←  2Samuel (17/24)  →
1. Chuong naw khom chu Ahitofel chun Absalom kuomah thurawn pein, "Mi singkhat le sanghni thlang suok ka ta, voizan hin Davida hnot dingin inthok suok ka tih.
2. A chau lai le a hrat naw lai tak va nangching ka ta, va sukthlabar ka ta, a kuoma mi um po po tlan hmang an ta, lal chu va that ka tih.
3. I mi zongpa a thi phot chun mipuihai chu tawk poi loin i kuomah hung thuoi kir nawk el ka tih" a ta.
4. A thil phan chu Absalom le Israel upahai chun tha an ti tlang a.
5. Sienkhom Absalom chun, "Ark mi Husai khom kha hung ko ro, iem a hril hang ngaithla veng ei tih" a ta.
6. Husai a hung chun Absalomin, "Ahitofelin hi thurawn hi a mi pek a. A rot ang hin ei thaw ding? I ngaidan hang hril ve ta" a ta.
7. Husai chun Absalom kuomah, "Tuta tuma Ahitofel thurawn pek che hi chu a tha nawh.
8. I pa le a mihai hi i hriet a, mi ral hrang, kolsen tak, phula savom huoi, a te lakpek ang el an nih. Chu bakah i pa chu ral bei thiem a na, zanah a sipaihai lai riek teu naw nih.
9. Tu khom hin puk amanih khaw lai amaniah inbing a tih. In sipaihai a hung bei hmasa vai chun, a ri hre taphot hril ding chu, 'Absalom zuituhai an that teu' ti ni el a tih.
10. Chuong a ni chun, in sipai huoisen tak hai, sakeibaknei lungril ang put mihai meu khom an lungril zam a ta, Israel mi po po hlak chun i pa chu sipai huoi tak a ni thu le a kuoma umhai chu sipai huoisen tak tak an nih ti an hriet vong si a.
11. "Ka thurawn pek ve chu hi hi a nih: Dan-a inthoka Beersheba inkara Israel mihai po po, tuipui kama tieu zat zeta tamhai chu khawm phot la, indonaah nangma ngeiin hma thuoi rawh.
12. Chuongchun, khaw lai hmuna khom ei tuok fukna taphotah, hnuoia daidaw tla ang elin, a tuomin tuom khum ei ta, ama le a kuoma umhai po po chu tu khom hla hrim nei nawng ei tiu.
13. Chu el bakah, khuoah a lut chun, Israel mi po poin hruihruol chawiin chu khuoa chun lut ei ta, a khaw pumin ieng hlek khom maksan lo khopin vadungah hnuk thla vong ei tih" a ta.
14. Chuongchun, Absalom le Israel mi po po chun, "Ark mi Husai remruot chu Ahitofel remruot nekin a tha lem" an ti a. LALPA chun Absalom chungah sietna an tlun theina dingin Ahitofel thurawn tha tak chu a'n hnawltir a nih.
15. Chuongchun, Husai chun thiempu Zadok le Abiathar kuomah, "Chuong ang khang ang chun Ahitofelin Absalom le Israel upahai rem a ruotpui a, chun, keiin chuong ang khang ang chun rem ka ruotpui bok a.
16. Chuleiin, 'Voisun chu thlalera vadung kaia dam riek ta loin kan ngei ngei ro, chuong naw chun lal le a kuoma um po po chu sukbohmang hlau rawi an tih' tiin Davida va'n hriltir vat ro khai" a ta.
17. Jonathan le Ahimaz chu En Rogel-ah an um a. Khawpuia an hung lut tu khomin an hmu chu a tha si naw leiin, an kuomah siehlaw nunghak tira va'n hriltira, anni chun Davida va hril sawng dingin rem an ruot a.
18. Amiruokchu, tlanglakte pakhatin anni chu a lo hmu a, Absalom a hril a. An pahni chun an tlan hmang nghal a, Bahurim-a mi pakhat, tuola tuikul nei inah an fe a, tuikula chun an lut a.
19. Nuhmei chun tuikul sinin a sin khum a, a chunga chun bu a em a, tu khom hriet thei a ni nawh.
20. Absaloma siehlawhai chu ina nuhmei kuoma chun an fe a, "Ahimaaz le Jonathan hai kha khaw lai am an um?" tiin an indon a, ama chun "Vadung an kan tah" a ta, an va zong a, sienkhom an hmu zo naw a, Jerusalem tieng an kir nawk ta a.
21. An liem phing leh tuikula inthokin an hung suok a, lal Davida chu an va hril a, a kuomah, "Suok unla, vadung kan inhmaw ro; hieng ang hin Ahitofel chun thu a phierruk a nih" an ta.
22. Chuongchun, Davida le a mihai po po chu an suok a, Jordan vadung chu an kan a, khuo a hung var chun a kan lo pakhat khom an um ta nawh.
23. Ahitofel chun a remruot ang an zawm nawh ti a hrietin a sabengtung a buotsai a, a suok a, an khuo tieng a fe a, a sunghai khawsak dan ding a rel fel vong a, a'n awk hlum a, a pa thlana chun an phum a.
24. Davida chun Mahanaim a va tlung a, Absalom le Israel mihai po po khomin Jordan chu an kan a.
25. Absalom chun Joab aiin Amasa chu sipai kawmandarah a sie a. Amasa pa chu Jether, Israel mi a na, a nuhmei chu Abigail a nih. Abigail chu Nahas naunu a na, a zuorpuinu chu Joab nu Zerui a nih.
26. Absalom zuitu Israel mihai chun Gilead ramah thanghmun an va khuor a.
27. Davidan Mahanaim a hung tlung chun Amon thlahai khuo Rabaa mi Nahas naupa Sobi le Lo Debara mi Amiel naupa Makir le Rogelima inthoka hung Gilead mi Barzilai hai chun,
28. "Mipuihai chu thlalerah phingtam dangcharin an chau zo tah" an ti leiin puonthuo dam, thleng dam, maihun dam, pil bel dam, bu dam, barli dam, beiphit dam, zeupuok dam, be dam, dailuo dam,
29. bawngnene dam, dahi dam, beram dam, bawngnene khal tlang dam Davida le a mihai ta dingin an hung chawipek a.
←  2Samuel (17/24)  →