←  2Samuel (13/24)  →
1. Chuong hun lai chun Davida naupa Amnon chun Tamar a ngaizawng a. Tamar chu Davida naupa Absalom farnu a na, nunghak hmel tha tak a nih.
2. Amnon chu a farnu Tamar lei chun damnaw khopin a beidong a; ama hlak chu nunghak thienglam a ni si a, a chunga thil iemani hang thaw chu a ta dingin thil thei lo tlukin a'n lang a.
3. Amnon chun ruol pakhat a hming Jonadab a nei a, ama chu Davida unaupa Simea naupa a na, mi dawha nei tak a nih.
4. Ama chun Amnon kuomah, "Ieng leia nang lal naupa ni si, a ni tela i hmai a zur tiel tiel am a na? A san i mi hril nuom naw maw?" a ta. Amnon chun, "Ka unaupa Absalom farnu Tamar ka ngaizawng lei a nih" a ta.
5. Jonadab chun, "Va zal la, damnaw tehlem thaw rawh. I pain a hung en pha che leh a kuomah, 'Ka farnu Tamar kha hung thei sien, bei fak ding mi hung pe sien la, ka mithmua ngei fak ding mi siempek sien, a kuta mi ngei chu lo fang ka tih' ti rawh" a ta.
6. Chuongchun, Amnon chu a zal a, a damnaw tehlem a. Lalin a hung en chun a kuomah, "Lunginsiet takin ka farnu Tamar hung sien la, ka hmua ngei hin bei inhnik tak siem sien la, a kuta mi ngei chu lo fang ka tih" a ta.
7. Davida chun Tamar kuomah, "I tapa Amnon in tieng fe la, fak ding va siempek raw khai" tia hril dingin lal ina chun mi a tir a.
8. Tamar chu a tapa Amnon ina chun a fe a, ama chu a lo zal zing a. Tamar chun bei phit a lak a, a hmet a, Amnon hmua chun beiper a siem a, a ur a.
9. A urna thlenga chun bei chu a va pek a, sienkhom a fak nuom naw a. Amnon chun, "Mi po po hin mi suoksan vong raw hai se" a ta, an suoksan ta vong a.
10. Amnon chun Tamar kuomah, "I kuta mi ngei ka fak theina dingin fak ding chu pindana hin hung la raw leh" a ta. Tamar chun a beiper siemhai chu a tapa pindana chun a chawi lut a.
11. Infaktir dinga a kawl hnaia a va fe chun a lo man a, a kuomah, "Ka farnu, hung zal ve rawh" a ta.
12. Tamar chun, "Ni lo e, ka tapa. Mi tilui naw rawh. Chuong ang thil chu Israel rama hin thaw ding a ni nawh. Hieng ang thil rilo hi thaw naw rawh.
13. Kei hi iem chang ka ta? Vantlang hmaah iengtin am ka ngha ngam ta ding? Nang khom iem i ni ding? Israelhai laia mi rilo le mi suola ngai hung ning i tih. Chuleiin, lal be lem la, i mi nei chu sel chuong naw nih" a ta.
14. Amiruokchu, a thu a ngaithlak nuom naw a, amanu nekin a tha a hrat lem si leiin a suollui a.
15. Chu zoa chun Amnon chun Tamar chu theida taktein a theida nawk si a, a ngaizawng laia a ngaizawngna nek daiin a theidana chu a sosang lem a. Amnon chun, "Tho la, fe hmang dai rawh" a ta.
16. Tamar chun, "Chuong el ding chu ni lo e, hienga indik lo taka i mi'n fetir tum hi ka chunga i thaw nek khan a tha naw lem hman a nih" a ta. Amiruokchu a thu hril chu a ngaithlak nuom chuong nawh.
17. Amnon chun ama rongbawltu siehlaw chu a ko a, "Hi nuhmei hi ka kuoma inthokin insuoktir la, kot kal tlat rawh" a ta.
18. A siehlaw chun a'n suoktir a, kot chu a sung tieng a kal a. Ama chun korfuol mawi taka chei a hak a, chu chu lal naunu, nunghak thienglamhaiin an hak hlak hrim a nih.
19. Tamar chun a lu-ah vut a phul a, a hak lai korfuol chei chu a pot thler a, a kutin a hmai a hup a, inring taka tap pumin a suok a.
20. A tapa Absolom chun a kuomah, "I tapa Amnon chun a tawkpoi che a ni maw? Ka farnu, to hram hram rawh, i tapa a ni si a. Tuor na taluo naw rawh" a ta. Chuongchun, Tamar chu a tapa Absalom inah mal takin a'n khum hmang ta dai a.
21. Nisienlakhom, lal Davidan chuong thil po po a hang hriet chun a lung a sen hle a.
22. Absalom ruok chun Amnon kuomah a sie a tha ieng khom a hril nuom nawh. A farnu a sukhmingsiet lei chun Absalom chun Amnon chu a theida hle a.
23. Kum hni a'n voi hnungin Absalom chun a beram hmul vawtuhai umna, Efraim-hai ramri bul, Baal Hazor-a chun lal nauhai po po a fiel a.
24. Absalom chu lal kuomah a fe a, "Ngai ta, i siehlaw hin beram hmul a'n vawtir a, lal le a siehlawhai khom i siehlaw thil lawmnaa chun an hung ve thei hram naw ding maw?" a ta.
25. Lal chun, "Ni lo e, ka naupa, kan reng chun ni lo e, sukrik taluo rawi kan ti che" a ta. Absalom chun a ngen raka chu a nuom chuong naw a, sienkhom mal a sawm a.
26. Absalom chun, "Chuonga i ti a ni si chun ka unaupa Amnon bek hi chu hung hram raw se" a ta. Lal chun, "Ieng leiin am a hung bik ding?" a ta.
27. Absalom chun a ngen tlat leiin Amnon le lal nau danghai chu a'n fetir a.
28. Absalom chun a siehlawhai kuomah, "Ngai ro, Amnonin uoiin a'n ruia a hlim lai tak, 'Amnon kha vaw hlum ro' ka ti pha leh that ro. Ti der naw ro. Thu ka pek cheu a ni naw am a ni? Hrat tak le huoisen takin um ro" tiin a hril tawl diem a.
29. Chuong ang chun Absalom siehlawhai chun Amnon chungah an thaw a. Chun, lal nau danghai po chu an tho a, an sabengtung chunga seng an chuong a, an tlan hmang ta a.
30. Lampuia an la thang zing lai chun Davida kuomah, "Absalomin i naupahai po po a that a, pakhat khom hla a nei nawh" tiin an hril a.
31. Lal chu a tho a, a silfenhai a pot thler a, tuongah a zal a; a siehlawhai po po khomin an silfenhai pot thlerin a bula chun an ngir a.
32. Sienkhom Davida unaupa Simea naupa Jonadab chun, "Ka pu chun lal nau tlangval po po a that vong ti an hril hi ring naw raw se, Amnon chauh a nih a thi. A farnu Tamar a suolluia inthok khan hieng ang hin thaw a tum hrim a nih.
33. Chuleiin pu, lal chun lal naupahai po po an thi vong ti thuthang hi ring naw raw se, Amnon chauh a nih a thi chu" a ta.
34. Absalom ruok chu a tlan hmang a. Chuong lai chun lal vengtu tlangval chu a hang ngha vel a, a ngirna thlang tieng tlang pang lampuia mi tam tak hung thla chu a hmu a, lal kuoma chun a zu fe a, "Horanaim tieng tlang panga mi tam tak hung thla ka hmu" tiin a hril a.
35. Jonadab chun lal kuomah, "En ta la, i siehlawin a hril ang char khan lal nauhai chu an hung tlung ta hi" a ta.
36. A hril zo charin lal nauhai chu an hung lut a, inring takin an tap a, lal khom chu a siehlawhai le chun lung na takin an tap a.
37. Absalom chu Gesur lal Amihud naupa Talmai kuoma chun a fe a. Davida chun a naupa chu ni tin a sun a.
38. Gesura Absalom tlan hmang chu kum thum a va um a.
39. Lal chun Amnon pur a do zo phing leh Absalom hmu a chak em em a.
←  2Samuel (13/24)  →