←  2Samuel (20/24)  →
1. Chun, chu taka chun Benjamin hnama mi Bikri naupa a hming Seba, buoina siem ching mi a um a. Ama chun tawtawrawt a mut a, "Davida lakah chan ei nei der nawh, Jesai naupa lakah thangna ei nei ve nawh, aw Israel mihai, in in tieng inlawi vong ro" tiin a khek a.
2. Chuongchun, Israel mihai po po chun Davida an zamsan a, Bikri naupa seba chu an zui ta hum hum a. Juda mihai ruok chun Jordana inthoka Jerusalem chenin an lal chu an thlathlam nawh.
3. Davidan a lal in a tlung chun in enkol dinga a maksan a hmei sawmhai chu a thuoi a, vengtu hnuoiah a khum a, an fak le dawn a tumpek a, sienkhom a zalpui ta naw a, hmeithai anga khawsain an thi chenin a khum hrang tawl tah a nih.
4. Chun, lal chun Amasa kuomah, "Juda mihai ko khawm la, ni thum sungin nang leh hi taka hin hung inlang ro" a ta.
5. Amasa chu Judahai ko khawm dingin a fe a, sienkhom lalin hun a ruotpek nekin a thang sawt a.
6. Davida chun Abisai kuomah, "Bikri naupa Seba hin Absalom nekin ei poi a tawk nasa lem ding a nih. Chuleiin, i pu mihai hi thuoi la, hnot ro khai; chuong naw chun kul nei khuoa dam lut hman a ta, ei kuta inthokin suok hlauh rawi a tih" a ta.
7. Chuongchun Joab rawihai, Keret mihai, Pelet mihai le an mi hrathai po po chu Abisai inrawina hnuoiah Bikri naupa Seba hnot dingin Jerusalema inthokin an inthok suok a.
8. Gibeon lungpui umna an va tlung chun Amasa-in anni chu a lo hmuok a. Chun, Joab chun a ralthuom a hak a, a chungah kawlhnam, a pai chopin a kawngchunah a pai a, a hang lawn chun a kawlhnam chu a paia inthokin a hung indok a.
9. Joab chun Amasa kuomah, "Unaupa, i dam de maw?" a ta. Joab chun Amasa chu fawp dingin a kut chang tiengin a khakhmulah a chel a.
10. Amasa chun Joab kawlhnam chawi chu a lo ringhla naw a, Joab chun a phingah a sun a, a ril a hung dawk thla pur a, sun non ngai loin a thi ta nghal a. Chu zoah Joab le a unaupa Abisai chun Bikri naupa Seba chu an hnot a.
11. Chun, an bula ngir Joab rawihai laia tlangval pakhat chun, "Joab tieng le Davida tienga thang taphot chun Joab zui pei ro" a ta.
12. Lam lailung takah ama thisena inbuol Amasa hmu taphot chu an chawl chat pei ti chu tlangval chun a hmu leiin a ruong chu lamliena inthokin phulah a hnuk phei a, puon a'n khum a.
13. Lamliena inthoka Amasa ruong a son hnung chun Bikri naupa Seba hnot dingin mi po po chun Joab chu an zui ta a.
14. Seba chun Abel le Bet Maaka chena um Israel hnam tinhai ram chu a sir bakah Bikri mihai biel khom a sir a, chuongchun mihai chu an hung pung khawm a, ama chu an zui ta a.
15. Joab sipaihai chu an hung a, Seba chu Bet Maaka-ah an inhuol a. Kul bang hrulah a vel tuokin hnuoi an deng pawng a, kul chu sukchim tumin an sut bur bur a.
16. Khuoa inthok chun nuhmei var pakhat hi a hung khek a, "Joab kha hung ko unla, a kuomah thu lo hril ka tih" a ta.
17. A kuom chu a va pan hnai a, nuhmei chun, "Joab i ni maw?" a ta, ama chun, "Ni e" a ta. Ama chun, "I bawinu thu hril hi ngaithla rawh" a ta, Joab chun, "Ka ngaithlak annawm" a ta.
18. Nuhmei chun, "Tien lai chun, 'Abel khuoah thurawn va la rawh' an ti hlak a, chuong ang chun thu an sukthluk hlak.
19. Keini hi Israel mihai laia inremna dit pawl le ringum pawl kan ni a, nang ruok chun Israelhai khaw hlun hi suksiet i tum a ni hi. LALPA ro chu ieng dinga sukram i tum am a na?" a ta.
20. Joab chun, "Chuong ang chu a ni awzawng nawh, sukram amanih suksiet amanih kan tum naw hrim hrim.
21. Chuong ang tieng chu a ni nawh. Efraim tlangrama mi Bikri naupa Seba chun lal dodalin, Davida lakah kut a lek a, ama chu mi pe suok unla, in khuo hi suoksan el kan tih" a ta. Chu nuhmei chun Joab kuomah, "Ngai ta, a lu chu kula hin hung deng thlapek kan ti che" a ta.
22. Chuongchun, nuhmei chun a varna hmangin mipui hai kuoma chun a fe a, Bikri naupa Seba lu chu an tan a, Joab umna tieng chun an deng thlak a. Chuongchun, tawtawrawt a mut a, mani in tieng seng panin khuoa inthok chun an suok dar ta a. Joab chu lal kuom tieng Jerusalemah a kir nawk ta a.
23. Joab chu Israel sipai po po chunga hotu a na; Jehoiada naupa Benaia chu Kerethai le Pelethai hotu a na;
24. Adoniram chu sinthawa an sor luihai hotu a na; Ahilud naupa Jehosafat chu chanchin inchiktu le ziektu a na;
25. Seva chu ziektu a na; Zadok le Abiathar chu thiempu an na;
26. Jair mi Ira chu Davida thiempu a nih.
←  2Samuel (20/24)  →