2Samuel (18/24)  

1. Davida chun a mihai chu a khawm a, sipai sang chunga kawmandar le za chunga kawmandar ding a ruot a.
2. Davida chun a mihai chu a tir suok a, hmun thuma thea hmun khat chu Joab-in a'n rawi a, hmun thuma thea hmun khat chu Zeruia naupa Joab unaupa Abisai-in a'n rawi a, hmun thuma thea hmun khat dang chu Git mi Itai-in a'n rawi a. Lal chun mipuihai kuomah, "Keima ngeiin ka fepui ding cheu a nih" a ta.
3. Nisienlakhom, mipuihai chun, "Fe ve lo e khai. Keini hi chu tlan hmang khom ni inlang, mi uksak rak naw ni hai. A chenve khom lo thi ta inlang, ieng rakah ngai bok naw ni hai. Nang ruok chu keini let singa hlu lem i nih. Chuleiin, khawpuia inthoka i mi lo thangpui hi a tha lem" an ta.
4. Lal chun, "Tha in ti dan ang tak chu thaw pei ka tih" a ta. Chuongchun, lal chu kul kotkhar bula chun a ngir a, mipui chu a za tel tel le sang tel telin an suok zut zut a.
5. Chun, lal chun Joab le Abisai le Itai hai kuomah, "Keima leiin tlangval Absalom chu indoi takin va thaw ro" tiin thu a pek a. Absalom chungchang thua lalin thu a pek chu mipui khomin an hriet seng a.
6. Chuongchun, sipaihai chu Israel mihai do dingin indona hmun tieng an pan a, an indona chu Efraim ram ngawpui a nih.
7. Chu taka chun Davida mihaiin Israel mihai chu an hne a, singhni zet an that a.
8. Chuong lai ram pheka inbei chu an ni leiin kawlhnama thi nek hmanin ram ngawpuia thi chu an tam lem.
9. Absalomin Davida mihai a tuok thut chun a sabengtung chungah a chuong a, sabengtung chun saisuo thing buk hnuoiah a tlan lutpui a, a lu chu thing kaua chun a'n tang a, hnuoi tawk lo van tawk loin a'n khai a, a sabengtung hlak chu a tlan pei a.
10. Tuin amanih a hmu a, Joab kuomah, "Ngai ta, saisuo buka Absalom inkhai lai ka hmu" tiin a hril a.
11. Joab chun a hriltu kuomah, "Hmu sia ieng leia sukhlum a, hnuoiah i kei thlak naw? Chuongchun thaw la chu, tangka sawm le ka kawngchun hi ka pek ding che a ni bah!" a ta.
12. Mi chun a don a, "Tangka sang buk khom mi pe ding ni la, lal naupa chungah kut thlak naw ning. Kan hrieta ngei nang le Abisai le Itai kuomah, 'Keima leiin tlangval Absalom kha tu khomin tawk na naw raw se' tiin thu khom a pek cheu a ni kha.
13. Lal lakah ieng khom thup thei a ni si naw leiin, a lakah ringum loa a naupa thatin ka hringna sukderthawng ta lang, ka lakah nang i'n thierfihlim nawk dai awm si a" a ta.
14. Joab chun, "I zai nghakin um zing thei naw ning" a ta, fei pathum a lak a, saisuo buka intang, dama la um zing Absalom lunga chun a sun a.
15. Joab ralthuom chawitu mi sawmin Absalom chu an hung inhuol a, an sun hlum ta a.
16. Chu phing leh Joab chun tawtawrawt a mut a, Israelhai hnottu mipui chu an hung kir a, an hnot zui pei Joab-in a khap ta si a.
17. Chun, Absalom ruong chu an lak a, ramngawa khur lien taka chun an deng lut a, a chungah lung an deng bum thur a. Israelhai khom chu mani in tieng seng panin an tlan hmang ta vong a.
18. Absalom chun a dam laiin, "Nau pasal khom ka nei ve si naw leiin ka hming a thi nawna dingin" tiin Lal Ruomah dam lai lung a lo intieng khawm der ta a, a lung deng bum chu ama hming chawiin voisun chen hin 'Absalom hriet zingna lung bum' ti a la ni zing.
19. Chun, Zadok naupa Ahimaaz chun, "LALPA chun a hmelma kuta inthokin a san suok tah ti lal hril dingin tlan ka tih" a ta.
20. Joab chun, "Chu thu chu voisun ni khera nanga tlanpui ding a ni nawh. Ni dangah va hril de ti nih. Lal naupa chu a thi tah leiin voisun chu chanchin ieng khom va hril naw rawh" a ta.
21. Joab chun Kus mik kuomah, "Fe la, i thil hmu hi lal kuomah va hril raw leh" a ta. Kus mi chun Joab chu kunin chibai a buk a, a tlan ta nghal a.
22. Chun, Zadok naupa Ahimaz chun Joab kuomah, "Ieng khom hung tlung ding ni sien, Kus mi kha va hnot zui reng reng ka tih" a ta. Joab chun, "Ka naupa, lawmman hmuna chi chanchin hawn ding i nei si naw a, ieng leiin am i tlan ve ding?" a ta.
23. Ama chun, "Ieng khom ni sien, tlan ve ka nuom a nih" a ta. Chu phing leh Joab chun, "An leh, tlan ve el rawh"a ta. Ahimaaz chu phaizawl tieng lamah a tlan a, Kus mi chu a lekhel a.
24. Chun, kul kotkhar puo tieng le sung tieng inkara Davida a'n thung lai chun ralvengtu chu kul bang sawng chunga chun a hang kai a. A hei ngha vel chun mi pakhat hung tlan nal nal a hmu a.
25. Ralvengtu chun lal chu a zuk ko a, a thil hmu chu a zuk hril a. Lal chun, "Ama chaua hung a ni chun chanchin lawmum hawn ngei a tih" a ta, ama chun a hung pan hnai tiel tiel a.
26. Chu zo elah ralvengtu chun mi dang hung tlan a hmu nawk a, kotkhar vengtu a zuk ko khek a, "En ta, ama chaua hung tlan mi dang ka hmu nawk" a ta. Lal chun, "Ama khomin chanchin lawmum hung hawn ngei a tih" a ta.
27. Ralvengtu chun, "A hung tlan hmasa lem saw Zadok naupa Ahimaz hoi ka ti kher el" a ta. Lal chun, "Ama chu mi tha a na, chanchin lawmum a hung hawn hlak a nih" a ta.
28. Chu zo ela chun Ahimaz chu a hung khek a, lal kuoma chun "Iengkim a tha ie!" a ta. Lal hmaah hnuoi sikin a bokkhup a, a kuomah, "LALPA i Pathien chu chawimawiin um raw se. Lal, ka pu khingtu le a chunga kut thlak tumtuhai chungah LALPAN hnena a'n changtir che" a ta.
29. Lal chun, "Tlangval Absalom a dam de maw?" tiin a'n don a. Ahimaz chun, "I siehlaw Joab-in kei i siehlaw a mi tir lai khan an buoi mur mur ka hmu a, sienkhom ieng chie am a nih ti ka hriet nawh" a ta.
30. Lal chun, "Ka sira hin hung ngir phot rawh" a ta, a sira chun a va ngir a.
31. Chuong lai chun Kus mi chu a hung tlung ve a, lal kuomah, "Lalpa, ka pu ta dingin chanchin lawmum ka hung intlun ie; i chunga helhai po po phuba chu voisun hin LALPAN a lakpek ta che a nih" a ta.
32. Lal chun, "Tlangval Absalom chu a dam de maw?" a ta. Kus mi chun, "Lalpa, ka pu hmelmahai le i sietna zongtuhai po po chu, chu tlangval ang chun um vong raw hai se" a ta.
33. Chuongchun, lal chu a beidong hle a. Kul kotkhar chunga a pindan tieng chun a kai tung a, a tap a, a fe malam chun, "Aw, ka naupa Absalom! Ka naupa, ka naupa Absalom, i aiin thi lem chu ni lang maw! Aw, Absalom, ka naupa, ka naupa!" tiin a ta a.

  2Samuel (18/24)