←  2Samuel (14/24)  →
1. Lalin Absalom a ngai em em
2. Chuongchun Tekoa khuoa um nuhmei var tak el chu va thuoi dingin mi a tir a, a kuomah an hung thuoi a. Nuhmei kuoma chun, "Mithi pur do angin insiem la, lusun thuom inbel la, ieng khom innal naw la, nuhmei, ni tam tak mithi pur do tah angin um rawh.
3. Chun, lal kuomah fe la, ka hril ang che hin va hril rawh" a ta, a hril ding thu chu Joab chun a'n ba diem a.
4. Tekoa khuoa nuhmei chu lal kuomah a fe a, bawka hnuoi sikin inza takin chibai a buk a, "Aw lalpa, mi thangpui rawh" a ta.
5. Lal chun, "Iem a na i harsatna?" a ta. Ama chun, "Hmeithai el ka ni a, ka pasal a thi ta a.
6. I bawinu hin naupa pahni a nei a, an pahni chun an lo fenaah an insuol a, theltu ding tu khom an um si naw a, pakhat chun pakhat lem chu a sukhlum a.
7. Tuhin an pahnam po poin i bawinu hi an do hron a, 'A unaupa thattu chu a unaupa a that leia kan that ve theina dingin mi hung pe suok rawh, rohluotu ding chu sukbohmang nghal kan tih' tiin an mi nor a. Ka'n hnemna meiling nei sun an sukchimit chun, hi hnuoia hin thla nei lo le hming nei loin ka pasal an siem el ding a nih" a ta.
8. Lal chun nuhmei kuomah, "I in tieng kir nawk ta la, i chungchang thua chun thupek insuong ka tih" a ta.
9. Tekoa khuoa nuhmei chun, "Aw lalpa, bawsietna maw chu ka chunga le ka pa sunghai chungah tla sien la, lal le a lalthungpha chun a maw phur naw raw se" a ta.
10. Lal chun, "Tu khomin ieng khom an hril chun, ama chu ka kuomah hung thuoi la, sukbuoi nawk ta naw ni che" a ta.
11. Ama chun, "Ka naupa hi an sukbohmang nawna dingin, thisen phuba la tumtuhai laka veng him dingin lal chun LALPA Pathien kuomah dawvan mi kaipek raw se" a ta. Lal chun, "LALPA hringna salin ka hril hi, i naupa chu a samzai pakhat khom hnuoia hin tla naw nih" a ta.
12. Nuhmei chun, "I siehlaw hin ka lalpa, lal kuoma hin thu bau khat chauh hang hril nawk hram raw se aw" a ta. Lal chun, "Hril ta la" a ta.
13. Nuhmei chun, "An leh ieng leiin am Pathien mihai kal zawnga hieng anga lalin thil poi a thaw? A naupa tlan hmang hung kir ding a phal si naw chun tuta a thu hril chun lal chu ama le ama thiemnaw changin a'n siem a ni naw maw?
14. Hnuoia tui sukbuok ta hnung rut nawk thei lo anga thi vong ding chu ei ni ngei a. Pathien khomin mithi ta hnung chu a hung thuoi kir nawk ta ngai nawh. Amiruokchu, lal chun mi tlan hmang chu a hung thuoi kir nawk thei annawm.
15. Chun, lalpa, ka pu kuoma thu hril dinga ka hung khom hi mihai ka ti lei a nih. Ka lungrilin, 'Lal kuomah hril phot ka ta, lal chun a bawinu hnina chu a lo inhlawtlingtir khiet el thei a.
16. Chun, ka thu mi ngaithlapekin, LALPA ro mi pek, kei le ka naupain hluo thei lo dinga mi sukbohmang tumtu lakah a mi san suok el rawi mawh' ka ti a.
17. Chuongchun, i bawinu ta ding hin ka lalpa, ka pu thu chu thlamuongum tak ni sien la, a sie a tha hmu fie thei dingin ka lalpa, ka pu chu Pathien vantirko ang a ni si a. LALPA Pathien chu i kuomah um raw se" a ta.
18. Lal chun nuhmei kuomah, "Thu ka'n don taphot che chu ka lakah ieng khom ip naw raw aw" a ta. Nuhmei chun, "Ka lalpa, ka pu chun hang hril sien tie" a ta.
19. Lal chun, "Hieng thua hin Joab-in thangna a nei hrim hrim am?" a ta. Nuhmei chun, "Ka lalpa, ka pu, i hringna salin ka hril, ka lalpa, ka puin a hril tah chu tu khomin chang tieng amanih voi tieng amanih pumpel thei naw ni hai; a nih, i siehlaw Joab chun a mi tir a, hieng thu po po hi ama mi'n ba vong a nih.
20. Thil um dan sukdanglam dingin i siehlaw Joab chun hieng thil hi a thaw a nih. Hi rama thil tlung po po hre fie vong thei dingin Pathien vantirko angin ka pu hi i var si a" a ta.
21. Chun, lal chun Joab kuomah, "A tha chu, thawng ka tih. Tlangval Absalom chu va thuoi kir rawh" a ta.
22. Joab chun hmaia hnuoi sika bokkhupin chibai a buk a, lal chu mal a sawm a, "Aw lalpa, ka pu, lalpa chun a siehlaw hnina chu a'n hlawtlingtir leiin voisun hin i siehlaw hin i mit ka tlung ti ka hriet tah" a ta.
23. Chuongchun, Joab chu a tho a, Gesur-a chun a fe a, Absalom chu Jerusalemah a hung thuoi a.
24. Lal chun, "Ama in tieng fe sien la, ka hmel ruok chu hung hmu naw raw se" a ti leiin Absalom chun a in tieng a pan a, lal hmel chu a hmu ta naw a.
25. Israel mihai po po lai Absalom anga hmel thata inpak hlaw tu khom an um naw a, a ke hmawra inthoka a lu sip chenin soiselna ding hrim a um nawh.
26. A sam a tha em leiin a rik a, a'n khattawkin lu a vaw a, a vaw zatin a sam chu a buk a, lal bukna hmanga bukin kilogram hni a tling hlak.
27. Absalom chun naupa pathum le naunu hmel tha tak el pakhat Tamar a nei a.
28. Absalom chu lal hmel hmu loin kum hni zet Jerusalemah a um a.
29. Chun, lal kuoma tir dingin Joab a'n cha a, sienkhom a hung nuom naw a. An cha non a, a la hung chuong naw a.
30. Chu phing leh a siehlawhai kuomah, "Joab lo chu ka lo kawla um a na, barli a ching a, va rawpek vong ro" a ta, Absalom siehlawhai chun lo chu an va raw a.
31. Chuongchun, Joab chu a tho a, Absalom inah a fe a, "Ieng leiin am i siehlawhaiin ka lo an raw?" a ta.
32. Absalom chun, "Ngai rawh, ieng leiin am Gesura inthokin ka hung a na? Chu taka chun um zing lang ka ta dingin tha lem ding" tia lal kuoma hril dingin tir che ka nuom a, ka'n cha che a; chuleiin lal hmel chu mi'n hmutir rawh, bawsiet ka nei chun mi sukhlum el raw se" a ta.
33. Chuongchun, Joab chu lal kuoma chun a fe a, chu thu chu a hril a. Lal chun Absalom chu a ko a, a fe a, a hmaah bawka hnuoi sikin a bokkhup a, lal chun Absalom chu a fawp a.
←  2Samuel (14/24)  →