← 2Samuel (11/24) → |
1. | Thal lai, indoa lalhai an suok hlak huna chun Davidan a mihai le Israel sipaihai po po chu Joab rawiin a tir a, Amon mihai chu an va hne a, Raba khuo chu an inhuol a, Davida ruok chu Jerusalemah a um a. |
2. | Zan tieng voi khat chu ni nema hin Davida chu a lal in chungah a'n vak vel a, in chunga inthok chun nuhmei pakhat insil lai hi a hmu a, hmel tha a ti hle a. |
3. | Davida chun tu am a nih ti zong suok dingin mi a tir a. A mi tir chun, "Eliam naunu Bathsheba, Hit mi Uria nuhmei a nih" a ta. |
4. | Chu phing leh Davida chun mi a tir a, an hung thuoi a, a lo zalpui a, (nuhmei inthieng nawnaa inthoka a'n sukthieng zo hlim a na), a in tieng a kir nawk ta a. |
5. | Chun, nuhmei chu a hung inrai a, "Nau ka pai" tiin Davida chu a'n hriltir a. |
6. | Chun, Davida chun Joab kuomah, "Hit mi Uria kha ka kuomah hung tir rawh" tiin a'n cha a, Joab chun Uria chu Davida kuomah a tir a. |
7. | Uria a hung tlung chun Davidan Joab le sipaihai chu iem an chang a, indona iengtin am a fe pei ti thuhai a lo indon a. |
8. | Chun, David chun Uria kuomah, "I inah fe la, i ke va sawp rawh"g a ta. Uria chu lal ina inthok chun a suok a, lal chun thilpek a thon zui nghal a. |
9. | Amiruokchu, Uria chu lal in kotkhar bula chun a pu siehlawhai lai a riek a, a in tieng chun a fe nawh. |
10. | Uria chu a in tieng a'n lawi nawh ti Davida an hril chun Uria kuomah, "Hla taka inthoka hung i ni nawm am a ni? Iem a ta i in tieng inlawi loa i um?" a ta. |
11. | Uria chun Davida kuomah, "Pathien Bawm le Israelhai le Judahai chu bukah an um a; ka hotupa Joab le ka pu mihai chu ramah an inkul a, kei ka inah inlawiin, faa dawnin, ka nuhmei kuomah ka zal bik ding maw? I hringna le i thlarau hringna salin ka hril, chu chu thaw naw top ka tih" a ta. |
12. | Davida chun Uria kuomah, "Voisun khom hi takah la cham la, zingah i fe chauh ding a nih" a ta, chu ni le a zing chun Jerusalemah a la cham a. |
13. | Chun, Davida chun Uria chu a ko a, a hmaa chun fain a dawn a, a'n ruitir ta der a. Zan tieng chun a in tieng inlawi loin a pu siehlawhai lai riek dingin a suok ta a. |
14. | A zinga chun Davidan Joab ta ding lekhathon a ziek a, Uria chu a'n chawitir a. |
15. | Chu lekhathona chun Davidan, "Uria hi ral zuolna lai tak a hmatawngah inthangtir la, an lo that ngei dingin hnung intawlsan ro" tiin a ziek a. |
16. | Joab-in khuo a'n huol lai chun an ralhai tienga mi huoisen sen umna nia a hrieta chun Uria chu a'n thangtir a. |
17. | Khaw sunga mihai chu Joab mihai do dingin an hung suok a, an bei a, Davida mihai ngei khom an thi a, Hit mi Uria khom chu a thi a. |
18. | Joab chun indo chanchin chu a kimin Davida kuomah a thon a. |
19. | A mi tir kuoma chun, "Indo chanchin i ripawt zo pha lal a lungsen thut a, |
20. | Iengti dana chuong anga hnaia chun in va bei am a na? Kula inthokin an lo kap ding cheu ti khom in hriet naw maw? |
21. | Jerubeset naupa Abimelek kha tuin am a that kha? Nuhmeiin bu rawtna lung sin kula inthokin a lu chungah a zuk thlak a, Thebez-ah khan a thi a ni naw am a ni? Iengti dana kul bul ela chun in fe am a na?" a ti chun, "I siehlaw Hit mi Uria khom a thi ve' ti rawh" tiin a hril a. |
22. | Chuongchun, a mi tir chu a fe a, a tlung chun Davida kuomah Joab-in hril dinga a ti po po chu a hril a. |
23. | A mi tir chun Davida kuomah, "Mihai chun an mi hung nor phei a, phula chun an mi hung bei a, keinin an khaw lutna kotkhar tlung rakin kan nor kir a. |
24. | Thal kaptuhai chun i siehlawhai chu kula inthokin an lo kap a, lal siehlaw thenkhat an thi a, Hit mi Uria khom kha a thi ve a nih" a ta. |
25. | Davida chun zuolko kuomah, "Joab kuoma chun, 'Hi hin i lung sukhnuol naw raw se. Kawlhnam chun a tu el khom a thlei naw a, nasa nawk zuolin khuo chu bei unla, sukse vong ro' tiin infui phur rawh" a ta. |
26. | Uria nuhmeiin a pasal thi thu a hriet chun a sun a. |
27. | A sun hun sung a hung pel chun Davidan a in tieng a'n thuoitir a, nuhmeiin a nei a, naupa a neipek a. Nisienlakhom, Davida thilthaw chun LALPA a suklawm nawh. |
← 2Samuel (11/24) → |