mi huoisen tak pathumhai lai chu tiem sa a kai phak ve nawh. Davidan ama vengtuhai hotuah a sie a.
24. Mi huoisen sawmthum laia thanghai chu: Joab unaupa Asahel hai, Bethlehem khuoa mi Dado naupa Elhanan hai,
25. Harod mi Sama hai, Harod mi Elika hai,
26. Pal mi Helez hai, Teko mi Ikes naupa Ira hai,
27. Anathot mi Abiezer hai, Husat mi Mebunai hai,
28. Aho mi Zalmon hai, Netofat mi Maharai hai,
29. Netofat mi Baana naupa Heled hai, Benjamin mi Gilead-a inthoka hung Ribai naupa Ithai hai,
30. Pirathon mi Benaia hai, Gaash varuoma mi Hidai hai,
31. Arbat mi Abi-Albon hai, Barhum mi Azmavet hai,
32. Salbon mi Eliaba, Jasena nauhai laia mi Jonathan hai,
33. Harar mi Sama hai, Harar mi bok Sarar naupa Ahiam hai,
34. Maakat mi Ahasbai naupa Elifelet hai, Gilon mi Ahitofel naupa Eliam hai,
35. Karmel mi Hezro hai, Arba mi Parai hai,
36. Zoba khuoa mi Nathan naupa Igal hai, Gad mi Bania hai, Hagri (Hagadi) naupa hai,
37. Amon mi Zelek dam, Zeruia naupa Joab ralthuom chawitu Beerot mi Naharai hai,
38. Jatir mi Ira le Gareb hai, Hit mi Uria hai an nih.Hienghai hi sipai huoisen hmingthang an na, an rengin sawmthum le pasari an nih.
39. (A um nawh)

  2Samuel (23/24)