←  2Samuel (2/24)  →
1. Chu hnunga chun Davidan LALPA a rawn a, "Judai ram khuo pakhata khin ka hang fe ding am a ni?" a ta, LALPA chun. "Hang fe rawh" a ta. Davida chun, "Khaw lai khuo am ka fe ding?" a ta, LALPA chun, "Hebron khuoah" a ta.
2. Chuongchun, Davida chun a nuhmeihai pahnih, Jezrel-a mi Ahinoam le Karmel-a Nabal nuhmei thisan Abigail hai chu thuoiin a hang fe a.
3. Davida chun a kuoma um a mihai chu an sungkuo seng leh a thuoi bok a, Hebron le a sevel khuoa hai chun umhmun an khuor a.
4. Chun, Judai rama mihai chu Hebron-ah an fe a, Juda sungkuohai chunga lal dingin Davida chu hriek an nal a. Anni chun Saula phumtuhai chu Jabes-Gilead mihai an ni thu Davida chu an hril bok a.
5. Davida chun Jabes-Gilead mihai kuomah mi a tir a, "In pu, Saula chungah lunginsietna suklanga in lo phum leiin LALPA chun malsawm cheu raw se.
6. LALPA chun in chungah ngilneina le ringumna inlangtir sien la, hieng thil in lo thaw lei hin kei khomin inngilneina man chu rul ka ti cheu.
7. Tu hin hrat tak le huoisen takin um ro, in pu Saula chu a thi ta a, kei hi Juda pahnamhaiin an chunga lal ni dingin hriek an mi nal tah bok a nih" tiin thu a thon a.
8. Chuong lai zing chun Nera naupa Abner, Saula kawmandar chun Saula naupa Isboset chu Mahanaim-ah a hung thuoi a,
9. Gilead hai, Asur (Aser) hai, Jezrel hai, Efraim hai le Israelhai po po chungah lalin a siem a.
10. Ro a rel tan kum chun Saula naupa Isboset chu kum sawmli mi a ni a, kum hni sung ro a rel hman a. Juda sungkuohai ruok chun Davida chu an zui lem a.
11. Juda chihai chunga Hebrona inthoka Davidan ro a rel sung chu kum sari le thla ruk a nih.
12. Nera naupa Abner le Saula naupa Isboset mihai chun Mahanaim maksanin Gibeon-ah an fe a.
13. Zeruia naupa Joab le Davida mihai khom an inthok suok ve a, Gibeon tuikhurah an intuok a, pawl khat chu ral khing tieng an um a, pawl dang chu tuikhur ral khing tieng.
14. Abner chun Joab kuomah, "Tlangvalhai inzat ve vein thlang suok inla, ei hmaa hin inbei raw hai se chu" a ta.
15. Chuongchun, Benjamin chia mi, Saula naupa Isboset mihai sawmpahni le Davida mihai sawmpahni chu an hung ngir suok a.
16. Mani bitum seng lu-ah an inman a, an bitum seng nakah kawlhnamin an insun a, an tlu ruol ta vong a. Chuleichun hi hmun hminga hin Helkat Hazurima an inbuk a, chu chu Gibeon-a um a nih.
17. Chu ni chun an inbei nasa hle a, Abner rawihai chu Davida rawihai chun an intlawm a.
18. Chu inbeinaa chun Zeruia naupa hai pathum Joab hai, Abisai hai le Asahel hai chu an thang a. Asahel chu sazukpui ang ela ngal hrat a nih.
19. Asahel chun Abner chu voi tieng le chang tieng khom pet der loin a hnot thlur ngat ngat a.
20. Chun, Abner chu a ngha kir a, "Nang i ni maw Asahel?" a ta, ama chun "Ni chieng e" a ta.
21. Abner chun, " I voi tieng amanih chang tieng amanih mi petsan la, tlangval pakhat kha man la, a ralthuom kha lakpek rawh" a ta, sienkhom Asahel chun pet nuom loin a hnot ngar ngar a.
22. Abner chun, "Mi hung hnot ta naw rawh. Ieng leiin am ka that ding che? Ieng tin am i u Joab hmel ka hmu ngam ta ding?" a ta.
23. Asahel chun a hnot lui pei tlat si leiin Abner chun a fei mong tiengin Asahel phinga chun a hnung tieng chen dawk purin a sun tlang a, chu hmuna chun a tlu a, a thi ta nghal a. Asahel thina hmun hung tlung taphot chu an ngir chat pei a.
24. Joab le Abisai ruok chun Abner chu an hnot pei a, Gibeon thlaler panna Gia sak tienga Ama muol an tlung chun nisa a tla ta a.
25. Benjamin thlahai chun Abner chu an hung pan khawm a, an intel khawm nawk a, tlang sipa chun thanghmun an khaw a.
26. Abner chun Joab kuomah, "Kawlhnamin ei insam zing el ding am a ni? Hi hin a tawpah intheidana chauh naw chu ieng khom a'n tlun naw ding a nih ti i hriet naw am a ni? Ieng tik am i mihai hi an unauhai hnot ta lo dingin thu i pek ding a na?" a ta.
27. Joab chun, "Pathien hringna salin ka hril hi, ieng khom hril loin um la chu ka mihaiin an unauhai chu zing khawvar chenin an hnot ding a nih" a ta.
28. Joab chun tawtawrawt a mut a, mihai chu an ngir thup a, Israelhai chu an hnot zui ta nawh.
29. Chu zan chun Abner le a mihai chun Araba pal tlangin zan khawvar an fe a, Jordan vadung an kan a, Bithron fe thlengin Mahanaim an tlung a.
30. Joab-in Abner a hnot khom chu a hung kir a, mipui a hang ko khawm vong chun Davida rawihai sawm le pakuo le Asahel chu an kim ta naw a.
31. Davida rawihai ruok chun Benjamin mihai le Abner mihai chu zathum le sawmruk an that a.
32. Chuongchun, Asahel ruong chu an lak a, Bethlehema a pa thlanah an phum a. Chun, Joab le a mihai chu zankhuoa fein zing khawvarah Hebron an tlung a.
←  2Samuel (2/24)  →