2Samuel (19/24)

← 2Samuel (19/24) →

Chun, Joab kuomah, "Lalin Absalom a sun a, a tap a tap el a nih" ti an hung hril a.

"Lalin a naupa lu a sun" ti sipai po poin an lo hriet chun, chu nia an hnena chu lu sunna ni-ah a hung inchang ta lem a.

Indonaa tlan hmanghaiin inzak taka khuo an lut ang elin chu ni chun indoa fe hung kirhai chun dei zotin khawpui an hung lut a.

Lal chun a hmai a hup a, "Aw ka naupa Absalom! Aw Absalom ka naupa, ka naupa!" tiin inring takin a tap a.

Chun, Joab chu lal inah a fe a, a kuomah, "Voisun hin nang le i naunu le naupahai le i nuhmeihai le i hmeihai hringna sansuoktu, i mihai po po i sukhmaimawk a nih.

A theidatu che i hmangai a, a hmangaituhai che i theida a. I kawmandarhai le i mi le sahai hi i ta dingin ieng khom an lo ni nawzie voisun hin i tar lang chieng hle a nih. Mi dang po thi hai sien khom Absalom a dam phot chun i hlim tho dingzie ka hmu tah.

Tu hin tho la, va suok la, i mihai va chokphur rawh. LALPA salin ka hril hi, i va fe suok naw chun voizan hin mi pakhat khom i kuoma um hmu ta naw ti nih. Chu chu i tleirawl laia inthoka tu chena i chunga vangduoina hung tlung po po laia a zuolkai tak ning a tih" a ta.

Chuongchun, lal chu a tho a, kul kotkhara chun a'n thung a, "Ngai ta u, lal chu kul kotkharah a'n thung" tiin mihai an hril dar a, an rengin lal hmaa chun an hung a. Israelhai ruok chu an in tieng seng an tlan kir nawk ta a.

Hmun tinah Israel thlahai lai nasa takin an insel a, "Lal chun ei hmelmahai laka inthokin a mi sanhim a, ama chu Filistinhai kuta inthoka mi sansuoktu a nih. Sienkhom tu hin Absalom leiin a tlan hmang ta a.

10.

Ei chunga lal dinga hriek ei nal Absalom hlak chu indonaah a thi ta bok si a. Iengti leia lal ko kir thu hi bau khat khom in hril puok naw am a na?" an ti sup sup a.

11.

Lal Davida chun thiempu Zadok le Abiathar hai kuomah thu a thon a, "Juda upahai kuomah hieng hin hril ro: 'Israel mihaiin lal thuoi kir ding thu an hril chun lal kuom a tlung ta si a, ieng dinga nangni hi a in tienga lal thuoi kir ding thua a vuoicha taka thang in tum am a na?

12.

Nangni hi ka unauhai, ka taksa le thisen inzompui ni bok si a, ieng leiin am lal thuoi kir thuah a awisawt tak ni in tum?' tiin.

13.

Chun, Amasa kuomah, "Ka thisen inzompui i ni naw am a ni? Tuta inthoka Joab aia ka sipai kawmandarah ka siem naw che a ni chun Pathienin a law law mi law sien la, chu neka nasa khom chun mi thaw raw se' a tih va ti rawh" tiin mi a tir a.

14.

Chu thu chun Judahai lungril a hne a, lungril hmunkhat an hung put ta a. Lal kuoma chun, "I mihai po po le khan hung kir nawk ta ro" ti dingin mi an tir a.

15.

Chuongchun, lal chu a hung kir nawk a, Jordan vadung a hung tlung a. Lo hmuok a, lal chu Jordan vadunga thuoi kai dingin Judahai chu Gilgalah an hung a.

16.

Bahurim khaw mi, Benjamin hnama mi Gera naupa Simei khom chu Juda mihai le chun Lal Davida hmuok dingin inhmaw takin a hung thla ve a.

17.

Simei chun Benjamin mi sangkhat le Saula sunghai siehlaw Ziba le a naupa sawm le panga le a siehlaw sawmhni a hung thuoi a, Jordan kama lal umna tieng chu inhmaw takin an pan a.

18.

Lal sungkuohai thuoi kai ding le lalin a ti ang ang thaw dingin ral khing tieng kaia chun an kai a.

19.

Gera naupa Simeiin Jordan ral a kai chun lal hmaah a bokkhup a, a kuomah, "Ka lalpa chun thiem naw changah mi sie naw hram raw se. Ka lalpa, ka puin Jerusalem a suoksan nia i siehlaw thil thaw suol kha mi hre pek zing loin, lal chun a lungrilah pai zing naw sien.

20.

I siehlaw hin thil suol ka thaw ti ka hriet a, chuleiin voisun hin Josefa sungkuo laia ka lalpa, ka pu hmuok dinga hung thla hmasa tak ka ni nghe nghe a nih" a ta.

21.

Chun, Zeruia naupa Abisai chun, "LALPA hriek nal tongsie inphurtu a ni leiin Simei hi sukhlum ding a ni naw am a ni?" a ta.

22.

Davida chun, "Nangni Zeruia naupahai, nangni mi lo hrietpek ding ieng am a um a? Voisun hin a mi dotuhai in ni naw am a ni? Voisun hin Israelhai laia mi hrim hrim sukhlum ding an ni am a ni? Voisun hin Israel mihai chunga lal ka ni hi ka hriet naw am a ni?" a ta.

23.

Chun, lal chun, "Simei, thi naw top i tih" tiin a kuomah thu a'n kham a.

24.

Chun, Saula tupa Mefiboset khom chu lal hmuok dingin a hung thla ve a. Ama chun lal a fe suok nia inthoka him taka a hung kir nawk ni chenin a kehai a tuoi nam naw a, a hner hmul a vaw naw a, a silfen khom a sawp bok nawh.

25.

Jerusalema inthoka lal hmuok dinga a hung thla chun lalin, "Mefiboset, ka kuomah ieng dinga i hung ve naw?" a ta.

26.

Ama chun, "Aw lalpa, ka pu, i siehlaw hi kebai ka ni leiin ka sabengtung chungah chuongin lal chu zui dinga inngai ka ni a, sienkhom ka siehlaw Zibain a mi hlem a.

27.

Ka lalpa, ka pu kuomah i siehlaw hi a hek bok a, sienkhom ka pu hi Pathien vantirko ang a ni leiin tha i ti ang angin thaw rawh.

28.

Ka pu Saula thlahai po po chu ka lalpa, ka pu hmaa hin sukhlum vong ding an ni lai zingin i siehlaw hi thlaithleng i otpuihai lai i mi'n thangtir a. Chuleiin, lal kuoma hin thil dang phut ngam ziezang ding awm ka la ni rop am a ni?" a ta.

29.

Lal chun a kuomah "Hril tam iem a ngai a? Nang le Zibain ram chu insem dingin thu ka pek cheu" a ta.

30.

Mefiboset chun lal kuomah, "Amain nei vong raw se; lalpa, ka pu chu him takin a hung tlung ta si a" a ta.

31.

Gilead mi Barzilai khom lal chu Jordan thuoi kaia a panna ding tienga inthla liem dingin Rogelama inthokin a hung thla a.

32.

Barzilai chu upa tak, kum sawmriet mi zet a ni ta a. Mahanaim-a lal a um sungin a fak dinghai a lo tum a, mi neinung tak a nih.

33.

Lal chun Barzilai kuomah, "Ka kuomah Jerusalem tieng hung kai ve la, ka chawm ding che annawm" a ta.

34.

Barzilai chun lal kuomah, "Ieng chen am dam ding ka la ni a, Jerusalema lal kuoma ka hang fe vena ding chu?

35.

Tu hin kum sawmriet ka ni ta a, a sie a tha thlier dukdak thei khom ka ni ta'm a ni? I siehlaw hin a fak a dawn inhnik le inhnik naw khom ka hriet hrang ta'm a ni? Pasal le nuhmei hla sak khom hre thei am ka la ni? Ieng leiin am i siehlaw hi ka lalpa phurrik belsatuah ka thang ding a na?

36.

I siehlaw hin lal ruola Jordan kai ve ka tum chauh a nih. Ieng dingin am lal chun chuong ang lawmin that man a mi rul kher ding?

37.

Lunginsiet takin i siehlaw hi mi'n kirtir nawk la, ka nu le pa thlan umna keini khuo ngeiah thi veng ka tih. Amiruokchu, en ta i siehlaw Kimham hi, lalpa, ka pu kuomah fe ve sien, a chungah tha i ti ang peiin thaw raw khai" a ta.

38.

Lal chun, "Kimham chu ka kuomah kai veng a ta, tha i ti ang peiin a chungah thawng ka ta, thil ieng khom a mi hni taphot chu thawpek pei ka tih" a ta.

39.

Chuongchun, mi po po chun Jordan ral an kai a, chu zoah lal khom chu a kai ve a, Barzilai chu a fawp a, mal a sawm a, ama hmun tieng a kir nawk ta a.

40.

Lal chu Gilgalah a kai a, Kimham chu a kuomah a kai ve a. Juda sipaihai po po le Israel sipai a zatve chun lal chu an thuoi a.

41.

Sawt nawte hnunga chun Israel mi po po chu lal kuomah an fe a, a kuomah, "Iem a ta kan unau Judahai hin an pumbil bik che a, lal le a sunghai le Davida mihai po po khom Jordan ralah an thuoi kai sa vong am a na?" an ta.

42.

Chun, Juda mihai chun Israel mihai kuomah, "Lal chu kan inhnaipui a ni lei a nih. Ieng leia hi thila hin in lung a sen am a na? Lal thil nei hi ringa khawsa am kan ni? Keini ta dingin lal thil nei ieng am lak kan nei ta hlak a?" an ta.

43.

Israel mihai chun Juda mihai kuomah, "Lal laka kan chan hi chan sawm a na, chu bakah Davida hi nangni neka hauh thei lem dai kan nih. Ieng leia hmusit taka in mi thaw am a na? Lal thuoi kir nawk thu hi a rot hmasa lemtu kan ni naw am a ni kha?" an ta. Juda mihai hlak chu Israel mihai neka tong inrum lemah an thang a.

← 2Samuel (19/24) →