← 2Samuel (16/24) → |
1. | Davidan tlang sip a pel hnung hla rak loa chun Mefiboset siehlaw Ziba chun hmu tumin a lo nghak a. Ama chun bei tluon zahni, grep bawr em tawl phek zakhat, theichang em tawl phek zakhat le uoiin peng khat phur sabengtung iemani zat a thuoi a. |
2. | Lal chun Ziba kuomah, "Hieng hi ieng dinga i hung chawi am?" a ta. Ziba chun, "Sabengtunghai hi lal sungkuohai chuongna ding a na, bei tluon le theihai hi tlangvalhai fak ding a na, uoiin hi thlalera chau taphothai dawn ding a nih" a ta. |
3. | Davida chun, "An leh, i pu tupa kha teh khawla'm iem a chang ta a?" a ta. Ziba chun, "Jerusalemah a um; 'Voisun hin Israel sungkuoin ka pu ram an mi pekkir nawk ding a nih' ti a beisei tlat an nawm" a ta. |
4. | Lal chun Ziba kuomah, "Mefiboset thil nei po po chu tu hin i ta a ni tah" a ta. Ziba chun, "Inza takin chibai ka buk che, aw ka lalpa le ka pu, i mit tlunga um pei ka nuom" a ta. |
5. | Lal Davidan Bahurim a tlung chun Saula sunghai laia mi, Gera naupa a hming Simei chu a hung suok a, tongsie a'n phur bor bor a. |
6. | A vengtuhai chu voi le changah umhai sienkhom Davida le a thoktuhai chu lungtein a deng a. |
7. | Simei chun tongsie inphurin, "Fe hmang dai rawh! Fe hmang dai rawh, nang thisen insuo hmang le mi rilopa! |
8. | A lalna i hlu suok Saula sunghai thisen phuba chu LALPAN i chungah a hung bun let che a, LALPA chun ram chu i naupa Absalom kuomah a pek tah a ni kha. Thisen insuo hmang mi i ni leiin i sietna i kei dok a ni khah" a ta. |
9. | Zeruia naupa Abisai chun lal kuomah, "Iengti dana hi ui thi sa hin ka lalpa hi tongsie a'n phur ngam am a na? Feng ka ta, a lu va tan bong ka tih" a ta. |
10. | Sienkhom, lal chun, "Nangni Zeruia nauhai le kei hin inangna iem ei nei a? LALPAN, 'Davida saw tongsie inphur rawh' a ti leia a mi'n phur a lo ni lem chun, nang le keiin, 'Ieng leia hieng thil hi i thaw am a na?' ei ti thei ding am a ni?" a ta. |
11. | Chun, Davida bokin Abisai le a thoktuhai kuomah, "Ka naupa ngei ngei, ka taksa le thisen put ngei hmanin ka hringna lak a tum chun, hi Benjaminpa lem hin chu nasa nawkzuola mi soisak a tum naw ding am a ni? Tosan ro, LALPAN thaw dinga a hril leia tongsie a mi'n phur a ni chu. |
12. | Voisuna tongsie a mi'n phur leia ka rinum tuor hi LALPAN hmung a ta, a tha tiengin a mi rul nawk lem el thei bok a nih" a ta. |
13. | Chuongchun, Davida le a mihai chu an fe pei a, ral khing tlang panga chun Simei khom chu a fe a, fe malamin tongsie a'n phur ngat ngat a, lungtein a deng a, lung thil damin a the bok a. |
14. | Lal le a kuoma umhai po po chun chau hnepin Jordan an tlung a, chu taka chun an chawl hadam a. |
15. | Chuong lai chun Absalom le a zuitu Israel mihai chun Jerusalem an lut a, anni lai chun Ahitofel khom a thang a. |
16. | Chun, Davida ruolpa Ark mi Husai chu Absalom kuomah a fe a, "Lal chu dam sawt raw se, Lal chu dam sawt raw se" tiin chibai a buk a |
17. | Absalom chun Husai kuomah, "Hieng ang hi a ni maw i ruolpa i lunginsiet dan chu? Iengti dana i ruolpa kuomah i fe ve naw?" a ta. |
18. | Husai chun Absalom kuomah, "Fe ve naw ning. LALPA le hieng mipuihai le Israel mihai po poin an thlang thu thuin um ka ta, a kuomah um lem ka tih. |
19. | Chu bakah, tu rong am a na ka bawl ding? A naupa rong chu ka bawl ding a ni naw am a ni? I pa rong ka bawl ang char khan i rong khom bawl ka tih" a ta. |
20. | Absalom chun Ahitofel kuomah, "Iengtin am ei thaw ta ding a na? Thurawn mi pe raw leh" a ta. |
21. | Ahitofel chun, "Lal in nghaktu dinga i pain hmei a maksanhai hi zalpui rawh. Chuongchun, Israel mihai po poin i lakah i pa hnar a kir ti hung hrieng an ta, i tienga thanghai kut sukhrat sot i tih" a ta. |
22. | Chuongchun, Absalom ta dingin in chunga chun puon in an kei a, Israelhai po po mithmua chun a pa hmeihai chu a zalpui ta a. |
23. | Chuong lai chun Ahitofel thurawn pek taphot chu Pathien thu ang hiela an ngai a nih. Chuong ang chun Davida le Absalom khomin Ahitofel thu chu an ngai ve a nih. |
← 2Samuel (16/24) → |