2Samuel (21/24)  

1. Davida inlal laiin a zawnin kum thum tam a tla a. Davida chun LALPA a rawn a, LALPA chun "Saula lei le a sunghai thisen insuo lei a nih, Gibeon mihai an that si a" a ta.
2. Lal chun Gibeon mihai chu a ko a, a'n biekpui a. (Gibeon mihai chu Israel thlahai ni loin Amor mi la um sunhai an ni lem a, Israel thlahai chun anni chu hum dingin thu an lo inkham ta a, sienkhom Israelhai le Judahai ta dinga thahnem a ngai luotah Saula chun sukchimit a tum tawl a nih).
3. Davida chun Gibeon mihai kuomah, "Ieng am ka thawpek thei ding cheu? LALPA rohai chu mal in sawm theina dingin ieng ang inremna am ka siempek ding cheu a na?" a ta.
4. Gibeon mihai chun, "Saula le a sunghaia inthok hin tangkaruo le rangkachak kan ngiet thei naw a, Israel mihai sukhlum theina kan nei bok nawh" an ta. Davida chun, "Ieng am ka thawpek cheu in nuom a? a ta.
5. Anni chun lal kuomah, "Mi suksetu le Israel ram sunga hrim hrim um lo dinga mi sukchimit tuma phiertu chu hieng hin thaw la,
6. a naupa pasarihai chu mi pe suok la, LALPA mi ruot Saula umna Gibea khuoah LALPA hmaah khai hlum kan tih" an ta. Lal chun, "Peng ka ti cheu" a ta.
7. Davida le Saula naupa Jonathanin LALPA hmaa thu an lo intiemkam leiin lal chun Jonathan naupa Mefiboset hringna ruok chu a hla a.
8. Lal chun Aia naunu Rizpa-in naupa pahni Saula a hringpek Armonia le Mefiboset hai le Meholat mi Barzilai naupa Adriel laka Saula naunu Mikal-in naupa panga a hringpek hai chu a thuoi a,
9. Gibeon-hai kutah a pek a, anni chun LALPA hmaah tlanga chun an khai hlum a. Chuongchun, an pasari chun hmun khatah an thi vong a, chu chu bu sik hun, barli an sik tan hun vel a nih.
10. Chun, Aia naunu Rizpa, Saula hmei chun saiip a lak a, bu an sik huna inthoka ruotui tlak hun chenin an ruong inkhaina hmun lungpuia chun a umna dingin a zar a, an ruong chu ieng khomin tawk lo dingin sunah vatehai lakah a veng a, zanah ramsahai lakah.
11. Chun, Aia naunu Rizpa, Saula hmei thilthaw chu Davida an hril a.
12. Chuongchun, Davida chu a fe a, Jabes Gilead-a inthokin Saula le Jonathan ruro chu a hang inkhawm a (Filistin mihaiin Gilboa tlanga Saula an that hnungin an ruong chu Bet Shan kotthlerah an khai a, chu taka inthok chun Jabes Gilead mihaiin a rukin an hang lak a nih).
13. Davida chun chutaka inthok chun Saula le Jonathan ruro chu a hung chawi a, chu hmuna an thathai po po ru, phum loa umhai chu a'n khawm vong bok a.
14. Saula ru le a nauhai ru chu Benjamin rama Zela khuoa a pa Kisa thlanah an phum a, lalin thaw dinga a ti ang peiin an thaw a. Chu taka inthok chun a ram chungah Pathien a lungawi ta a.
15. Filistin mihai le Israel mihai chu an hung indo nawk a. Davida chu a mihai leh Filistinhai bei dingin a fe thlak a, sienkhom a hung chau ta hle a.
16. Chun, Ishbi Benob, mi lien Rafa thlahai laia mi pakhat, a dar fei hmor zum ringot khom kilogram thum le a chenvea rik chawi le kawlhnam thar pai chun Davida that a tum a.
17. Nisienlakhom, Zeruia naupa Abisai chun a san a, Filistin mi chu a bei a, a that ta a. A mihai chun Davida kuomah, "Israelhai khawnvar a mit nawna dingin indonaa chu kan kuomah hung thla ve ta der naw ti nih" tiin a chungah an inkham a.
18. Chuong hun vel lai bok chun Gob khuoah Filistinhai leh an indo a, Husat mi Sibekai chun mi lien naupahai laia mi Safa, Rafa thlaa mi chu a that a.
19. Hmun danga Filistinhai le indonaah Jare Oregim naupa Elbanan, Bethlehem mi chun Goliat unaupal a that bok a, a fei ngul chu puonkhawngna themtlang tiet a nih.
20. Chun, Gath khuoah indona a um nawk a, chu taka chun pa dung insang tak el, a kut khing hni ve veah kutpar paruk le a ke khing hniah kepar paruk ve ve, a renga sawmhni le pali nei hi a um a, ama khom chu mi lien laka pieng a nih.
21. Ama chun Israel mihai chu a va deusaw a, Davida unau Simei naupa Jonathan chun a lo that a.
22. Chuong mi palihai chu Gath khuoa mi lien Rafa laka pieng an na, Davida le a mihai kutah an thi ta vong a nih.

  2Samuel (21/24)